Ngaturang Boga Samatra majeng ring Pamilet Rapimnas Kadin, Gubernur Koster Negesang Komitmen Ngawan

  • 29 November 2019
  • 23:12 WITA
  • News
Gubernur Bali Wayan Koster rikala ngaturang pisuguh tur boga amatra ri tepengan acara dinner para pamilet Rapat Pimpinan Nasional Kamar Dagang dan Industri (Rapimnas Kadin) 2019

Balitopnews.com, Denpasar

Bali pinaka silih sinunggil destinasi wisata dunia sampun kaloktah indik seni, budaya, miwah alamnyane sane ngadaut pikahyunan punika makahawinan kawastanin Pulo Surga. Industri pariwisata pinaka sektor unggulan prasida terancam yening kelestarian, kemurnian, miwah nilai sane wenten ring tengahnyane sampun ical.

Duaning kadi asapunika, Pemerintah Provinsi Bali ngamargiang terobosan miwah kebijakan sajeroning nitenin Bali saking dasar malarapan visi "Nangun Sat Kerthi Loka Bali" majalaran antuk Pola Pembangunan Semesta Berencana, Nuju Bali Era Baru.

Indike puniki kasobyahang olih Gubernur Bali Wayan Koster rikala ngaturang pisuguh tur boga amatra ri tepengan acara dinner para pamilet Rapat Pimpinan Nasional Kamar Dagang dan Industri (Rapimnas Kadin) 2019 magenah ring Jayasabha, Rumah Jabatan Gubernur Bali, Denpasar duk rahina Wrahaspati (28 November 2019) wengi.

Sajeroning utsaha ngemit alam, makudang-kudang kebijakan sampun kamedalang olih Gubernur Bali. Luiripun, Peraturan Gubernur Bali Nomor 45 Warsa 2019 indik Bali Energi Bersih miwah Peraturan Gubernur Bali Nomor 48 Warsa 2019 Indik Penggunaan Kendaraan Bermotor Listrik Berbasis Baterai.

"Bali nganggen energi bersih. Kapungkur pembangkit listrik sane wenten ring Bali patut madasar antuk bahan bakar energi sane anyar utawi sane baru terbarukan. Makasami patut madasar antuk energi baru terbarukan. Targetnyane warsa 2024, pembangkit listrik ring Bali mangda sampun dados ngangge energi sane baru terbarukan. Sajabaning punika, taler sampun kakaryanin kebijakan mangda ngangge kendaraan motor listrik sane madasar antuk energi baterai. Indik puniki satmaka utsaha mangda alam Bali sayan-sayan bersih," baosnyane.

Tios ring punika, ring widang budaya, Gubernur Koster taler sampun ngaryanin kebijakan malarapan antuk Peraturan Gubernur Bali Nomor 79 Warsa 2018 Indik Rahina Ngangge Busana Adat Bali, Peraturan Gubernur Bali Nomor 80 Warsa 2018 Indik Perlindungan miwah Penggunaan Bahasa, Aksara, miwah Sastra Bali tur Indik Ngamargiang Bulan Bahasa Bali.

"Nyabran wenten parikrama nasional utawi internasional sane kalaksanayang ring Bali sanistannyane rikala acara pamungkahnyane mangda ngangge busana adat Bali. Punika makahawinan kebijakan ngangge busana adat Bali nenten wantah nincapang tur ngawerdiang rasa tresna iraga ring budaya, nanging para pegiat industri busana adat Bali prasida sayan ngalimbak tur nincap. Omzetnyane taler prasida sayan nincap sinarengan ring kebutuhan busana adat Bali," baosnyane.

Pinaka utsaha ngenalang para pamilet utawi peserta dinner ring kearifan lokal Bali, Gubernur Koster pamekas sampun nyediaang Arak Bali ring acara dinner. Arak Bali wantah inum-inuman tradisional sane sampun katamiang turun-temurun saking nguni olih krama lokal sane nenten kalah yening saihang sareng inum-inuman impor. Pemprov Bali sedeng ngarencanayang regulasi mangda inuman puniki prasida kasandingang sareng inum-inuman impor.

Ring parikrama puniki, Gubernur Koster taler ngaturang suksema antuk sampun kapilihnyane Bali dados genah ngamargiang RapimnasKadin 2019. Dane mapangapti Kadin prasida sareng ngicenin kontribusi ngawangun Bali miwah Rapimnas sane kalaksanayang prasida mamargi antar tur sidakarya.

Tios ring punika, Ketua Umum Kadin Indonesia Rosan Perkasa Roeslani sajeroning sambrama wacanannyane ngaturang pamuji sajeroning program sane sampun prasida kamargiang Pemerintah Provinsi Bali sajeroning ngemit alam miwah budaya Bali. Manutnyane, alam, seni, miwah budaya sane kadruenang Bali patut kakemit becik-becik.

"Bali puniki yan nirgamayang satmaka anak bajang sane jegeg. Sami jadmane dot rauh ka Bali. Patut kakemit adat istiadat, seni, miwah budayannyane sane sayuwakti sampun kukuh pisan. Kearifan lokal Bali taler mangda patut iraga dukung mangda sayan-sayan maderbe jati diri," baosnyane.

Ring sajeroning acara puniki, Ibu Putri Suatini Koster sane ngabih Gubernur Bali taler ngawacen asiki puisi sane ngangkat tema nasionalisme miwah rasa tresna majeng ring negara, antuk murda "Sumpah Kumbakarna" rariptan Denok Kristianti. (Balitopnews.com/DW/Rls)


TAGS :

Komentar