Media Berita Online Bali Terkini, Kabar Terbaru Bali - Beritabali.com

Nyagiang Toya Seger Mautama Gubernur Koster Ngutsahayang Wenten Awig Ngalestariang Kalebusan

  • 15 Januari 2020
  • 17:28 WITA

Balitopnews.com, Denpasar - Gubernur Bali Wayan Koster mewali negesan indik sutindih dane ngalestariang kalebusan utawi sumber-sumber toya sane wenten ring Bali. Santukan indik punika adung sareng visi Nangun Sat Kerthi Loka Bali sane matetujon  nyaga lan ngalestariang palemahan  Bali sedaging nyane.

Pinaka pamungkah, ring galah mangkin dane nedeng gupuh ngaryanin awig sane nyurat indik ngalestariang toya, tukad, danu lan segara ring Bali. Antuk pemargi punika kaaptiang  sumber toya sane wenten ring Pulo Dewata pacang lestari.

Asapunika kabaosang daweg Gubernur Koster nampa sapangrauh Ikatan Alumni SMA Negeri 1 Singaraja (Ikamsa), ring Kantor Gubernur Bali, Denpasar ring rahina Buda (15 Januari 2020)

“Titiang pacang nyobyahang indik puniki majalaran antuk parikrama lan parilaksana sumeken sane kapiletin krama sami kantos presida  nincapang rase eling semeton Baline antuk dahat mabuatne kalebusan utawi sumber-sumber toya ring Bali,” tutur nyane.

Utsaha puniki manut sekadi Gubernur Koster, tios saking tetujon inucap taler matetujon nyagian toya resik sane seger lan mautama majeng ring krama Baline.

“Meled manah titiang ngalestariang lan mewali nangian kalebusan, danu lan tukad-tukad ring Bali, mangda ngerauhang toya sane resik, mautama lan seger majeng kramane," dane ngawewehin.

Munggwing asapunika, Koster sane taler tamatan SMAN 1 Singaraja puniki ngemanah ngiring pare alumni SMA sane paling jada ring Bali-Nusra sane pacang ngalaksanayang reuni punika mangda sareng ring pulah palih  ngemargiang program-program Pemerintah Provinsi (Pemprov) Bali utamane ring wewidangan palemahan.

“Maduluran parilaksana sane janten lan seken taler manut sareng pengaptin i krama, dadosne nenten wantah kapiletin pare alumni, sakemaon taler  kapiletin makeh krama," baos Gubernur sane embas ring Sembiran, Kabupaten Buleleng puniki.

“Contone, antuk ngemargiang program tukad sane resik, taler ulu kantos teben ring pesisi segara lan kawigunane   sujati karasayang. Antuk pemargi punika, presida nangian piranti Wana Kertih, Danu kertih lan Segara Kertih," dane ngawewehin.

Tiosan raris, Manggala Ikatan Alumni SMAN 1 Singaraja (Ikamasa) Prof. I Gede Pitana nguningan reuni lintas generasi punika  karencanayang pacang kemargiang ring madyaning sasih November 2020 puniki. Parikrama punika kaaptiang dados pemargi sane mabuat nyobyahang mewali pulah palih lan parilaksana sekolah sane sampun makeh ngembasan  tokoh Bali lan nasional.

“Pastika sampun acara punika pacang kaadungan sareng program-program Pemprov (Bali, red). Santukan iraga makasami taler meled manah jagi sutindih ngemargiang program inucap,” baosne.

Tokoh pariwisata nasional puniki negesang, ring dudonan reuni sane pacang malelampahan ‘Reuni Agung’ punika taler pacang kadagingin makudang-kudang acare sekadi kegiatan sosial, nanem taru pohon, balih-balihan kantos ngaturang  penghargaan majeng tokoh-tokoh sane sutindih bhakti lan urati majeng Bali lan utamane majeng almamater. (Balitopnews.com/ngr/rls)

Komentar