Gubernur Koster "Angayu Bagia" ring sajeroning Inggilnyane Pasangan Jokowi-Ma'aruf Amin
- 21 Mei 2019
- 12:19 WITA
- News
Balitopnews.com, Denpasar
Gubernur Bali Wayan Koster antuk pamargi sane resmi ngaturang agayu bagia miwah rahajeng majeng ring Presiden Joko Widodo antuk kamenangannyane ring Pilpres 2019. "Titiang newek, pinaka Gubernur Bali, miwah ngewakilin makasami krama Bali, malarapan pamargi puniki ngaturang rahajeng majeng ring Bapak Joko Widodo miwah KH. Ma'ruf Amin antuk kemenangan pasangan puniki ring sajeroning pemilihan presiden sane anyar rahina sane lintang," baosnyane. Rahina Anggara (21 Mei 2019).
Kemenangan pasangan Jokowi - Ma'aruf Amin kakukuhang olih Komisi Pemilihan Umum (KPU) duk rahina Anggara semeng. Jokowi - Ma'aruf Amin ngamolihang 55,50 persen suara saking total suara sah nasional, sakemaon pesaingnyane pasangan Prabowo Subianto - Sandiaga Uno wantah ngamolihang 44,50 persen suara.
Antuk punika, sampun prasida kapastikayang Jokowi pacang mawali mimpin Indonesia salami limang tiban sane jagi rauh puniki. "Titiang sareng sami marasa angayu bagia, ngaturang parama suksema miwah marasa gargita pisan antuk kemenangan Bapak Jokowi, tur makasami krama Bali ngaturang pamuji saha pangrastiti mangda Bapak Jokowi makamiwah kulawarga satata kapicayang kerahayuan miwah keselametan, mangda prasida ngenterang bangsa miwah panagara puniki sayan maju kapungkur wekas," teges Wayan Koster.
Pasangan Jokowi - Ma'aruf Amin inggil ring 21 provinsi, silih sinunggilnyane Bali, daerah sane prasida munggah ring catatan puniki ngamolihang kemenangan sane fantastis inggih punika 91,68 persen miwah tingkat partisipasi pemilih akehnyane 82 persen. Prosentase punika, wantah sane pinih ageng ring Indonesia tur nyihnayang rasa solidaritas dukungan krama Bali. "Bapak Presiden sampun ngaturang parama suksema miwah pamujinnyane ring sajeroning dukungan krama Bali punika," baos Koster.
Koster, sane taler kajudi pinaka Ketua DPD PDI Perjuangan Bali puniki, nguningayang dahat gargitan manahnyane Jokowi sampun lunga ke Bali ring rahina 17-18 Mei sane lintang. "Dane dahat bagia pisan antuk panyanggran krama Bali miwah makudang-kudang kemajuan pembangunan ring daerah puniki," baos Koster.
Pinaka prakanti sane sareng-sareng dados kader PDI Perjuangan, Koster polih kapanggih sedeng maorta-ortan sareng Presiden Jokowi lan Menteri Sekretaris Kabinet Pramono Anung ritatkala acara makan malam ring Kuta. Orta-ortan sane kadagingin antuk saling makedekan punika mamargi ring meja makan sinambi Presiden Jokowi ngajengang nasi goreng. "Yening nenten kapikelingin olih ajudan, obrolan punika pacang mamargi nyantos tengah lemeng," baos Koster. "Rikala punika, mawali Bapak Presiden nyobyahang komitmenyane pacang nincapang pembangunan infrastruktur ring Bali tur taler ngukuhang dukungan pemerintah pusat majeng ring Desa Adat," teges dane.
Koster taler mapikeling majeng ring makasami komponen masyarakat utawi krama, mangda nerima pikolih pilpres sane kakukuhang olih KPU. "Kemenangan Pak Jokowi ring sajeroning Pilpres patut kasuksemayang pinaka kemenangan iraga sareng sami, makasami rakyat Indonesia," baos dane.
Koster mapinunas majeng ring makasami krama mangda nginggilang persatuan lan kesatuan bangsa, nyegjegang idiologi Pancasila, UUD Negara Republik Indonesia tahun 1945, NKRI miwah Bhineka Tunggal Ika. "Pemilu sampun puput, makehipun 80% rakyat Indonesia sampun nganggen hak pilihnyane ring sajeroning ngawangun demokrasi manut nilai-nilai Pancasila. Sapatutnyane iraga nyungkemin pilihan miwah keputusan rakyat Indonesia," teges Wayan Koster.
Dane mapikeling, inggian kawentenan matiosan pilihan ring sajeroning pemilu serentak warsa 2019 sapatutnyane nenten ngawinang bangsa puniki marebat. "Iraga patut nginggilang kepentingan miwah kemajuan bangsa pinih luhuran saihang ring widang sane tiosan, mangda ring sajeroning kepemimpinan Bapak Jokowi, bangsa miwah panagara puniki terus mamargi ngaruruh tatujon ngamolihang kemajuan rikala ngaranjing ring aab jagat sane kabaos persaingan global," dane negesang. (Balitopnews.com/Amo Bali)
Komentar