Persentase Kenak Pinih Becik ring Nasional & Internasional, Gubernur Koster Nyumbungan lan Ngicen Insentif Tenaga Medis
- 10 Mei 2020
- 17:05 WITA
- News
DENPASAR, Balitopnews.com- Melarapan antuk strategi lan makudang-kudang awig nambakin gering Covid-19 sane kamedalang Gubernur Bali Wayan Koster mabukti presida ngirangin angka kematian lan becikne persentase sane kenak ring Bali.
Gubernur Koster pinaka Ketua Gugus Tugas Percepatan Penanganan Covid-19 Provinsi Bali ngangken indik puniki santukan kagupuhan lan reket pasikian, utamane saking tenaga medis pinaka garda pinih ajeng nambakin Covid-19 ring Bali.
Asapunika kamunggahang duk Gubernur Koster kaabih Ketua Harian Gustu Covid-19 Provinsi Bali (Sekda Provinsi Bali) Dewa Made Indra ngemargiang parum teleconference sareng pare tenaga medis sewewidangan Bali saking Jaya Sabha, Denpasar, Saniscara (9/5).
Tiosan polih sesaduan indik kawentenan Covid-19 saking pare pemilet saking Dinas Kesehatan, Rumah Sakit, Laboratorium, Puskesmas lan genah ngekeb, Gubernur Koster taler nampa pitaken saking pare pemilet sane saking kirang langkung 40 genah ngawit saking Jembrana kantos Karangasem ngamongin Covid-19 ring Bali ngangsan becik.
Gubernur Bali nyymbungan pare tenaga medis ring Provinsi Bali pinaka garda pinih ajeng dadosne Bali kaucap provinsi pinih becik ngamongin kawentenan Covid-19. Indik puniki kacihnayang antuk tegehne pasien Covid-19 di Bali sane presida kenak.
"Kantos mangkin, sane presida kenak 65 persen utawi 195 diri. Sane seda wenten petang diri utawi 1,31 persen saking makeh sami pasien positif tigang atus diri,” baosne.
Angka-angka puniki doh becikan saking angka nasional lan internasional. Ring nasional sane kenak 19,2 persen lan padem 7,19 persen. Ring internasional sane kenak 33,41 persen lan padem 6,99 persen.
Gubernur saking Buleleng puniki ngawewehin, suwen nambanin pasien Covid-19 ring Bali taler kaucap gelis. Inggih punika kirang langkung telulas dina.
"Sane pinih gelis tigang rahina lan pinih suwean 39 rahina. Wenten asiki sane suwe durung kenak lan sampun kemargiang upanaya mangda presida gelis kenak," ucap dane
Manut Gubernur, angka-angka puniki nyihnayang pemargi sane kaambil Pemerintah Provinsi Bali antuk kawentenan Covid-19 kaucap becik. Semalihne pinih becik ring sewewidangan Indonesia.
“Puniki pinaka penilaian pemerintah pusat lan juga Gugus Tugas nasional sane kauningan majeng titiang pinaka Ketua Gugus Tugas Provinsi Bali,” baos Ketua DPD PDIP Provinsi Bali puniki.
Dane ngawewehin, tenaga medis dahat mabuat pisan antuk kawentenan puniki. Tiosan sampun gupuh, tenaga medis taler kaucap dahat baya lan elah kalalahin. Ring Bali, limang diri tenaga medis sampun polih kalalahin lan tigang diri sampun kenak.
"Angka puniki kaucap kedik lan titiang ngaptiang nenten malih sane kalalahin," dane negesan.
Manut dane, Gugus Tugas Provinsi Bali dahat rungu antuk kawentenan sarana pare tenaga medis saking kawentenan Covid-19.
"Pemerintah Provinsi Bali lan wantuan pemerintah pusat sampun nyadyayang sarana dane kaangge olih tenaga medis minakadi sarana nyengker dewek taler nyadiayang hotel lan transportasi,” baosne.
Pare tenaga medis nyumbungan pemargi-pemargi sane sampun kalaksanayang Gugus Tugas Percepatan Penanganan Covid-19 Provinsi Bali. dr. Arya Putra saking Puskesmas Selemadeg Barat maosan, pemargi-pemargi saking Gugus Tugas Provinsi Bali sampun becik. Ngurah Kusuma, tenaga medis ring RSUD Klungkung maosan pemargi ngekeb terpusat majeng PMI sampun patut antuk tetujon ngirangin pengelimbak COVID-19 ring Bali.
“Karantina terpusat presida ngirangin angka kematian sangkaning Covid,” ucap dane.
Dane taler nyanggra becik kawentenan paweweh Lab panureksan PCR ring Bali. Indik sane pateh taler kabaosan olih makeh tenaga medis ring Bali.
Tenaga medis RS PTN UNUD dr. Cok Wahyu, SpPD nyumbungan antuk sokongan Pemprov Bali majeng tenaga kesehatan.
"Pinaka sinalih tunggil pusat rujukan Covid ring Bali titiang nhumbungan wantuan saking Pemda Bali, minakadi punika relawan, APD, sarana lan piranti-piranti sane kaicen majeng nakes sekadi genah mesare lan tiosan," ucap dane.
Manut dane saking pinanggal 7 April 2020, RS PTN UNUD sampun nampa 123 pasien Covid-19 antuk sane positif makeh nyane 85 diri. Dane raris ngawewehin, ngawit sasih Mei puniki pasien positif di RS PTN UNUD nedunan penurunan antuk paweweh wantah das pasien.
Tenaga-tenaga medis ngaptiang insentif majeng tenaga non medis sekadi sopir lan tenaga kebersihan mangda karunguan. Antuk kawentenan puniki, Gubernur Koster ngemastikayang indik insentif pacang kaicen majeng tenaga medis miwah non medis sane sareng ngamongin kawemtenan Covid-19.
Insentif majeng tenaga medis sampun kasurat ring Permenkes lan wantah nagingin syarat administrasine. Raris majeng tenaga non medis, Gubernur maosang sampun masemaya ngicen insentif lan tata titine gelis pacang kabligbagin sareng Bupati/ Walikota se-Bali.
"Titiang pacang parum sareng Bupati/Walikota ring rahina Soma. Majeng kabupaten/kota sane anggaranne nenten wenten pacang kaamongin olih Provinsi,” ucap dane.
Nyineb peparuman, Gubernur Koster mewali negesan nyumbungan kagupuhan lan kauratian tenaga medis nambakin Covid 19 ring Bali.
"Sakemaon perjuangan durung puput. Santukan kantos rahina mangkin kantun wenten paweweh pasien positif COVID-19 yadiastun nedunan," teges dane.
Munggwing asapunika, dane nangian pare tenaga medis mangda ngemargiang swadharma kemanusan puniki sebecikne lan ngaptiang gering puniki gelis kasineb.
"Puniki janten pinaka laksana luwih manut ring budaya lokal lan agama, inggih punika parilaksana becik sane metu saking manah lascarya pacang mawiguna lan ngerauhang bagia majeng angga, kulawarga, krama, bangsa lan negara,” sineb dane. (Md/rsl)
Komentar