Ngarastiti Sareng Lintas Agama Mangda Prasida Antar Parikrama Pelantikan Presiden
- 16 Oktober 2019
- 16:52 WITA
- News
Balitopnews.com, Denpasar
Ring sajeroning parikrama Pangukuhan Presiden miwah Wakil Presiden Republik Indonesia periode 2019-2024 (Joko Widodo - Ma'ruf Amin) sane jagi kalaksanayang ring rahina Radite (20 Oktober 2019), Gubernur Bali Wayan Koster ngamedalang pangeling-eling majeng ring makasami Ketua Majelis Agama mangda ngamargiang doa utawi pangrastiti sinarengan magenah ring genah sane suci utawi ring genah persembahyangan soang-soang duk rahina Wraspati, 17 Oktober 2019, jam 09.00 Wita utawi ngadungang sareng galah sembahyang soang-soang.
Pangeling-eling punika kasurat ring sajeroning Surat Edaran Gubernur Nomor: 454/2493/B. Kesra tanggal 12 Oktober 2019 sane katur majeng ring Ketua PHDI, Ketua MUI, Ketua MPAG, Ketua Walubi, miwah Ketua Matakin Provinsi Bali miwah Ketua Keuskupan Denpasar.
Manut Gubernur Wayan Koster, pangeling-eling doa bersama utawi pangrastiti sinarengan puniki tatujonnyane nunas ketreptian, kadegdegan, miwah antarnyane pamargi parikrama pangukuhan Presiden miwah Wakil Presiden. "Titiang mapinunas majeng ring makasami krama mangda tetep maingkupan, ngemit keamanan nasional mangda pangukuhan Presiden miwah Wakil Presiden Republik Indonesia mamargi antar miwah sida-sidaning don," baos gubernur sane taler kajudi dados Ketua DPD PDIP Provinsi Bali puniki.
Mapaiketan ring parindikan ngeninin kahanan katreptian sane ngalimbak pungkuran puniki, dane taler mapakeling mangda krama nenten 'terpancing' utawi kadaut ring informasi sane ngalimbak ring ruang publik sadurung uning ring kasujatiannyane. Gubernur Koster mapangapti, kramane mangda tetep menyatu tur konsisten ngemit NKRI anggen ngaruruh katreptian tur 'kedamaian' makasami putra bangsa. "Ngiring iraga kemit 'kondusifitas' bangsa, ngiring iraga dukung Presiden muputang swadharmannyane ring periode sane kapertama miwah iraga taler nukung dane ngamargiang swadharmannyane pungkuran ring periode sane kaping kalih sasampune kakukuhang," baosnyane negesang. (Balitopnews.com/MD/Amo Bali)
Komentar