Balitopnews.com, Buleleng 

Ngawangun karakter anak alit sane pradnyan kabuatang pisan kerjasama sane becik pantaraning guru rupaka. Napimalih ring aab jagate sane kabaos aor tan pawates sakadi mangkin sane akeh ngawentenang persaingan, kulawarga kadadosang pinaka tameng sane kapertama ring sajeroning ngasilang jadma sane inggil.

 

Indik punika kawedar olih Ibu Putri Suastini Kostern rikala ngarauhin acara Pembukaan Pengabdian Pada Masyarakat (P2M) Pelatihan Pendekatan Saintifik ring sajeroning Ngawangun Ekosistem Literasi majeng ring Sekolah Guru-Guru Bahasa Indonesia se-Kabupaten Buleleng, sane kamargiang ring Gedung Pasca Sarjana Undiksha, Buleleng, rahina Saniscara (27 April 2019). 

 

Manut dane Putri Koster, sajabaning pendidikan karakter secara formal mapaiketan ring widang kaweruhan/keilmuan, etika miwah moral, lembaga pendidikan taler mangda patut ngalimbakang karakter seni sane kadruwenan olih para sisya. "Makahawinan kadi punika, sajabaning maderbe bekel marupa kaweruhan saking pendidikan, sang sisya utawi I anak pacang tumbuh duur manados jadma sane mawiguna tur trampil," baos Putri Koster. 

Putri Koster ngawewehin, sane kabaos putra punika wantah arta sane mautama pisan majeng ring I rarama. Madruwe pianak sane maderbe jati diri utawi karakter ngalegang pisan pakahyunan I rarama. Duaning punika, sampunang pisan nenten ngalinguang galah puniki, sane nenten pacang medal ming kalihan malih. Durus karyanin genah pakulawargan ida dane mangda sayan becik, icenin tatuladan, tur durus dadosang ragane pinaka sawitran ipun I pianak. "Sasana sang maraga rarama wantah ngicenin kaweruhan tur pendidikan karakter majeng ring I anak dahat mabuat pisan. Ring yusia kantun alit, nilai-nilai sane kawerdiang olih rerama majeng ring putran-putrannyane pacang terus kaanggen titi pangancan salantang tuwuh ipun. Manut naluriah, parilaksana-parilaksana sane kamedalang olih soang-soang jadma risampune duur, wantah atenga parilaksanannyane metu sangkaning katulad saking parilaksana duk mayusa alit," baos Putri Koster.  (Balitopnews.com / Amo Bali )