Ny. Putri Koster : Pramuka Bali Mangda Presida Dados Tetulad Majeng Pramuka ring Nusantara
- 23 Februari 2020
- 05:02 WITA
- News
Balitopnews.com, DENPASAR – Ketua Dewan Kehormatan Kwartir Daerah Gerakan Pramuka Bali Ny. Putri Suastini Koster ngaptian Pramuka Bali mangda ngangsan nincap lan presida dados tetulad majeng Pramuka ring Nusantara.
Pengapti punika kabaosan Ny. Putri Suastini Koster duk ngerauhin upacara Mecaru Rsi Gana, Mendem Pedagingan an Melaspas miwah pangubhaktian ring Gedung Pramuka Kwarda Bali ring Denpasar, Minggu (23 Februari 2020).
“Pramuka Bali mangda ngangsan nincap lan dados tatulad majeng Pramuka tiosan ring Nusantara antuk ajeg nyarengin tetincap teknologi mangda nenten kakutang zaman. Titiang ngejantenan benjang pungkur Bali presida dados tuan rumah Jambore Nasional,” pengaptinne.
Ny. Putri Suastini Koster sane ring galah punika nyarengin makasami dudonan upacara punika maosan upacara punika setios kalaksanayang pelantikan pengurus anyar taler kaapti presida ngadungan Bhuwana Agung lan Bhuwana Alit kantos kepangguh kasukerthan rikala ngemargian roda organisasi. Sapunapi sane kemargian ring organisasi punika presida dados yadnya sane mawiguna majeng kauripan manusa jagat puniki. Dane taler nangian pare manggala Kwarda Bali mangda ngicen tatulad ring alit-alit sane pinaka generasi muda harapan bangsa santukan Pramuka ngembasan alit-alit sane pacang dados pemimpin bangsa sane teguh, subhakti lan satya.
“Pramuka Bali mangda setata ngabdi maduluran parikrama-parikrama lan program sane nguleng tetujon lan saje,” baosne.
Tiosan raris, Ketua Kwarda Bali I Made Rentin ngawewehin Gerakan Pramuka ring Bali presida ngeranjing ke makasami wewidangan. Dane nyobyahan pabesen majeng manggala utawi krama Pramuka mangda ngelaksanayang swadharma antuk lascarya. Dane taler nguningan pacang wenten makeh parikrama sane kelaksanayang ring warsa 2020 puniki. Munggwing asapunika gotong royong lan masikian mangda teguh kemargian.
Antuk pemargi upacara puniki, Kakwarda Bali sane taler pinaka Kepala Pelaksana BPBD Provinsi Bal puniki ngaturang suksema lan pengargan luwih santukan Kantor Kwarda Bali puniki pinaka pakubon makasami dadosne patut kapiara lan kalestarian sinarengan.
"Titiang ngaptian Pramuka Bali presida dados tatulad majeng pramuka-pramuka ring jagat Nusantara,” baosne. Ring acare punika, Putri Koster sareng pare manggala Kwarda Bali taler nyarengin pewintenan pinaka prejuru anyar sane wau kalantik ring pinanggal 27 Januari 2020 lintang. (Balitopnews.com/md/rls)
Komentar