Gubernur Bali Wayan Koster Ngerauhin Karya Melaspas Bumi Sudha lan Mecaru Genah Melasti Desa Adat Pedungan
- 23 Februari 2020
- 03:02 WITA
- News
Balitopnews.com, DENPASAR - Gubernur Bali Wayan Koster ngerauhin Karya Mendem Pedagingan lan Lingga Tangan Prasasti ring Karya Melaspas Bumi Sudha lan Mecaru Genah Melasti Desa Adat Pedungan, Denpasar ring rahina Redite (23 Februari 2020).
Taler rauh ring acare punika Wakil Walikota Denpasar IGN Jaya Negara, Dirut Pelindo III Doso Agun, Bendesa Desa Adat Pedungan, tokoh krama lan krama Desa Adat Pedungan.
Ring galah punika Gubernur Koster maosan genah melasti puniki pinaka genah masejarah sane sampun katindihin sareng-sareng."Ngewangun genah melasti puniki taler pinaka cihna ngelaksanayang visi Nangun Sat kerthi Loka Bali, ngalestarian kesucian lan kasukerthan alam Bali, kalanduhan krama Bali sekala lan niskala. Munggwing asapunika makasami pembangunan ring Bali sepatutne adung sareng palemahan, manusa lan budaya,” ucap Gubernur Koster.
Dane negesan, yening indik niskalane sampun kemargian, pacang ngicen pemargi becik majeng pembangunan sekala miwah presida ngicen kawigunan majeng krama. “Genah melasti puniki pinaka sinalih tunggil pahan saking pelabuhan Benoa sane katincapan antuk gegambaran. Maiguman sareng dirut lan jajaran direksi Pelindo III mangda kawangun antuk maintegrasi lan maukudan dados weweidangan sane makelas gumi. Manut sekadi iraga aptian sareng sami kaduwena olih Bali, raris kawentenanne presida ngedukung pemargi kepariwisataan apisanan taler ngedukung pembangunan infrastruktur nasional,” teges Gubernur Koster.
Raris indik gegambaran, Gubernur Koster negesan sampun ngemargian pah-pahanne, taler mirengan pikayun saking krama desa adat Pedungan lan kemargian antuk pembangunan genah upacara lan genah melasti puniki.
“Titiang ngerauhin rikala nyurat konsep lan gegambaran indik nincapan wewidangan Benoa puniki sane kasarengin olih sulinggih, arsitek-arsitek Bali, pakar pertanian kantos dados pelabuhan sane ngunggahan nilai filosofi kearifan lokal Bali miwah ngutamayang arsitektur Bali,” Gubernur Koster ngawewehin. Kabaosan taler, pembangunan puniki pinaka pemargi adung sareng Dirut Pelindo III lan Menteri BUMN. "Titiang dahat mautsaha mangda bapak-bapak inucap ledang lan astungkara (genah melasti, red) presida kawangun ring tanah sane majimbar 1 hektar,” teges Gubernur Koster.
Genah melasti puniki kauleng puput ring penyineb sasih Februari sedurung Nyepi lan benjangan presida malih kabecikan, fasilitas lan sarana sane ngdukung mangda presida adung sareng parencana alas kota lan sarana tiosan. Mangda presida dados wewidangan sane becik. Pungkuran Pelabuhan Benoa pacang dados pelabuhan ngulangunin ring jagate. Sampun kasobyahan ring ajeng komisi 6 DPR RI lan makasami nyumbungan. Taler kasaksi olih Menteri BUMN, Menteri Agraria lan Menteri Pariwisata. Wantah asiki ring Indonesia pelabuhan ngulangunin sekadi puniki.
Pembangunan ring pelabuhan Benoa kasaratan anggen ngedukung kepariwisataan ring Bali, pinaka pah-pahan saking pembangunan infrastruktur darat-laut-udara sane makilitan. "Munggwing asapunika parencana pembangunan saking pusat sepatutne adung sareng visi lan misi iraga ring Bali mangda adung sareng palemahan lan kramane. Astungkara presida memargi becik," teges Gubernur Koster. Pelabuhan Benoa pacang kadukung genah stand pengrajin lan UMKM krama miwah kajangkepin alas kota lan kauleng pembangunanne puput ring warsa 2023. "Ngiring sareng-sareng ngedukung nganincapan pelabuhan Benoa mangda puput ring galah sane kaapti. Puniki angge iraga sinarengan, mangda pembangunan pemerintah pusat presida ngerauhan kawigunan,” baos Gubernur Koster lan ngawewehin genah puniki taler ‘maurip’ antuk parikrama kesenian lan parikrama tiosan, napi malih presida memargi nyabran rahina.
Tiosan raris Dirut Pelindo III, Doso Agung maosan dane sutindih ngedukung pembangunan sane ngalestarian adat lan budaya. “Yening sami gubernur presida sekadi Bapak Gubernur Bali titiang ngemanah pikobet sami ring krama gelis kapuputan,” ucap dane. Kategesan, pelabuhan Benoa sane katincapan nenten wantah manut sekadi nincapne jaman lan teknologi, sakemaon taler adung ring palemahan lan maciri khas budaya Bali."Indik punika manut sareng visi Bapak Gubernur Nangun Sat Kerthi Loka Bali lan iraga patut sutindih ngemargiang visi punika," teges dane. Dane ngaptian fasilitas sane wenten presida kapiara becik presida nincapan srada bhakti rikala mayadnya. (Balitopnewscom/md/rls)
Komentar