Kolaborasi Ibu Putri Koster-ISBI Tanah Papua Ngawi Ngon Panonton PKB
- 17 Juni 2019
- 14:12 WITA
- News
Balitopnews.com, Denpasar
Parikrama Pesta Kesenian Bali (PKB) kaping 41 sane kamargiang warsane mangkin karasayang dahat mabuat pisan, sajabaning metu makudang-kudang inovasi tur kabungkah langsung olih Presiden Joko Widodo, Ketua TP PKK Provinsi Bali Ibu Putri Koster taler nyelang galah masolah ring panggung ngaturang kapascatan seni sane duenang dane.
Ring tepengan mangkin rabin Gubernur Bali Wayan Koster sane kasub pinaka seniwati multitalenta puniki ngaturang pangwacenan puisi sane mamurda 'Aku Papua' ring sajeroning sasolahan musik, tarian, miwah puisi kakolaborasiang sareng Institut Seni Budaya Indonesia (ISBI) Tanah Papua ring Panggung Ayodya, Taman Budaya Art Center, dina Radite (16 Juni 2019) wengi.
Sasolahan sane ngangkat tema 'Nggo Wor Bai Do Na Nggomar' sane maartos 'Yening nenten Magending miwah Masolah Iraga Sami pacang Mati' mangundang rasa panasaran para panonton ring Art Center rikala para jadma sane ngangge busana Papua ngedeng rakit ring embahan toyo tukad Art Center, tur ring baduur rakit punika malinggih dane Ibu Putri Suastini Koster.
Sasolahan raris magentos genah ring panggung Ayodya antuk kakawitin sasolahan Isoholo. Sasolahan khas Sentani puniki nyihnayang kahyun suka cita pinaka simbol pasuka dukan utawi kerukunan pantaraning suku ring Papua. Sasolahan sane mamargi kirang langkung kalih jam puniki ngawetuang ngon kahyun para panontone sami saha sami ngaturang tepuk tangan miwah pamuji majeng ring para seniman.
Puisi 'Aku Papua' pamekas wantah pangriptan putra asli saking Bali, Prof. Dr. I Wayan Rai sane rikanjekan mangkin kaadegang pinaka Rektor Institut ISBI Tanah Papua. Ring sajeroning sambrama wacanan dane Prof. Rai maosang, sasolahan 29 mahasisya miwah dosen ISBI Tanah Papua ke Bali warsane mangkin wantah bagian saking kunjungan balasan saking dane Ibu Putri Koster ke Papua galahe sane lintang. Dane maosang, yadiastun wawu pacang matuuh limang tiban, ISBI Tanah Papua mautsaha nyobyahang sasolahan sane pinih becik saking seni lan budaya Papua.
Tios ring punika, Gubernur Bali Wayan Koster maosang, mijilnyane UU No. 5 Tahun 2014 indik Pemajuan Kebudayaan sane kariptayang olih dane rikala dados anggota DPR, silih sinunggilnyane matatujon anggen ngawerdiang pembangunan seni miwah budaya ring sajebag panagara Indonesia antuk karakter seni lan budaya sane dados kekayaan daerah soang-soang.
"Duaning dumun Indonesia sadurung kajajah olih Walanda lan Jepang, Indonesia dahat kukuh ngarajegang tradisi miwah budayannyane," baos Ketua DPD PDIP Provinsi Bali puniki. Nanging sane seselang iraga, sasampune merdeka seni lan budaya nenten polih ekosistem sane becik. Manut dane, parindikan puniki sane makahawinan akeh wenten kekerasan, radikalisme, lan terorisme ring makudang-kudang genah ring Indonesia.
Indik punika makahawinan Gubernur Koster ngarincikang tur ngamecikang malih Pesta Kesenian Bali ring pangawit kepemerintahannyane. Dane mapangapti mangda PKB sayuwakti dados ajang pesta sane sujati majeng ring krama Bali. Duaning punika, dane dahat ngaturang pamuji ring sajeroning kaledangan ISBI Tanah Papua ngamiletin Pesta Kesenian Bali kaping 41 warsa 2019 puniki. Puniki wantah momentum anggen ngaraketang rasa panyama brayan miwah kebhinekaan ring Indonesia.(Balitopnews.com/Amo Bali)
Komentar