Macecingak Genah Tes CPNS, Sekda Dewa Indra Tan Kayun Wenten Daya
- 25 Januari 2020
- 00:00 WITA
- News
Balitopnews.com, Denpasar - Sekretaris Daerah Provinsi Bali Dewa Made Indra macecingak genah Tes Kompetensi Dasar (TKD) CPNS antuk sistem CAT (Computer Assisted Test) sane pacang kalaksanayang ring Badan Pengembangan Sumber Daya Manusia (BPSDM) Provinsi Bali, margi Hayam Wuruk 152 Denpasar. Macecingak ring rahina Saniscara (25 Januari 2020) numpel Tumpek Wariga puniki matetujon nyantenan kawentenan sarana lan prasarana mangda tes CPNS punika memargi antar.
Sekda Dewa Indra sane kapangguh ring parikrama punika maosan meled manah dane mangda pulah palih tes memargi becik, inang, transparan lan akuntabel. Munggwing asapunika dane ngelingin jajarane sami sane dados manggala mastikayang sarana pendukung sami memargi becik. “Makasami mangda katureksa lan kejantenan memargi becik, ngawit saking genah, komputer, jaringan, genah melinggih kantos pendingin genah tes. Meled manah titiang mangda nenten kapiambeng teknis sane ngulgul konsentrasi pare pamilet mangda dane prasida nyihnayang sane uningine,” baosne.
Nenten wantah genah pamilet sane inang, pare manggala taler nyayagayang genah nyantos sane becik majeng guru rupaka utawi semeton pamilet CPNS. Ring genah nyantos punika, dane presida nyingakin pikolih tes putra, putri utawi semetonne. “Titiang taler nyayagayang petugas kesehatan, parkir lan kantin sane jimbar,” dane ngawewehin.
Dewa Indra ngaptiang, kawentenan sarana lan prasarana sane kasagayang sampun becik lan presida doh saking pakrimik pamilet tes.
Tiosan malih dane taler nguningan satya Pemprov Bali ring parindikan ngewangun rekrutmen CPNS sane bersih lan transparan. Antuk punika, dane nyantenan pemargi tes nenten kantos wenten joki santukan manggala ngemargian sistem panureksa identitas sane makepah-kepah lan kaabih unsur aparat keamanan lan penegak hukum. “Sami pacang katureksa, ngawit saking peneng lan prerai pare pamilet. Titiang taler pacang ngolemin Komisi I DPRD Bali, Kejaksaan, Polda Bali, BPKP, Ombudsman lan Inspektorat mangda ngabih pulah palih seleksi,” ucap dane.
Pulah palih seleksi sane pacang kemargian maduluran sistem asapunika kaaptiang pacang ngembasan SDM mautama sane ngemargiang mesin birokrasi. “Yening pulah palih rekrutmen sampun sekadi puniki, pastika benjangan nenten wenten PNS sane gaptek,” teges dane.
Ngawewehin sane kaodar Sekda Dewa Indra, Kepala BKD Ketut Lihadnyana nyobyahan indik CAT penampa CPNS Pemprov Bali wau kapertama kalaksanayang ringBPSDM. “Sedurungne sampun ngangge CAT, sakemaon laksanayang ring Gedung BKN,” baosne.
Lihadnyana nyobyahan, pamilet tes CPNS puniki makeh nyane 36.193 diri sane pacang mesaing jagi nagingin kekirangan PNS ring Provinsi dan Kabupaten/Kota se-Bali. “Ring Provinsi Bali, sane ngelamar 13 tali lintang, lan formasi sane wenten 676. Makehan tenaga teknis sane karereh mangda ngedukung program prioritas bapak gubernur,” asapunika dane matur.
Ring pemargi tes puniki, pamilet pacang kakepah ring makudang-kudang genah antuk apalet sane kasarengi olih 400 pamilet. Serahina, pacang kalaksanayang limang palet tes dadosne makasami makeh nyane 2.000 pamilet. TKD CPNS pacang kakawitin ring rahina Anggara (28/1/2020) sane pacang kakawitin antuk pelamar ring Pemprov. “Santukan pelamar makehne13 tali lintang, tes sane Pemprov Bali pacang memargi 7 rahina. Selanturne pamilet sane ngelamar ring CPNS Kabupaten/Kota. Dadosne niki pacang nelasang galah 21 dina,” ucap Lihadnyana raris ngaptiang Pemerintah Kabupaten/Kota lan DPRDne sareng ngabih pulah palih seleksi puniki.
Pateh sekadi sane kaodar Sekda Dewa Indra, Lihadnyana nyantenan pulah palih seleksi CPNS pacang nenten wenten joki. “Yening purun pacang kaejuk olih aparat. Titiang sampun nyayagayang pulah palih sane makepah kepah lan pamilet sami makta peneng sane barcodene pade malianan,” dane ngawewehin.
Daweg macecingak punika taler karauhin Kadis Komunikasi, Informatika lan Statistik (Kominfos) Gede Pramana, Kepala Badan Pengembangan Sumber Daya Manusia (BPSDM) I Gede Darmawa, Kasatpol PP Provinsi Bali Dewa Nyoman Rai Darmadi miwah sane ngewalinin OPD inucap. (Balitopnews.com/mgr/rls)
Komentar