Wagub Cok Ace : Festival Desa Konstitusi Prasida Nangiang Rasa Eling Krama Ngamargiang Konstitusi
- 02 November 2019
- 16:29 WITA
- News
Balitopnews.com, Bangli
Hak konstitusi wantah hak-hak dasar sane kapungkur karanjingang sajeroning konstitusi sane ngaranjing ring hak asasi manusia miwah hak warga negara sane kapastikayang sajeroning UUD 1945 tur berlaku ring soang-soang warga Negara Indonesia. UUD 1945 wantah konstitusi Indonesia pinaka norma dasar sajeroning sistem hukum Indonesia sane ngatur tur ngicenin sepat siku-siku majeng ring warga negara nuju tatujon sane kaaptiang. Pinaka warga negara, silih sinunggil krama/warga janten polih hak konstitusional lan hak hukum risampune ngamargiang swadharma utawi sasanannyane pinaka warga negara.
Kadi asapunika kasobyahang olih Wakil Gubernur Bali Tjok Oka Artha Ardhana Sukawati (Cok Ace) ring sajeroning sambrama wacanannyane rikala acara panyineb utawi penutupan Festival Desa Konstitusi magenah ring Desa Bangbang, Tembuku, Bangli, rahina Sukra (1 November 2019) siang dina.
"Titiang nyanggra becik parikrama puniki tur sapisanan ngaturang parama suksema majeng ring Mahkamah Konstitusi Republik Indonesia sane sampun milih Bali pinaka tuan rumah Festival Desa Kosntitusi. Dumogi acara puniki prasida numbuhang rasa eling krama sajeroning ngamargiang konstitusi miwah nincapang pemahaman-pemahaman hak konstitusi warga negara," baosnyane.
Kasobyahang olih Cok Ace, Desa manut UU Desa wantah kesatuan masyarakat hukum sane maderbe wates wawidangan sane maderbe wewenang nitenin tur ngurus sahananing indik pemerintahan, kepentingan krama setempat manut ring pikahyunan krama, hak asal-usul miwah hak tradisional sane sampun kaangkenin tur kasungkemin sajeroning sistem pemerintahan NKRI. Sajeroning kedudukan kadi asapunika, inggian desa miwah sakancan karakter khas soang-soang maderbe linggih tur peran strategis sajeroning nentuang wangun sane utuh saking konstitusionalisme NKRI tur patut kaangekenin inggian desa maderbe kekuatan miwah spirit sane nyangga kukuhnyane kawentenan negara miwah bangsa.
"Titiang mapangapti, antuk ngamargiang parikrama Festival Desa Konstitusi pacang nincapang rasa eling kolektif warga/krama desa ngeninin indik mabuatnyane maderbe kawagedan miwah kapradnyanan sajeroning ngamargiang konstitusi. Titiang taler mapangapti sajeroning aktualisasi utawi ngamargiang parilaksana sarahina-rahina ring kahuripan puniki pacang ngawit katangiang rasa eling miwah pemahaman hukum krama sane sayan ngabecikang, dadosnyane utsaha ngawangun budaya hukum masyarakat prasida kapuponin," baos tokoh Puri Ubud puniki.
Kawewehin malih olih Cok Ace, manut ring Visi, Misi, miwah Program Pawangunan Bali inggih punika "Nangun Sat Kerthi Loka Bali" malarapan antuk Pola Pawangunan Semesta Berencana kaaptiang malantarang parikrama puniki hubungan tur koordinasi pantaraning Mahkamah Konstitusi Republik Indonesia sareng Pemerintah Provinsi Bali prasida kalimbakang nuju ke arah sane sayan produktif sajeroning ngawangun miwah ngukuhang budaya hukum majeng ring krama anggen muponin tatujon kahuripan krama Bali sane demokratis miwah berkeadilan nuju rahajeng tur jagadhita sakala muah niskala.
"Dumogi malaparan antuk parikrama festifal puniki prasida ngungkab wawasan miwah nincapang pengetahuan ngeninin indik Pancasila, Undang-Undang Dasar Negara Indonesia warsa 1945 miwah pengetahuan khusus indik kelembagaan konstitusi tur nincapang kemampuan berpikir kritis lan kreatif nuju nangiang generasi emas sane maderbe kualitas ring sajeroning pendidikan."
Sajabaning punika, Sekjen Mahkamah Konstitusi M. Guntur Hamzah maosang inggian ring Indonesia wenten tiga Desa Konstitusi inggih punika Desa Galesong, Kabupaten Takalar, Sulawesi Selatan; Papua; lan Desa Bangbang, Tembuku, Bangli-Bali. Guntur Hamzah nalatarang, malarapan festival Desa Konstitusi puniki dados silih sinunggil momentum sane dahating becik majeng ring iraga sareng sami anggen ngukuhang desa Bangbang puniki pinaka Desa Konstitusi.
Kawewehin malih olih Guntur Hamzah, tatujon pangukuhan utawi penetapan Desa Konstitusi pinaka upaya ngukuhang, ngemit, ngawerdiang, lan membudidayakan nilai-nilai Pancasila. Ri tepengan sane mangkin, krama Desa Bangbang katureksanin maderbe semangat lan komitmen mangda eling ngamargiang konstitusi.
Sadurungnyane, Guntur Hamzah miwah Wagub Cok Ace nyaksiang stand-stand pameran sane mamerang tur ngadol makudang-kudang jenis kerajinan UMKM ring Bangli sakadi tenun ikat (endek), keben, ajeng-ajengan, miwah sane tiosan. Tiosang malih, partisipasi sajeroning festival puniki nenten wantah saking Bangli kemanten, nanging wenten taler mawit saking kabupaten tiosan. Sajabaning acara seremonial, dudonan parikrama punika taler kadagingin antuk makudang-kudang lomba utawi pacentokan, sakadi lomba mewarnai, lomba cerdas cermat, miwah parikrama sane tiosan. (Balitopnews.com/MD/rls)
Komentar