Ngwentenang Teknologi Bedah Telerobotik, Sekda Dewa Indra Ngrauhin Pamungkah Kongres UAA
Jumat, 06 September 2024
BADUNG,Balitopnews.com - Sekretaris Daerah Provinsi Bali, Dewa Made Indra, ngrauhin pamungkah Kongres Urological Association of Asia (UAA) sane kalaksanayang ring Bali Nusa Dua Convention Center (BNDCC) rahina Wraspati (5 September 2024) sore.
Kongres sane kalaksanayang ring 5-8 September 2024 puniki wantah kolaborasi pantaraning UAA miwah Indonesian Urological Association (InaUA), taler karauhin olih 3.000 langkung ahli urologi saking 60 negara, utamannyane saking Asia. Tiosan punika, 21 pagubugan urologi internasional miwah 8 pagubugan urologi nasional taler nyarengin.
Sajeroning sambrama wacanan dane saking ambara laya, Menteri Kesehatan RI, Budi Gunadi Sadikin, maosang Indonesia masemaya setata nglimbakang sistem miwah layanan kesehatan sane sayan jimbar. "Presiden Joko Widodo micayang piteket mangda setata ngreformasi miwah nglimbakang akses kesehatan majeng ring kramane, bilih-bilih Indonesia madue peonan pulo ring wewidangannyane," baos dane.
Dane taler mapangapti mangda parikrama punika prasida mikolihang inovasi sane mabuat, pamekasnyane ring widang kedokteran urologi. "Rahajeng ngamargiang kongres, tur suksma sampun nadosang Bali pinaka tuan rumah," baos Menkes.
Tiosan punika, Presiden UAA, Yasser Farhat, maosang kongres puniki jagi maosang bebaosan sane mabuat sajeroning widang uro-onkologi, androurologi, urologi rekonstruksi, endourologi, neurourologi, urologi pediatrik, miwah urologi wanita. "Titiang masemaya setata nglimbakang urologi ring Asia taler ngirangin kesenjangan sajeroning standar perawatan urologi ring soang-soang negara," baos dane.
Silih tunggil sane nudut manah sajeroning parikrama pamungkah Kongres UAA inggih punika demonstrasi langsung teknologi mutakhir bedah telerobotik (bedah sane prasida kalaksanayang saking genah sane madohan), sane kalaksanayang saking RSUP Prof. Dr. IGNG Ngoerah ka RS Universitas Udayana (Unud) olih tim ahli urologi robotik sane kamanggalanin olih Prof. dr. Agus Rizal Ardy Hariandy Hamid, SpU(K-Onk), FICRS, PhD. Operasi jarak jauh puniki kaaptiang prasida nepasin pikobet indik jarak miwah geografis, pamekasnyane ring Indonesia taler negara-negara Asia, mawinan pemerataan layanan kesehatan sane becik.(Rls/Btnc)
Berita Terbaru
Terpopuler
Komentar