Adung Sareng Nangun Sat Kerthi Loka Bali, Gutbernur Koster Ngadukung Parencana Pembangunan Rendah Ka
- 15 Januari 2020
- 14:47 WITA
- News
Balitopnews.com, Denpasar - Manut sekadi visi Nangun Sat Kerthi Loka Bali majalaran Pola Pembangunan Semesta Berencana nyujur Bali Era Baru, ring pemargi jagi nangian Bali sane resik, gadang lan asri, makudang utsaha lan pemargi sampun kalaksanayang olih Pemerintah Provinsi (Pemprov) Bali. Sinalih tunggil inggih punika antuk utsaha nedunang emisi gas rumah kaca majalaran pembangunan rendah karbon.
Asapunika kabaosan olih Gubernur Bali Wayan Koster duk parikrama palinggatanganan Nota Kesepahaman olih Kementerian Perencanaan Pembangunan Nasional / Badan Perencanaan Pembangunan Nasional (Bappenas) sareng Pemerintah Provinsi Bali lan Provinsi Riau indik Perencanaan Pembangunan Rendah Karbon sane memargi ring Gedung Wiswa Sabha Utama, Kantor Gubernur Bali, Denpasar ring Anggara (14/1).
Gubernur Koster nguningan, pinaka utsaha mapikukuh dudonan parencana pembangunan ring Provinsi Bali majalaran saking integrasi program pelestarian lingkungan, program penanganan perubahan iklim lan percepatan pertumbuhan ekonomi, raris sampun kawentenang uger-uger. Inggih punika Peraturan Gubernur(Pergub) Bali Nomor 45 warsa
2019 indik Bali Energi Bersih pinaka sinalih tunggil piranti uger-uger sane nyurat pemargi lan ngetanang energi bersih ring Bali.
"Rikala ngadukung energi resik puniki, titiang nunas pembangkit listrik sane wenten ring Bali mangda ngangge bahan bakar energi bersih. Inggih punika, gas alam cair dan energi terbarukan. Tios saking punika wewangunan pemerintah, komersil, industri utamane hotel, restoran lan pakubonan patut ngangge energi bersih maduluran raab panel surya miwah wewangunan hijau. Taler ngicenin pare krama nyarengin ring kawentenan UMKM, desa adat lan Badan Usaha Milik Daerah (BUMD) mangda ngetangan energi bersih minakadi antuk newek utawi ngaromba sareng Badan Usaha Milik Nasional (BUMN) utawi swasta," baosKetua DPD PDI Perjuangan Provinsi Bali puniki.
Kabaosang taler, Pemprov Bali sampun nangian uger-uger tiosan sane makilitan antuk pikobet palemahan, inggih punika Peraturan Gubernur Bali Nomor 97 warsa 2018 indik Pembatasan Timbulan Sampah Plastik Sekali Pakai. Punika pinaka awig sane nyurat wewates ngangge sarana malakar antuk plastik sane kaangge apisan sekadi kantong plastik, polysterina (styrofoam) lan panyedotan plastik. Riantukan punika pinaka luhu plastik sane makeh nyemerin palemahan ring Bali.
"Mangda punika memargi antar sidaning don, taler sampun kamedalang awig malarapan saking Peraturan Gubernur Bali Nomor 47 warsa 2019 indik Pengelolaan Sampah Berbasis Sumber, sane mecikan pola nguni rikala ngetangan leluhu sampun makepah saking genahne kaaptiang luhu sami prasida memargi becik. Indik luhu sepatutne kapuputang nampek saking sapangrauhne lan kautsahayang mangda nenten TPA, yening prasida wantah residu pamuput kemanten sane ke TPA," tegesne.
Tios saking punika taler kemargiang Peraturan Gubernur Bali Nomor 49 warsa 2019 indik Penggunaan Kendaraan Bermotor Listrik Berbasis Baterai sane pacang ngenterang indik palinggihan sane ngangge pemanes minyak fosil antuk pemargi sane kakepah-kepah antuk nyayagayang genah-genah sane dados ngangge palinggihan ngangge listrik masarana baturai ring wewidangan-wewidangan wisata utama. Minakadi Sanur, Kuta, Ubud lan Nusa Penida.
Nenten wantah punika, rikala nangian pembangunan rendah karbon taler sampun kemargiang Peraturan Daerah Provinsi Bali Nomor 8 warsa 2019 indik Sistem Pertanian Organik sane medasar antuk eling majeng bencana sane kamedalan olih sarana kimia sintetis ring pulah palih pertanian sane sampun karasayang ngawit abad ke-21.
"Ngangsan nincapne ngangge rabuk lan ubad sintetis miwah varietas unggul ngeranayang pare pemacul nenten presida doh saking sarana punika sane ngeranayang tanahe mamerag, sarwaning tumuwuh lan palemahan ngangsan kaon," ucap dane.
Gubernur asal Desa Sembiran, Tejakula, Buleleng puniki nyobyahang sepatutne warisan nguni sane kakuhin antuk tetiga piranti utama pembangunan Bali. Inggih punika palemahan Bali, krama Bali lan budaya Bali sane katindihin pinaka sarana nincapang ekonomi gotong royong lan Trisakti Bung Karno, sane kapiletin antuk pengapti lan parilaksana krama Bali maka sami antuk ngalestariang palemahan.
"Munggwing asapunika, palinggatanganan nota kesepahaman puniki adung lan sapemargi antuk awig-awig Pemerintah Provinsi Bali indik jagra, nincapan lan mecikan
Palemahan rin Bali. Antuk punika titiang sapikayun lan sareng parikrama puniki," dane nyineb.
Tiosan malih, Menteri KPPN/Bappenas RI Suharso Monoarfa duk mapidarta nguningan pemargi pembangunan rendah karbon presida dados sinalih tunggil basis utama pembangunan. Dane nguningan, Indonesia ring galah benjangan patut ngalaksanayang pembangunan sane nenten wantah nincapang pertumbuhan ekonomi, sakemaon taler patut matetimbang lan ngentenang sane patut indik aspek daya dukung lan daya tampung sumberdaya alam lan palemahan, taler tingkat emisi gas rumah kaca.
"Kalestarian sumberdaya alam lan palemahan dahat mabuat pisan majeng pembangunan. Titiang sampun ngelaca-laca daya dukung lan daya tampung palemahan sane nenten kalestariang ring panemanne pacang dados sinalih tunggil pikobet pertumbuhan ekonomi Indonesia sane pacang nibenin majeng pemargi pembangunan iraga," baosne.
Rauh taler ring galah punika Gubernur Riau Syamsuar, Pimpinan OPD ring wewidangan Pemprov Bali. (Balitopnews.com/Ngr/rls)
Komentar