Pemprov Bali Ngamolihang Tigang Penghargaan saking Kementerian Hukum dan HAM
- 01 Desember 2020
- 19:12 WITA
- News
JAKARTA, Balitopnews.com - Pemerintah Provinsi Bali ngamolihang tigang penghargaan saking Kementerian Hukum dan HAM Republik Indonesia. Tigang penghargaan punika minakadi pinaka Anggota Jaringan Dokumentasi dan Informasi Hukum (JDIH) Terbaik Nasional Warsa 2020 kategori Provinsi. Prestasi kaping kalih, Bali kapikukuhang pinaka provinsi antuk keanggotaan JDIH nasional 100% sampun madue laman JDIH sane terintegrasi sareng portal JDHIN.go.id.
Penghargaan kaping tiga kapolihang antuk Dinas Komunikasi Informatika dan Statistik Provinsi Bali sane kapikukuhang pinaka instansi pendukung fasilitas JDIH ring Instansi Pemerintah Kabupaten/Kota ring wewidangan Provinsi Bali.
Makatiga penghargaan puniki katrima olih Kepala Dinas Kominfos Provinsi Bali Gede Pramana miwah Kepala Biro Hukum Setda Provinsi Bali Ida Bagus Gede Sudarsana sajroning pamargin Pertemuan Nasional Pengelola JDIH miwah Panyukserahan Penghargaan Anggota JDIHN Terbaik warsa 2020 ring Aula Prof Mudjono, Kantor Badan Pembinaan Hukum Nasional (BPHN) Jakarta, Wraspati 26 November 2020 sane sampun lintang.
Antuk ngamargiang becik protokol kesehatan sajroning nambakin Covid-19, pamargin panyukserahan penghargaan puniki kalaksanayang antuk nganggen kalih pamargi, minakadi antuk offline miwah online.
Menteri Hukum dan HAM RI Yassona Hamonangan Laoly, ngicen penghargaan pinih ageng majeng instansi ring pusat, provinsi, rauhing ring kabupaten wiadin kota sane sampun prasida antar saha becik sajroning pengelolaan JDIH.
"Malarapan antuk pengelolaan sistem informasi sane becik, ngawinang geguat-geguat sane wenten prasida dangan saha gelis karuruh antuk angga sane muatang rumasuk krama. Informasi punika wantah kekuatan saantukan melarapan antuk informasi, iraga prasida ngambil pamutus antuk dangan saha gelis ” baosnyane.
Dane ngawewehin, sane mangkin Indonesia nenten malih masaing sareng panegara sane ageng, nanging sane kaarepin wantah negara cepat, sane majanten nganutin panglimbak jaman. Sangkaning punika, kecepatan teknologi informasi pinaka kekuatan sane dahat ageng sajroning ngarepin pasaing sane wenten.
“Titiang banget ngajiang kawentenan provinsi, kabupaten kota wiadin instansi sane tiosan sane JDIH-nyane sampun terintegrasi,” baosnyane.
Kepala Badan Pembinaan Hukum Nasional Kemenkumham RI Benny Riyanto nlatarang, nyantos ring Warsa 2020, JDIHN sampun madue 1.650 anggota. Pinaka pusat JDIH, BPHN setata nglaksanayang koordinasi miwah pembinaan majeng anggota JDIH melarapan antuk pamargin bimbingan teknis wiadin rapat koordinasi inggian ring pusat wiadin daerah.
Tiosan punika, saking warsa 2014, BPHN taler sampun sering ngicen penghargaan majeng Anggota JDIH sane pinih becik ring makudang-kudang kategori, minakadi saking instansi pusat, pemerintah provinsi, pemerintah kabupaten, wiadin pemerintah kota. Penghargaan puniki kaaptiang prasida nangiang kayun anggota JDIH sane tiosan sajroning malomba makarya inovasi wiadin kreativitas.
Ring salanturnyane, Dane ngaptiang mangda pengelolaan JDIH kaparipurnayang malih. Silih tunggilnyane melarapan antuk optimalisasi JDIH pinaka "portal" pencarian dokumen hukum wiadin basis data dokumen hukum sane dangan karuruh, tegep saha nenten kasangsayaang kawentenanipun.
Mapaiketan ring tigang penghargaan sane sampun prasida kapolihang, Kadis Kominfos Gede Pramana maosang yening napi sane kapolihang puniki jagi prasida nangiang kayun wiadin pangaat Pemprov Bali pamekas Dinas Kominfos sajroning ngulati “Bali Satu Data” saha nglimbakang Sistem Pemerintahan Berbasis Elektonik (SPBE) sane becik nyujur Bali Smart Island antuk nem komponen pokok minakadi Atma Kerthi, Segara Kerthi, Danu Kerthi, Wana Kerthi, Jana Kerthi miwah Jagat Kerthi sane kaunggahang ring konsep Sad Maha Kerthi (Sistem Layanan Digital Manajemen Pemerintahan Terkolaborasi dan Harmoni Sad Kerthi).(Gix_)
Komentar