Nyobyahang Aspirasi Krama Bali, Gubernur Koster Nyerahang RUU Provinsi Bali majeng ring DPR RI

  • 27 November 2019
  • 21:22 WITA
  • News

Balitopnews.com, Jakarta

Gubernur Bali Wayan Koster maosang aspirasi krama Bali antuk nyukserahang RUU Provinsi Bali majeng ring DPR RI, rahina Selesa (26 November 2019).

Ring acara punika, Gubernur Bali kasarengin olih Pimpinan DPRD Bali, Anggota DPR RI Dapil Bali, Anggota DPD RI Dapil Bali, Bupati/Walikota Se-Bali, miwah Ketua DPRD Kabupaten/Kota se-Bali, miwah para pimpinan lembaga inggian punika Ketua Majelis Desa Adat Provinsi Bali, Ketua Parisada Provinsi Bali, Ketua Majelis Ulama Indonesia (MUI) Bali, Ketua PW NU Bali, Ketua PW Muhammadiyah Bali, Ketua Walubi Bali, Ketua PGI Bali, miwah para Rektor Perguruan Tinggi ring Bali.

Rombongan Gubernur Bali kasanggra olih pimpinan miwah anggota Komisi II DPR RI sane ngawenangin Pemerintahan Daerah.

"Tatujon pangrauh titiang sareng sami ke DPR RI inggih punika nyobyahang aspirasi krama Bali ngeninin indik RUU Provinsi Bali," baos Gubernur Koster. Katalatarang taler inggian usulan draf RUU Provinsi Bali miwah naskah akademik sane sampun kasiagayang sueipun awarsa. "Makudang komponen krama Bali saking 2005 madrue pikahyun mangda Provinsi Bali kapayungin antuk Undang-Undang sane prasida kaanggen ngukuhang kawentenan Bali antuk kekayaan miwah keunikan adat-istiadat, tradisi, seni, budaya, miwah kearifan lokal sane sampun mabukti dados dados daya tarik masyarakat utawi wong sajebag dura nagara," teges Gubernur Koster.

Gubernur Koster maosang, sane mangkin, Provinsi Bali kawentuk antuk Undang-Undang Nomor 64 Warsa 1958 Indik Pembentukan Daerah-Daerah Tingkat I Bali, Nusa Tenggara Barat, miwah Nusa Tenggara Timur, sane kantun kadasarin antuk Undang-Undang Dasar SementaraWarsa 1950 (UUDS 1950) tur ngaranjing sajeroning wentuk Negara Republik Indonesia Serikat (RIS). Materi sajeroning Undang-Undang punika sampun nenten manut malih ring Undang-Undang Dasar Negara Republik Indonesia warsa 1945 (UUD NRI 1945) miwah Negara Kesatuan Republik Indonesia (NKRI) miwah nenten mrasidang malih mengakomodasi/nganutin ring kebutuhan panglimbak jaman sajeroning pawangunan daerah Bali.

Kategesang, pinaka proses, RUU Provinsi Bali sampun naenin kasobyahang utawi kasosialisasiang ring arepan anggota DPR RI Dapil Bali, Anggota DPD RI Dapil Bali, Pimpinan miwah Anggota DPRD Provinsi Bali, Bupati/Walikota se-Bali, Ketua Lembaga Organisasi Keumatan makasami Agama se-Bali, miwah Tokoh Masyarakat se-Bali.

"Panyobyah miwah sosialisasi terbatas sampun kalaksanayang ping kalih: duk tanggal 16 Januari 2019 magenah ring Kantor Gubernur Bali miwah tanggal 23 November 2019, magenah ring Ruang Gajah, Kediaman Gubernur Bali," baos Gubernur Koster. Sajeroning sosialisasi punika, makasami pihak dahat nukung macihna antuk lingga tangan saking Anggota DPR RI Dapil Bali, Anggota DPD RI Dapil Bali, Pimpinan DPRD Provinsi Bali, Bupati/Walikota se-Bali, lan Ketua DPRD Kabupaten/Kota se-Bali, miwah Pimpinan Lembaga Keumatan miwah umat beragama, lan Rektor Perguruan Tinggi ring Bali.

Dasar pertimbangan RUU Provinsi Bali inggih punika keharmonisan hubungan pantaraning manusa sareng Ida Sang Hyang Widhi Wasa, pantaraning sasamen manusa, miwah pantaraning manusa sareng alam lingkungannyane madasar antuk filosofi Tri Hita Karana sane mawit saking nilai-nilai kearifan lokal Bali, inggih punika 6 sumber utama nuju kasukertan lan kajagadhitan kahuripan krama Bali (Sad Kerthi) patut katitenin, kakemit, kalimbakang, tur kalestariang nyantos kapungkur. "Pawangunan Bali patut kamargiang antuk utsaha sane terpola, menyeluruh, terencana, terarah, miwah terintegrasi ring asiki satuan wilayah anggen nangiang kahuripan krama Bali sane berdaulat ring politik, berdikari ring ekonomi, miwah madue kepribadian sajeroning kebudayaan," baos Gubernur Koster ngawewehin. Dasar pertimbangan sane tiosan, inggih punika krama Bali madrue adat istiadat, tradisi, seni lan budaya, miwah kearifan lokal sane adiluhung, pinaka jati diri sane sampun mengakar ring kahuripan krama miwah dados bagian kekayaan kebudayaan nasional manut sesanti Bhineka Tunggal Ika.

Langkung ring punika, kasobyahang taler olih Gubernur Koster, pemberian otonomi sane seluas-luasnyane majeng ring daerah Bali patut ngawilangin potensi daerah ring sajeroning widang pariwisata antuk keindahan alam, kekayaan budaya, kearifan lokal, kahanan geografis miwah demografis, tur tantangan sane kaharepin sajeroning dinamika masyarakat ring tataran lokal, nasional, miwah internasional, anggen utsaha sajeroning nincapang mangda sayan gelis kapolihang kasukertan krama Bali sajeroning wadah Negara Kesatuan Republik Indonesia manut ring nilai-nilai Pancasila 1 Juni 1945.

"Pamargin pawangunan miwah pelaksanaan pemerintahan daerah Provinsi Bali salami puniki durung makasami menjamim pelestarian adat istiadat, tradisi, seni, miwah budaya, miwah kearifan lokal pinaka jati diri krama Bali tur durung prasida nolak dampak negatif utawi sane kaon majeng ring lingkungan pinaka pikolih saking ngawigunayang ruang sane nenten terkendali, lan metunyane ketimpangan perekonomian antarwilayah ring Provinsi Bali, tur nenten seimbangnyane pawangunan antarsektor dados ngawe meweh katangiang kasukertan krama Bali sane adil tur rata," baos Gubernur Koster nalatarang.

Dasar pawilangan sane tiosan inggih punika Undang-Undang Nomor 64 Warsa 1958 indik Pawentukan Daerah-Daerah Tingkat 1 Bali, Nusa Tenggara Barat, miwah Nusa Tenggara Timur nenten manut ring pakibeh utawi panglimbak ketatanegaraan miwah pakibeh politik, ekonomi, sosial-budaya, potensi daerah, miwah kemajuan teknologi, informasi, miwah komunikasi, ring sajeroning utsaha ngawentenang otonomi daerah sane madue daya saing, dadosnyane perlu kaanutang.

"Materi miwah Sistematika RUU Provinsi Bali; kawangun antuk 12 Bab miwah 39 Pasal, inggih punika: Bab I Ketentuan Umum; Bab II Asas miwah Tujuan; Bab III Posisi, Batas, miwah Haluan Pewangunan Bali; Bab V Pendekatan Pawangunan Bali; Bab VI Widang Prioritas Pawangunan Bali; Bab VII Pawangunan Bali antuk Tematik; Bab VIII Pawangunan Perekonomian miwah Industri; Bab XI Kawenangan Pemerintah Provinsi Bali; Bab X Pedoman Penyusunan Dokumen Perencanaan Pawangunan Bali; Bab XI Pendanaan; miwah Bab XII Ketentuan Penutup," baosnyane.

"Titiang mapangapti mangda Rancangan Undang-Undang Indik Provinsi Bali prasida karanjingang sajeroning Daftar Program Legislasi Nasional Prioritas warsa 2020 malarapan antuk inisiatif Komisi II DPR RI," teges Gubernur Koster sane taler pinaka mantan anggota DPR RI. (Balitopnews.com/DW/Rls).


TAGS :

Komentar