Gubernur Koster Nyukserahang Wantuan Majeng Krama Desa Bondalem Disampun Ngekeb Desa
- 10 Mei 2020
- 22:05 WITA
- News
BULELENG, Balitopnews.com - Gubernur Bali Wayan Koster, Redite (10/5) nyukserahang wantuan pinaka pemarhi nambakin Covid-19 ring Provinsi Bali. Dane sane kaabih Ketua Harian Gugus Tugas Percepatan Penanganan Covid-19 Provinsi Bali Dewa Made Indra, nyukserahang antuk simbolis majeng krama Desa Bondalem, Tejakula, Buleleng sane kantun ngekeb desa disampu wenten pasien transmisi lokal.
Wantuan sane kautserahang Gubernur Koster ring Posko Terpadu Penanganan COVID-19 Kantor Perbekel Desa Bondalem puniki pinaka wantuan CSR Bank Negara Indonesia (BNI) makehne 1.500 paket sembako sane madaging beras 5 kg, minyak goreng 1 liter, gendis 1 kg lan adeng 10 bungkul. Raris Gugus Tugas Percepatan Penanganan Covid-19 Provinsi Bali nyukserahang 400 paket sembako medaging beras 5 kg, minyak goreng 2 liter, mie instan 2 paket miwah 5.000 masker.
Gubernur Koster ngicen kauratian majeng Desa Bondalem santukan wenten transmisi lokal Covid-19. Munggwing asapunika dane ngaptiang krama Desa Bondalem presida urati nyarengin pituduh pemerintah mangda pengelimbak virus puniki nenten ngakehan.
Gubernur Koster nitahang Bupati Buleleng Putu Agus Suradnyana mangda ngicen kauratian majeng Desa Bondalem. Gubernur Koster nguningan induk kasus penularan transmisi lokal ring Desa Bondalem puniki santukan saking krama sane kalalahin Covid-19. Virus puniki gelis ngelalah. Yening ngelalah ke dura desa Bondalem, pacang ngerauhang byuta. Munggwing asapunika Gubernur saking Desa Sembiran, Tejakula, Buleleng puniki ngentenin kramane mangda ngangge masker, ngewajik tangan, lan meneng ring pakubonan sekantun ngekeb miwah nyarengin protokol kesehatan.
“Deriki transmisi lokalne makeh, dadosne titiang nureksa mangda nenten ngangsan jimbar ngelalah. Kramane mangda urati ngelaksanayang instruksi pemerintah. Titiang nenten kayun kasus puniki ngelalah ke desa tiosan, munggwing asapunika bupati katunasin mangda nenten enduk nambakin Virus Corona puniki,” baosne
Manut Koster, amongan antuk kawentenan Covid-19 ring Bali sampun becik. Mabukti 65% pasien positif sampun kenak lan puniki pinaka persentase pinih becik ring Indonesia. Semalihne ring persentase nasional kemanten 16% sane kasurat kenak, raris ring jagate persentase sane kenak 3%. Dadosne amongan Covid-19 ring Bali sampun becik lan kawentenan puniki santukan kauratian tim medis miwah kramane sane urati ngarengin sane kasobyahang olih pemerintah.
Tiosan raris Bupati Buleleng Putu Agus Suradnyana nguningan upanaya sane kalaksanayang majeng pekerja migran Indonesia (PMI) sane budal sampun manut sekadi protokol kesehatan sane kemargiang. Disampun ka-test SWAB, pare PMI pacang mewali kakekeb 7 rahina mangda sujati bersih saking Covid-19.
Bupati Suradnyana ngangken makeh PMI Buleleng sane rauh nenten kauningin olih Satgas lan maosan sampun ngekeb angga, sakemaon kawentenanne dane ngelaksanayang geginan ring jejaban. Semalihne wenten sane mamengkung nenten nganutin uger-uger pemerintah. Mangkin PMI sane budal sampun kakekeb ring Denpasar. Dadosne, selanturne presida nguleng transmisi lokal.
"Titiang nyumbungan pemargi sane kaambil olih Pemerintah Provinsi Bali antuk kawentenan Covid-19 puniki pinaka terstruktur lan sistematis. Suksema majeng Pak Gubernur sane sampun ledang rauh ring Desa Bondalem lan nyukserahan wantuan, puniki nyihnayang iraga sami sumeken nambakin virus ini," ucap Bupati Buleleng.
Tiosan raris Kelian Adat Bondalem Made Pendra wusan parikrama nyukserahang wantuan ngaturang suksema antuk kauratiang pemerintah, utamane Gubernur Bali sane sampun tedun ngicen wantuan majeng krama Desa Bondalem. (gix)
Komentar