Ngawerdiang Bali Era Baru Gubernur Koster Mapangapti Mangda Makarya antuk Pikahyun Sane Lascarya
- 15 Agustus 2019
- 02:42 WITA
- News
Balitopnews.com, Denpasar
Gubernur Bali Wayan Koster nyobyahang indik pikamkam ring sajeroning mautsaha mangda prasida ngamolihang pangapti nuju Bali Era Baru, antuk ngamargiang penataan sane saking kawangun saking dasar lan komprehensif pawangunan ring Bali, sane kakuwubnyane wenten tigang aspek sane utama.
Soangsoang aspek inggih punika wantah palemahan/alam, krama miwah kebudayaan Bali nganutin nilai-nilai Tri Hita Karana, sane sami mawit saking kearifan lokal Sad Kerthi, inggih punika: kesucian jiwa (atma kerthi), kasucian sagara (sagara kerthi), kasucian sumber air/toya (danu kerthi), kasucian sarwa papayonan/sarwa tumuwuh (wana kerthi), kasucian manusa (jana kerthi), miwah kasucian bhuana agung (jagat kerthi).
Mangda prasida muktiang makasami punika, Gubernur Koster nyarengin makasami jajarannyane mangda ngawangun spirit sane anyar antuk makarya sane lascarya turmaning tulus lan lurus anggen maka lantaran nangiang Visi 'Nangun Sat Kerthi Loka Bali'.
Pangaptian puniki kasinahang Gubernur Bali Wayan Koster rikala dados pembina Upacara Peringatan Hari Jadi Provinsi Bali sane kaping 61 magenah ring Lapangan Niti Mandala Margarana, Renon, Denpasar, dina Buda (14 Agustus 2019).
Tios ring punika, sang sane kaadegang pinaka sang angawerat ring Bali puniki maosang antuk spirit sane anyar makarya sane tulus miwah lurus puarannyane pacang sadia mikolihang kasukertan krama Bali inggian sakala lan niskala. "Makasami proses miwah tahapan pakaryan puniki patut kamargiang antuk utsaha sane tulus tur lurus. Antuk spirit sane anyar puniki, iraga pacang ngamuktiang Bali Era Baru manut Visi Nangun Sat Kerthi Loka Bali," baosnyane.
Ring widang sane tiosan, Ketua DPD PDIP Bali puniki taler mapangapti mangda makasami jajaran ring lingkungan Pemprov Bali mangda nincapang kinerja/pakaryan manut Visi Nangun Sat Kerthi Loka Bali sane sampun kajabarang tur kamargiang ring sajeroning makudang-kudang program kerja ring makasami sektor sane katitenin olih soang-soang Organisasi Perangkat Daerah (OPD).
"Makasami program patut kamargiang manut ring targetnyane nyabran awarsa, dadosnyane kasukertan krama prasida katangiang," baos Gubernur Koster.
Ring sajeroning Upacara Mikelingin Wanti Warsa Provinsi Bali sane kaping 61 puniki, taler kaserahang makudang penghargaan sane katur majeng ring para seniman, budayawan, pendidik miwah PNS. Penghargaan punika wantah soang-soang marupa Penghargaan Dharma Kusuma, Widya Kusuma, Adhyasta Prajaniti, Sipakara Nugraha miwah Penghargaan Wikia.
Ring galah puniki taler kasukserahang penghargaan majeng ring para jayanti lomba kearsipan perangkat daerah, lomba desa, lomba kelurahan, lomba teknologi tepat guna, lomba kelompok tani ternak, miwah penghargaan majeng ring pendonor darah sane pinih akeh langkung ring 100 (satus) donor.
Kasukserahang taler penghargaan majeng ring ASN sane berprestasi ring wawidangan Pemprov Bali sane kapolihang olih Ida Bagus Kade Wira Negara (Biro BPJ Setda Provinsi Bali) ring peringkat 1 (kapertama), peringkat sane kaping kalih lan kaping tiga kapolihang olih Dewa Putu Anom Putra (BKD Provinsi Bali) lan Ellien Christiansen Nainggolan (Perawat Madya ring UPTD RS Mata Bali Mandara). Penghargaan punika kasukserahang langsung olih Gubernur Koster sane kaabih olih Wakil Gubernur Bali Tjokorda Oka Artha Ardana Sukawati, Setda Provinsi Bali Dewa Made Indra.
Upacara mikelingin Rahina Wanti Warsa Provinsi Bali sane kaping 61 ring rahina Buda semeng puniki taler kasarengin olih Ketua DPRD Provinsi Bali miwah jajarannyane, Ibu Putri Koster, Ibu Tjok Putri Hariyani Sukawati, Ibu Widyasmini Indra, anggota Forum Koordinasi Pimpinan Daerah, Gubernur Bali Periode 2008 - 2018, para veteran miwah uleman sane tiosan. Puncak mikelingin Rahina Wanti Warsa sane kaping 61 Provinsi Bali taler kajangkepin antuk parikrama ngempug celengan olih OPD ring wawidangan Pemprov Bali. (Balitopnews.com/Amo Bali)
Komentar