Nangiang Potensi Lokal, Putri Koster Ngaptiang Wenten Pameran Anggrek Bali
- 30 Oktober 2020
- 20:10 WITA
- News
DENPASAR, Balitopnews.com - Ketua Tim Penggerak PKK Provinsi Bali Putri Suastini Koster nodyanin pamargin 'Lomba Anggrek dan Bursa Tanaman Hias' sane kalaksanayang ring Duta Orchid Garden Jalan By Pass Ngurah Rai Tohpati Denpasar, Sukra, 30 Oktober 2020.
Tiosan nyanggra becik pamargin Lomba Anggrek miwah Bursa Tanaman Hias, Putri Koster taler ngaptiang mangda wenten parikrama pameran anggrek Bali.
Putri Koster maosang, parikrama sane kapikamkam antuk Duta Orchid Garden ring masa pandemi puniki, wantah pinaka pangawit sane becik sajroning nangiang kawentenan bisnis anggrek wiadin tanaman hias.
"Sampun sue kadirasa marerepan riantukan pandemi. Sane mangkin kabuatang mangda matangi. Parikrama sekadi mangkin pinaka silih tunggil cihna matangi, pamekas ring budidaya anggrek miwah tanaman hias," baosnyane.
Dane ngawewehin, budidaya anggrek wiadin tanaman hias akeh kawigunanipun. Tiosan prasida kaanggen kasenengan utawi hobi, matetanduran anggrek wiadin tanaman hias taler mabuat sajroning nyaga kalestarian palemahan. "Silih tunggil parindikan sane taler dahat mabuat, parikrama puniki taler prasida dados bisnis sane nyanjiang pisan,".
Sangkaning selah bisnis sane nyanjiang pisan, Dane nyarengang krama mangda nyelagang galahnyane rauh ka genah pameran. "Ngiring tumbuhang rasa seneng ring sekar anggrek wiadin tanaman hias. Yening sampun seneng, kasuen-suen majanten prasida kalimbakang dados bisnis,".
Ring bebaosannyane sareng penghobi anggrek, Putri Koster nguningayang pangaptinnyane mangda wenten pameran anggrek Bali. Dane nlatarang yening daweg alit uning ring makudang-kudang soroh anggrek Bali sekadi anggrek cicing miwah anggrek toke.
"Titiang mapangapti mangda prasida wenten pameran khusus anggrek Bali,sajroning nangiang kahanan lokal sane wenten," baosnyane sinambi ngaptiang mangda budidaya anggrek miwah tanaman hias prasida kakelola becik. Sapunapi mangda mawit saking bibit rauhing ring budidaya, samian prasida kalaksanayang ring Bali,".
Ni Wayan Srilaba sane nuenang Duta Orchid nlatarang, parikrama puniki kalaksanayang wantah sajroning nangiang malih bisnis anggrek sane dahat kaon sangkaning pandemi Covid-19 puniki.
Srilaba nlatarang, pandemi Covid-19 sane ngicen pawesana kaon ring pariwisata taler banget mawesana majeng bisnis anggrek. Akomodasi pariwisata sane akehan tutup, inggian hotel wiadin restoran ngawinang pangarsa majeng anggrek wiadin tanaman hias nedunang kantos 80 persen. Nanging parindikan punika majanten kaaptiang nenten suwe, saha bisnis anggrek miwah tanaman hias prasida katangiang malih ring Pulo Dewata. "Titiang ngwantu petani anggrek mangda prasida nguripang malih bisnis puniki,” baosnyane sinambi nguningayang yening Duta Orchid sane mangkin sampun madue koleksi 300 soroh anggrek saha 1/5 wantah pinaka soroh anggrek lokal Bali,".
Ketua Dewan Juri Lomba Anggrek Ramadani Prasetya ngawewehin yening lomba anggrek ketahnyane kepah dados kalih kelas minakadi hibrida miwah spesies alami. Yening kepah malih sane sayan spesifik, kelas lomba prasida 50 kelas kantos 60 kelas.
"Riantukan ring kahanan pandemi, ngawinang nenten raris nglaksanayang lomba antuk akeh kelas. Ring galahe mangkin wantah 6 kelas sane kalombayang, antuk pamiletnyane mawit saking Bali,".
Kawewehin malih yening lomba madue tetujon nangiang malih kawentenan Perhimpunan Anggrek Cabang Bali sane kaon pisan salami pandemi. Dane sane taler nyarengin ring kepengurusan pusat ngruruhang pamargi mangda budidaya anggrek ring Bali prasida katangiang malih. Silih tunggil pamargi sane kaambil wantah antuk nyarengang pencinta tanaman hias sane ring galahe mangkin kawentenane akeh karuruh wiadin booming.
"Parikrama maprakanti sareng tanaman hias mangda kawentenan anggrek taler prasida sayan nglimbak," baosnyane.
Lomba anggrek antuk hadiah sane kantos Rp 3.000.000 puniki karuntutin antuk parikrama lokakarya sane kalaksanayang saking tanggal 31 Oktober 2020 miwah lelang anggrek ring tanggal 1 November 2020. Krama sane jagi nyantenang kaluihan anggrek wiadin tanaman hias prasida rauh ring Duta Orchid.(Gix_)
Komentar