Nyaga Keimbangan Sekala Niskala Wagub Cok Ace Ngayah Mesolah Topeng Sidakarya ring Pura Pengastan Be

  • 03 Januari 2020
  • 21:36 WITA
  • News

Balitopnews.com, Tabanan - Sesosalahan Topeng Sidakarya sane mapaiketan sareng pemargin upacara Dewa Yadnya,  pinaka niyasa sampun sidaning karya (puput lan mapikolih). Biasannyane Topeng Sidakarya kasolahang tigang rahina risampun puncak karya,  inggih punika rikala kamargiang upacara Nyenuk.  Ring upacara puniki Topeng Sidhakarya kasolahang kangge nyapa tamiu inggih punika Para Dewata sand makta piranti upacara, sumangdene sida paripurnanyane yadnya sane keaturang.

Indike punika kacihnayang ring pemargin Karya Padudusan Agung lan Mupuk Pedagingan ring Pura Pengastan Belayu,  Desa Belayu,  Marga,  Tabanan,  ring Rahina Sukra,  (3 Januari 2020).

Ring galah puniki,  Wakil Gubernur Bali Tjokorda Oka Artha Ardhana Sukawati (Cok Ace)  ngaturang ayah masolah Topeng Sidhakarya pinaka sasolahan sane pingit,  taler pinaka niyasa angge ngusir bhutakala mangda nenten ngusak asik pemargin yadnya sane kemargiang utawi nyomya bhutakala, sakeng bhuta kasuoat menados dewa,  mangda sida mapitulung mangda pemargin yadnya sida antar.

Manut Cok. Ace,  seni wiadin adat taler manggda tetep kejaga,  mangda sida ajeg lestari,  sapisanan sida nyaga imbangnyane sekala lan niskala.

Dane ngawewehin,  manut ajaran Satra Agama Hindu pinaka swadarma ngemargiang  Panca Yadnya inggih punika: Dewa Yadnya,  Pitra Yadnya,  Manusa Yadnya,  Rsi Yadnya lan Bhuta Yadnya. Ngemargiang Panca Yadnya punika kedasarin antuk sradha wentennyane tetiga hutang sane kewasranin Tri Rna inggih punika Dewa Rna,  Rsi Rna,  lan Pitra Rna.

Karya sane nedunang makasami krama lan pengempon pura sampun ketakiang kirang langkung kalih sasih sadurungnyane.  Pinaka Pucak Karya kemargiang ritepengan Rahina Sukra Pon Kulantir punika kapuput olih Ida Pedanda sakeng Griya Gede lan Ida Pedanda Griya Kelodan Belayiu.  (Balitopnews.com.vd/rls).


TAGS :

Komentar