Gubernur Koster: Para Yowana Patut Uning ring Sejarah Bangsa
- 14 Juni 2019
- 01:52 WITA
- News
Balitopnews.com, Denpasar
Gubernur Bali Wayan Koster negesang, para yowana pamekas sane mawit saking Bali patut uning ring sejarah Bangsa. "Sampunang ngutang sejarah. Generasi mangkin patut uning sapasira sane dados pahlawan bangsa, sira proklamator kemerdekaan Republik Indonesia," baosnyane sumeken pisan.
Gubernur Koster maosang indik puniki ring acara pamungkah 'Lomba Cerdas Cermat lan Pidato Bung Karno' magenah ring Kantor Dinas Pendidikan Provinsi Bali ring Denpasar, Wraspati (13 Juni 2019) semeng.
Ring sajeroning parikrama sane kamargiang mapaietan ring pakeling Bulan Bung Karno punika, Gubernur Koster nalatarang peran ageng Bung Karno ring sajeroning nadosang panegara puniki ngamolihang kamardikan. "Sejarah sampun nyuratang indik peran dane ring sajeroning mautsaha ngawerdiang miwah ngawangun bangsa puniki mangda sida polih kemerdekaan. Iraga patut namiang semangat, ide, miwah gagasan dane sajeroning nuju Indonesia Raya," baos dane negesang.
Mapaiketan ring jasa-jasa sane sampun katur sajeroning ngaptiang kamahardikan Indonesia miwah indik-indik sane tiosan mapaiketan ring embasnyane panagara puniki, manut Koster sampun sapatutnyane Bung Karno mangda kasungkemin tur kaadegang pinaka Bapak Bangsa, pinaka pahlawan Nasional.
Gubernur sane taler pinaka Ketua DPD PDI Perjuangan Provinsi Bali puniki maosang, ritepengan sane mangkin wantah galah sane becik pisan anggen nerapang utawi ngamargiang nilai-nilai sane adiluhung ajaran Bung Karno majeng ring rakyat Indonesia, utamannyane ring Provinsi Bali. "Bali wantah kadadosang pratiwimba olih daerah sane tiosan ring sajeroning ngamargiang ajaran Bung Karno sane utuh, manut kearifan lokal sane wenten," baos anak lanang sane embas ring Sembiran, Kabupaten Buleleng puniki.
Gubernur nyobyahang, "Visi Nangun Sat Kerthi Loka Bali" inggian ide miwah konsepnyane titiang rerehang ring pemikiran Bung Karno, pamekasnyane konsep berkepribadian secara budaya pinih patut yening anutang ring kawentenan Bali."
Ring warsa-warsa salanturnyane, Koster pacang mastikayang parikrama Bulan Bung Karno pacang terus kalaksanayang tur pacang kautsahayang mangda meriah lan ngalimbak malih. "Para pamilet lomba utawi pacentokan pacang kawewehin malih. Sane mangkin kantun tingkat SMA/SMK, warsa sane jagi rauh kamiletin ngawit saking SD nyantos perguruan tinggi. Iraga tumbuhang nilai-nilai kebangsaan saking tingkat awal nyantos tingkat lanjutan majeng ring generasi iraga," baos dane ring ajeng para pamilet sane taler kaabih olih para guru miwah kepala sekolahnyane soang-soang.
Tios ring punika, Kepala Dinas Pendidikan Provinsi Bali Ketut Ngurah Boy Jayawibawa ring sajeroning acara sane pateh maosang, semangat miwah gagasan Bung Karno utamannyane Pancasila patut anggen tatuladan olih generasi penerus. "Iraga mapikelingin miwah ngamargiang semangat Bung Karno sane taler manut ring visi "Nangun Sat Kerthi Loka Bali," baos Jayawibawa negesang.
Lomba pidarta/pidato miwah cerdas cermat puniki kasarengin olih perwakilan SMA/SMK/SLB kabupaten/kota se-Bali, inggian 23 diri sane dados pamilet ring lomba pidarta lan 45 diri sane dados pamilet ring lomba cerdas cermat bertema Bung Karno.
Gubernur Koster ring acara puniki taler sareng nyaksiang miwah ngicenin semangat majeng ring pamilet sane sedeng ngamargiang pacentokan. (Balitopnews.com / Amo Bali )
Komentar