Wagub Cok Ace : Forum Tentra Helix Nenten Wantah Serimonial Kemanten, Sepatutne Prasida Ngerauhang K
- 17 Januari 2020
- 22:01 WITA
- News
Balitopnews.com, Badung - Wakil Gubernur Bali Tjokorda Oka Artha Ardhana Sukawati, nyanggra becik parikrama Forum Paruman Tetra Helix sane kalaksanayan olih Politeknik Negeri Bali pinaka sinalih tunggil pemargi strategis ngadungan pembangunan Bali. Utamane ring wewangian pariwisata pinaka leading sector, antuk stakeholder kunci, inggih punika Pemerintah, Industri, Akademisi, lan Komunitas.
Sakemaon Wagub Cok Ace ngaptiang forum puniki nenten dados serimonial kemanten, nanging presida ngerauhan kontribusi sumeken rikala nincapan sumber daya manusia ring Bali. Asapunika kasobyahan Wagub Cok Ace duk mungkah acare "Industrial Gathering lan Tetra Helix Forum" antuk lelampahan Pengembangan, peluang, dan Tantangan SDM Unggul di Era Milenial Berbasis Pariwisata Hijau (Green Tourism) ring Kampus Politeknik Negeri Bali, Jimbaran-Badung, ring Sukra (17 Januari 2020) .
Wagub Cok Ace maosan, Pariwisata Bali ngangsan nincap. Ring pemargi jaman disrupsi puniki, pariwisata Bali kasanggra pikobet anyar. Nincapne teknologi lan informasi raris ngeranayang tren pariwisata ngangsan nincap dados experience-based tourism lan ngangsan kasenengin olih tamiu wimuda. Cok Ace taler nganikayang, sesaih industri pariwisata taler ngangsan semakin ketat, santukan pamilet utsaha mangda presida nganggen teknologi lan informasi yening meled dados paling becik saking sane tiosan. Adapunika taler antuk sumber daya manusia Bali sane ngangsan nincap lan ngaluwihan mangda katampi ring industri pariwisata ring galahe mangkin.
“Munggwing asapunika, SDM patut katincapan santukan dados piranti sane patut kauratian olih iraga sami," baos Wagub Cok Ace sane wau-wau niki kajodi pinaka sinalih tunggil Guru Besar ring Kampus ISI Denpasar.
Tiosan malih Wagub Cok Ace nguningan, pengembangan green tourism ring Bali patut kasarengin antuk pengapti makasami. Kapertama saking pemerintah, mangda polih ngawewehin ajegne awig sane adung sareng pembangunan SDM unggul lan nincapan infrastruktur penunjang industri pariwisata, taler maduluran antuk piranti-piranti awig lan perarem. Kaping kalih ring sisi Industri, mangda polih nyikian potensi- potensi sane kadruwenan Bali lan ngerauhan kawigunan marupa kawikan, p pengalaman praktis, pengaplikasian teknologi rikala jagi nincapan industri pariwisata sane efektif lan efiisien. Kaping tiga ring sisi Akademisi utawi institusi pendidikan, mangda presida ngerauhan pikolih saking studi lan penelitian tepat guna sane presida kaaplikasian ring pembangunan, utamane nincapan pariwisata.
Tios saking punika, institusi pendidikan taler pinaka kunci rikala nincapan kualitas SDM sane unggul lan makarakter budaya. Lan kaping empat ring sisi Komunitas, prasida ngicenin pemargi majeng awig utawi pemargi aplikatif saking pikobet-pikobet sane ngalimbak serahina, utamane ngicen feedback majeng pemerintah lan tiosan
“Ageng pengaptin titiang maka papat sane kaodar i wawu presida saling kedet manut sekadi konsep Tetra Helix lan dumogi parum puniki dados tanjek becik rikala ngewangun sinergisitas pembangunan Bali saking pemerintah, industri, akademisi lan komunitas lokal”, dane nyineb.
Tiosan raris, Plt. Direktur Jendral Pendidikan Vokasi Kementerian Pendidikan lan Kebudayaan RI Dr. Ir. Patdono Suwignjo ngerauhan pamuji antuk acare lan porum sane kamargiang olih Politeknik Negeri Bali puniki. Dane negesan, instruksi Presiden RI mangkin inggih punika nincapan program utawi awig sane ngicenin pikolih sumeken majeng krama utamane rikala nincapan SDM.
Munggwing asapunika, Kemendikbud sampun ngelaca-laca program sinalih tunggilne indik pendidikan vokasi sekadi Politeknik sane ngelaksanayang pelatihan-pelatihan nenten wantah majeng pare dosen sakemaon taler majeng direktur, mahasiswa miwah benjangan 50% dosen sane wenten ring politeknik pinaka praktisi. Dadosne daging ajah-ajah majeng mahasiswa manut sekadi sane karuruh olih genah pekaryan. Tiosan malih Kementrian ngaptiang dunia industri mangda ngangsan urati ngeranjing lan ngewantu perguruan tinggi ngicenin ajah-ajah majeng mahasiswa.
“Benjang titiang jagi ngutamayang program bring industry to campus lan mangda antar indik punika titiang taler pacang ngawentenan dewan vokasi sane pacang ngangidentifikasi program sami sane wenten ring PT vokasi ring wewidangan Indonesia”, baosne.
Dane raris ngaptiang indik punika presida kemargiang olih perguruan tinggi vokasi ring Indonesia, mangdane cita-cita rikala ngewangun SDM luwih presida kemargiang.
Ring acare sane karauhin olih 400 oleman punika, taler karauhin olih Direktur Politeknik Negeri Bali pinaka tuan rumah lan taler karauhin olih pare juru raos sane wikan ring wewidanganne antuk tetujon ngalaksanayang rarembugan interaktif indik SDM ring lapangan. (Balitopnews.com/ngr/rls)
Komentar