Gubernur Koster Ngamargiang Doa Bersama, Nyihnayang 'Sinar' Perdamaian Bali Majeng ring Indonesia
- 17 Oktober 2019
- 20:50 WITA
- News
Balitopnews.com, Amlapura
Gubernur Bali Wayan Koster khusus ngamargiang parikrama ngarastiti sinarengan, pinaka utsaha sane karemba sareng-sareng sajeroning ngarastiti mangda acara pelantikan utawi pangukuhan presiden miwah wakil presiden terpilih periode 2019 - 2024, prasida mamargi antar, aman, miwah trepti. Doa utawi pangrastiti punika kalaksanayang ring Pura Panataran Agung Pura Besakih, Karangasem dina Wraspati (17 Oktober 2019).
Parikrama doa bersama puniki kamiletin olih panyatusan krama sane mawit saking bupati/wali kota, anggota DPRD, kepala OPD, bendesa adat, pemangku, miwah krama umum, acara kapuput olih Ida Pedanda Gede Kerta Yoga saking Gria Panji Budakeling, Ida Padanda Gede Wayan Tianyar saking Gria Manara Sinduwati Desa Sidemen, miwah Ida Sri Bhagawan Putra Natha Nawa Wangsa Pemayun saking Kedatuan Kawista Belatungan, Pupuan.
Kaparikanten rauh Bupati Karangasem I Gusti Ayu Mas Sumantri, Ketua DPRD Karangasem I Gede Dana, Bupati Buleleng Putu Agus Suradnyana, Ketua PHDI Bali I Gusti Ngurah Sudiana, Bendesa Agung Majelis Desa Adat Ida Panglingsir Agung Putra Sukahet, miwah Wakapolda Bali Brigjen Pol I Wayan Sunartha.
"Titiang taler sampun ngamedalang swalapatra edaran sane dagingnyane mapinunas mangda ring rahina Wraspati puniki makasami komponen krama Bali inggian sane magama Hindu miwah semeton iraga sane nganut agama Islam, Katolik, Protestan, Buda, Khong Hu Cu, miwah aliran kepercayaan mangda ngamargiang doa bersama ring jam sane sinarengan ring genah soang-soang ring sajebag Bali," baos Gubernur Koster.
Gubernur maosang, doa bersama kamargiang nenten kadasarin antuk motif politik, nenten taler sangkaning pasangan presiden-wakil presiden terpilih ngamolihang suara mayoritas ring Bali. Doa bersama puniki kamargiang duaning makasami krama Bali dahat sumeken ngaptiang mangda panagara miwah bangsa iraga, inggian para pemimpin miwah rakyatnyane, satata kaliput antuk kahanan sane trepti miwah rahajeng," baos Ketua DPD PDIP Provinsi Bali ini.
Manut mantan anggota DPR RI puniki, pangrastiti sane tulus miwah lascarya madrue kekuatan sane dahating mautama. "Pinaka jadma Bali iraga maderbe 'keyakinan' utawi rasa percaya indik napi kemanten sane sampun kamargiang pinaka jadma nenten luput ring unsur sakala miwah niskala. Yening nenten ngingkupang makakalih unsur punika janten utsaha sane jagi kamargiang pacang puput tan mawiguna," baosnyane.
Dane taler ngawewehin, pangrastiti (doa), upakara miwah upacara wantah cihna saking utsaha niskala sane nenten prasida kapalasang ring kahuripan jadma Bali. Utsaha niskala puniki kaaptiang pisan prasida ngicenin sumbangan majeng ring katreptian miwah kasukertan panagara miwah bangsa Indonesia.
Gubernur maosang, Pura Besakih kapilih pinaka genah ngamargiang doa bersama duaning wantah silih sinunggil hulu peradaban Bali. Ring pura puniki malinggih Ida Bhatara Sasuhunan sane pinih mautama miwah Ida Bhatara Kawitan saking makasami unsur krama Bali. Manut dane, Ida Sasuhunan, Ida Bhatara Kawitan, miwah 'lelangit' puniki sane salami puniki micayang tuntunan, sane satata ngemit mapuara Bali miwah panjaknyane prasida ngemit katreptian, perdamaian, toleransi keberagaman, miwah taksu spritual Pulau Bali saking panyiuan warsa.
"Ring ajeng Ida Sasuhunan miwah Ida Bhatara Kawitan puniki iraga sami masimpuh mangaturang bakti, mapinunas mangda taksu spritual miwah sinar suci katreptian Bali prasida neduhang kahanan politik Indonesia, pamekas ring Jakarta," baos Gubernur saking Desa Sembiran puniki.
Malarapan antuk parikrama doa bersama puniki, krama Bali mapinunas mangda parikrama pelantikan presiden miwah wakil presiden terpilih ring tangga 20 Oktober 2019 puniki mamargi aman, nyaman, trepti miwah antar sida sidaning don dados titik pangawit majeng ring rekonsiliasi kebangsaan.
"Dumogi vibrasi spritual Bali prasida ngalimbakang katreptian majeng ring Indonesia," pangaptinnyane.
Ring sajeroning acara puniki, Gubernur Koster taler mapangapti majeng ring makasami elemen krama Bali mangda sareng dados sumber-sumber 'kesejukan' majeng ring kulawarga miwah masyarakatnyane soang-soang, miwah nularang majeng ring makasami pihak. "Ngiring wusan dumun maiyegan ring media sosial, nyebarang orti sane tan sujati, miwah ngumbar rasa tan seneng majeng ring sasamen 'anak bangsa'," baosnyane sinambi mapinunas majeng ring makasami pihak sareng-sareng bekerja nyata anggen nangiang kedamaian miwah katreptian majeng ring bangsa miwah panagara.
Manut dane, wantah malantaran antuk 'kerja nyata' sane kadasarin antuk semangat perdamaian visi pawangunan Bali "Nangun Sat Kerthi Loka Bali antuk Pola Pembangunan Semesta Berencana nuju Bali Era Baru" prasida kapolihang sareng-sareng.(Balitopnews.com/MD/Amo Bali)
Komentar