Ny Putri Koster: Ngiring Saking Alit Sayagayang I Anak Mangda Madue Bikas Mandiri lan Andel
- 18 Januari 2020
- 19:06 WITA
- News
Balitopnews.com, Denpasar - Anak pinaka sentana sane pacang mimpin bangsa benjang pungkur, patut madue bikas mandiri lan andel. Maka kalih bikas puniki sepatutne kasagayang saking alit.
"Bikas punika patut kawangun becik, sinalih tunggil antuk ngemakehin pengalaman, inggih punika pengalaman organisasi ring tingkat sekolah utawi ring pekraman. Antuk punika pacang mentik sentana sane wikan, mautama, madue daya saing lan nenten manying," asapunika bawos Ketua TP PKK Provinsi Bali Ny Putri Koster ring pidartane duk mungkah acare "Bali Childrity Festival 2020" sane kalaksanayang olih Forum Anak Daerah, ring Wantilan Kertasabha, Rumah Jabatan Gubernur Bali, Saniscara (18/1).
Ny Putri Koster sane kaabih olih Tjok Istri Ny Cokorda Putri Hariyani Ardhana Sukawati pinaka Ketua Umum Badan Kerja Sama Organisasi Wanita (BKOW) Provinsi Bali, daweg punika ngaptiang mangda antuk pemargi parikrama puniki, setios ngebuhang bikas mandiri majeng yowanane taler pacang nincapang manah gelitik lan rungu majeng wewidanganne.
"Serahina punika wantah genah nunas ajah. Acare puniki janten wantah kalaksanayang olih alit-alit, deriki ipun nunas ajah, ngerereh pengalaman, melajah indik kepemimpinan. Antuk parikrama sekadi puniki titiang ngaptian mangda mentik sentana sane utama, wikan lan medue pengalaman," baos anak istri sane kaloktah pinaka seniman makeh kawikan puniki.
Selanturne Ny Putri Koster nangiang krama sami mangda ngadukung parikrama becik sane kamargian olih alit-alit mangda raris ngangsan rumeket sang rupaka lan wewidanganne. "Maduluran antuk parikrama becik puniki, iraga taler presida ngedohan alit-alite saking baya sane ngintip ipun sekadi pergaulan bebas, narkoba kantos pelecehan seksual.
Acare sekadi puniki kacingak alit lan ingan, sakemaon wigunane ageng pisan majeng alit-alite. Antuk acare sane luwih lan becik sekadi puniki, iraga pacang madue sentana andel nyanggra galah benjang," tegesne.
Bali Childrity Festival 2020 puniki malelampahan "Melangkah Bersama Berbagi Sesama" matetujon ngareketan lan nangiang manah rungu alit-alite, utamane ring alit-alit sane berkebutuhan khusus. Acare punika taler karauhin olih Ketua Gatriwara Provinsi Bali Ningsih Wiryatama, Kepala OPD ring wewengkon Pemprov Bali, krama Dharma Wanita, organisasi wanita miwah krama forum anak daerah. Acare puniki taler kadagingin antuk gagendingan lan sasolahan, pameran UMKM miwah wacakan puisi sane dahat ngulangunin olih Ny Putri Koster. (Balitopnews.com/ngr/rls)
Komentar