Balitopnews.com, Buleleng 

Ibu Putri Suastini Koster pinaka Ketua TP PKK Provinsi Bali tedun langsung mapaiketan ring upaya ngamargiang sinkronisasi miwah harmonisasi 10 Program Pokok PKK sane kalaksanayang ring Desa Tajun, Kubutambahan, Buleleng ring rahina Sukra (17 Mei 2019). 

Manut Ibu Putri Koster, Tajun wantah desa sane kaping lima ring Kabupaten Buleleng sane langsung rauhin dane pinaka upaya ngamargiang sinkronisasi 10 program pokok PKK ring tengah-tengah krama. Silih sinunggil program sane kamargiang inggih punika gerakan Halaman Asri Teratur Indah dan Nyaman (HATInya) PKK, manut ring punika wawidangan umah mangda sapatutnyane nenten wantah karasayang dayuh miwah asri kmanten, nanging mangda prasida taler ngawetuang kawigunan majeng ring anggota kulawarga. 

 

Wawidangan umah sapatutnyane katata becik antuk tatanduran sane mawiguna, sakadi ring wawidangan Parhyangan prasida katandurin antuk sarwa sekar, sakemaon ring wawidangan sane nampek paon utawi pawaregan prasida katandurin antuk sarwa jajukutan utawi jejanganan miwah sarwa kebasa. 

"Wawidangan umah, jero, utawi puri sapatutnyane satata katata miwah karesikin, sakadi anake melihara taman, nanging mangda satata ngicenin kawigunan. Tiosan ring ngawe kaasrian wawidangan umah, jero miwah puri, antuk upaya puniki iraga prasida ngirangin prabeya sarahina pamekasnyane negepin sarana-prasarana ring paon utawi pawaregan," baos dane. 

 

Sajabaning punika, malarapan antuk utsaha sane kamargiang olih PKK, Ibu Putri Koster sane taler pinaka rabi Gubernur Bali nuduhin para istri-istrine pinaka ibu rumah tangga mangda sareng nyiatin kawentenan mis plastik. 

 

Dane maosang, kawentenan mis plastik ring pulau sane kasengguh suargane para wisatawan puniki, sane mangkin sampun tambis-tambis nyejehin pisan. Pinaka kepanjangan tangan saking pemerintah, antuk punika Tim Penggerak PKK Provinsi Bali maderbe pikahyunan sane luwih pisan anggen ngalanturang program ring sajeroning nyiatin mis plastik, 

"Sosialisasi sampun sering, mangkin iraga sedeng ngarincikang tata cara pengelolaan mis plastik ring soang-soang rumah tangga," baos Ibu Putri Koster. 

 

Ibu Putri Koster mikahyunin, baya sampah utawi mis plastik sane dahat mabuat mawit saking paumahan. Pinaka upaya nukung program sane sedeng kamargiang olih Gubernur I Wayan Koster punika, dane pacang satata tedun sareng Tim Penggerak PKK Kabupaten mangda ngelingin krama indik baya laten sampah plastik. 

Sakadi arip baktayang galeng, ring sela-sela peninjauan rombongan PKK Provinsi Bali, Perbekel Desa Tajun Gede Ardana maosang pihaknyane sampun maderbe genah pengolahan mis terpadu sane kakelola olih krama desa irika. 

"Mis-mis plastik punika pacang katumbas saking limbah pomahan sane witnyane kahasilang olih para istri-istri, indik puniki sampun kaklasirang soroh-soroh misnyane, mangkin risampune iraga pacang ngambil wantah perlu ngolah kemanten mangda dados lalemekan," baos dane. 

 

Dane maosang, lalemekan sane kaasilang salanturnyane pacang kaadol malih ke kramane sami pinaka pupuk utawi lalemekan organik perkebunan, duaning atenga langkung para kramane ring Tajun kantun makarya dados petani. Dane maosang ngawit saking ngamargiang kolaborasi sareng ibu-ibu PKK indik penglolaan mis, tan madaya ngicenin pikenoh sane becik majeng ring desa Tajun. Silih sinunggilnyane, ngicenin pemasukan utawi laba (keuntungan) majeng ring desa antuk ngadol pupuk miwah ngicenin bati majeng ring rumah tangga saking ngadol misnyane, ngicenin ajah-ajahan utawi piteket majeng ring para kramane indik sapunapi tata cara ngolah mis tur mustikannyane wawidangan Tajun mangda satata resik, becik, miwah asri. 

 

Dane mapangapti, pasikian puniki pacang satata kakemit, bilih-bilih malarapan antuk program Hatinya PKK sane pinih mabuat ngicenin pikenoh sane luwih majeng ring kahuripan paumahan. 

 

Ring galah sane tiosan, sajabaning ngamargiang peninjauan ring genah pengelolaan sampah, Ibu Putri Koster sareng rombongan taler ngalaksanayang pamargi sane pateh ring genah percontohan Hatinya PKK, Bumdes Tajun, SD N 1 Tajun, miwah UP2K Desa Tajun.    (Balitopnews.com / Amo Bali )