Ibu Putri Koster Mapangapti Mangda Kantin ring Sekolah Nyiagayang Ajengan Ulam

Balitopnews.com, Buleleng 
Ketua TP PKK Provinsi Bali, Ibu Putri Suastini Koster mapangapti mangda soang-soang kantin utawi warung ring sekolah-sekolah mangda mrasidang nyiagayang boga utawi ajengan khusus sane malakar antuk ulam/ikan. 
"Titiang mapangapti mangda soang-soang kantin mrasidang nyiagayang menu ulam/ikan. Indik puniki dahat mabuat pisan majeng ring para alit-alit sajeroning negepin komsumsi ajengan sane bergizi, utamannyane sane malakar saking ulam/ikan," baos Ibu Putri Suastini Koster ring acara 'Gerakan Masyarakat Gemar Makan Ikan (Gemarikan)' malantaran antuk parikrama ngicenin ajengan tambahan majeng ring alit-alit para sisya ring sekolah, magenah ring Gedung Wanita Laksmi Graha Singaraja, Kabupaten Buleleng, rahina Buda (8 Mei 2019). 
Pinaka rabi saking sang sane kasengguh nyakrawarti jagat Bali puniki maosang, ulam/ikan punika wantah sumber ajengan sane bergizi miwah akeh madaging protein, vitamin, tur sane pinih mabuat madaging Omega 3 sane becik pisan anggen ngawantu tumbuh tur limbaknyane otak anak alit. "Puniki mabuat pisan majeng ring alit-alit iraga pinaka generasi penerus. Napimalih anak alit ring tuwuhnyane sane mabuat kadi punika, pinih gemba pisan keni pinyakit, yening nenten kawehin antuk ajengan sane bergizi," baos dane.
Manut baos dane Ibu Putri Suastini Koster, utsaha nulakang saking makudang-kudang pinyakit sane kawiwitin saking riin antuk ngarayunan utawi ngajengan ajeng-ajengan sane bergizi sane silih sinunggilnyane mawit saking bahan ulam/ikan, pinih mabuat yening saihang ring utsaha nambenin pinungkan sane sampun sue nyusup ring angga sariran anak alit. 
"Iraga patut madue pamineh, pinih becik investasi mahal antuk ngarayunan ajengan sane sehat saihang ring kapungkur iraga musti ngamedalang prabeya sane akeh anggen matamba," baos Ibu Putri Koster sane kasub taler kasengguh pinaka pragina panggung tur teater.       
Mapaiketan ring indik punika, ring galahe sane akidik puniki dane taler mapangapti mangda kantin-kantin ring sekolah nyiagayang ajengan sane malakar antuk ulam. "Iraga patut merangsang alit-alit mangda seneng ngajengang ulam/ikan, utamannyane ring genah-genah ipun sering mapupul minakadi ring sekolah miwah ring jumah, jero, puri soang-soang," baos dane sinambi mabesen majeng ring ibu-ibu rumah tangga mangda ngutamayang penyediaan makanan/ajengan sehat ring jero, puri soang-soang, duaning makasami punika mawit saking rumah tangga. 
Salanturnyane, Ibu Putri Koster mabaos, pikolih marupa ulam saking Indonesia sane becik-becik mangda nenten samian kaekspor ke dura nagara, nanging mangda kasebar ring pasar dalam negeri. 
"Putra-putri iraga patut polih namtamin kaluihan ulam kualitas pinih becik antuk pangharga sane murah mangda gizinnyane prasida kapolihang. Napimalih ring kawentenan pakibeh sakadi mangkin, komsumsi ulam/ikan ring Bali akehnyane 33,26 kg/kapita/tahun, kantun doh di bawah rata-rata nasional inggih punika, 50, 69 kg/kapita/tahun," baos dane. 
Maka utsaha nincapang komsumsi ulam/ikan makudang-kudang utsaha sampun kamargiang sakadi 'baby fish' inggih punika ngicenin ajengan ulam/ikan majeng ring bayi, 'firth for school' inggih punika nyediang ajengan sane malakar antuk ulam majeng ring para alit-alit Paud, SD, miwah SMP, miwah makudang-kudang festival sane mapaiketan ring tema gemar makan ikan. Indik punika kalaksanayang anggen nincapang komsumsi ulam ring Bali, baos Ibu Putri Koster. 
Tios ring punika, Kepala Dinas Kelautan lan Perikanan Kabupaten Buleleng I Made Sudarsana maosang, parikrama puniki kalaksanayang tatujonnyane wantah nyobyahang majeng ring krama utamannyane alit-alit mangda seneng ngajengang ulam/ikan. "Ulam/ikan punika pinih mabuat pisan anggen pertumbuhan miwah panglimbak otak," baos dane nalatarang. 
Kapungkur, Sudarsana ngawewehin, parikrama sakadi puniki pacang sering kamargiang anggen nuldul kahyun kramane mangda sayan seneng ngarayunan ulam/ikan. 
Bupati Buleleng sane duk galah punika kaangganin olih Staf Ahli Bidang Hukum miwah Pemerintahan Putu Tastra Wijaya maosang yening komsumsi ulam/ikan ring Kabupaten Buleleng sampun becik inggih punika 36,89/kg/kapita/tahun, akehan ring tingkat provinsi. Nanging, jumlah punika kantun di bawah tingkat nasional. Duaning kadi asapunika, mangda mrasidang ngamolihang manut pangapti, makudang utsaha sampun kamargiang minakadi ngalaksanayang festival miwah ajakan majeng ring sisya-sisya sekolah mangda seneng ngajengang ulam/ikan.  (Balitopnews.com / Amo Bali ) 
   
 
 
 
 
 
 

TAGS :

Komentar