Pemprov Bali Ngicenin Penghargaan Majeng ring Wirausaha Yowana sane Maberbe Prestasi

  • 31 Oktober 2019
  • 18:56 WITA
  • News

Balitopnews.com, Denpasar

Pemerintah Provinsi Bali mautsaha ring sajeroning nincapang kualitas, motivasi, miwah nukung para yowana ring sajeroning ngaptiang tatujon pawangunan yowana sane medrue karakter miwah daya saing. Utsaha anggen nincapang daya saing kakawitin saking ngalimbakang kawirausahaan saking para yowana mangda kahyun nangun wirausaha (pinaka pemilik tur pengelola unit usaha) sane sampun wenten miwah numbuhang wirausaha utawi sanistannyane unit-unit usaha anyar ring sektor-sektor sane produktif manut ring kawentenan potensi daerah. Indik puniki kasobyahang olih Plt. Kepala Dinas Kepemudaan dan Olahraga, Made Rentin sajeroning siaran persnyane rahina Wrahaspati (31 Oktober 2019) magenah ring Kantor Dinas Kepemudaan miwah Olahraga Provinsi Bali, Renon Denpasar.

Rentin ngawewehin inggian Dinas Kepemudaan lan Olahraga Provinsi Bali ngawentenan Program Pengembangan Pemuda antuk Parikrama Pemilihan Wirausaha Muda Berprestasi Provinsi Bali warsa 2019 matetujon numbuhang rasa eling miwah minat ngamargiang wirausaha tur ngicenin penghargaan majeng ring wirausaha muda sane madrue prestasi pinaka wentuk pamuji majeng ring para yowana sane sampun aktif sajeroning ngamargiang dunia usaha miwah sampun nyihnayang pikolihnyane lan madrue potensi ngalimbak kapungkur wekas. Penghargaan puniki kaserahang langsung olih Gubernur Bali, Wayan Koster, ring sajeroning acara Pamikeling Rahina Sumpah Pemuda sane kaping 91 warsa 2019 magenah ring Lapangan Bajra Sandi, Renon Denpasar. Inggian penghargaan sane kaicen marupa hadiah piala miwah jinah soang-soang akehnyane Rp. 5000.0000 (limang yuta rupiah) majeng ring soang-soang jayanti, baosnyane.   

Inggian pesengan sane ngamolihang penghargaan inggih punika:

I Putu Agi Pratama, Widang Usaha Pertanian miwah Kelautan, 

Ni Pande Putu Desi Astriani, Widang Usaha Industri Kreatif,

I Putu Arindra Prathama, Widang Usaha Industri Pangan miwah Kuliner

I Wayan Ade Saputra, Widang Usaha Perdagangan miwah Jasa.

Rentin taler nyobyahang indik Pamikeling Rahina Sumpah Pemuda sane kaping 91 warsa 2019 ngambil tema "Bersatu Kita Maju". Tema puniki kaambil anggen negesang malih indik komitmen sane sampun kawangun olih para yowana utawi pemuda sane kacetusang ring warsa 1928 sajeroning Sumpah Pemuda. Wantah malarapan antuk persatuan iraga prasida ngamolihang cita-cita bangsa. Yowana sane madrue karakter sane kuat wantah yowana sane maderbe karakter moral miwah karakter kinerja, yowana sane madrue iman miwah bertaqwa, madrue integritas tinggi, jujur, santun, madrue rasa tanggung jawab, desiplin, kerja keras, cerdas, kerja ikhlas miwah tuntas. Pemuda taler mangda madrue kapasitas intelektual miwah skill kepemimpinan, kewirausahaan miwah kepeloporan sane becik, miwah para yowana utawi pemuda patut madrue inovasi mangda prasida berperan aktif ring kancah internasional.

Lebih jangkep katalatarang olih Rentin inggian Pemilihan Wirausaha Muda Berprestasi Provinsi Bali kakepah dados 4 (pat) widang usaha, para jayantinnyane inggih punika:

-           Widang Usaha Pertanian miwah Kelautan:

1.         I Putu Agi Pratama (kopi)

2.         I Made Nistra (bawng merah)

3.         Ni Kadek Sri Utari (hydroponik)

-           Widang Usaha Industri Kreatif:

1.         Ni Pande Putu Desi Astriani (retail baju/fasion)

2.         Ni Putu Ellida Raini Pande (mom and baby care oil)

3.         I G. N. Erlangga Bayu Rahmanda (fasion)

-           Widang Usaha Industri Pangan lan Kuliner:

1.         I Putu Arindra Pratama (warung tenda)

2.         Made Ani Setia Wulan (sambal mantu)

3.         Putu Agus Indra Wahyudi (mie tonjok)

-           Widang Usaha Perdagangan miwah Jasa:

1.         I Wayan Ade Saputra (jasa kunsultasi IT)

2.         I Gusti Made Yudi Antara Wijaya (jasa hulian sewa)

3.         Ni Nyoman Pudak Sari (smokebomb).    


TAGS :

Komentar