Gubernur Bali Ngaptiang Pikobet Pertanahan Kapuputang saha Melanin Pabuat Krama

  • 01 Desember 2020
  • 20:12 WITA
  • News

DENPASAR, Balitopnews.com - Gubernur Bali Wayan Koster mungkah parikrama Rapat Koordinasi Gugus Tugas Reforma Agraria Provinsi Bali Warsa 2020 sane ngunggahang unteng “Penguatan Hak Rakyat Atas Tanah Melalui Reforma Agraria di Provinsi Bali yang Sagilik, Saguluk, Salulung Sabayantaka” sane kalaksanayang antuk daring ring Denpasar, Anggara 1 November 2020.

 

Gubernur Bali Wayan Koster maosang yening paruman puniki pinaka galah dahat becik sajroning nyelehin indik pikobet-pikobet pertanahan sane mapaiketan sareng pakilitan panegara sareng kramanipun. 

 

“Saantukan konstitusi miwah peraturan perundang-undangan sampun janten ngamatutang mangda ngaruruhang pamargi majeng pikobet sane wenten melarapan antuk kawijakan sane melanin pabuat krama nganutin ring daging perundang-undangan sane wenten,” baosnyane.

 

Gubernur Koster maosang Pemerintah Provinsi Bali dahat nyokong program reforma agraria ring Bali saantukan kantun wenten makudang-kudang parindikan sane patut kapuputang. Minakadi mapaiketan sareng tanah sane sampun kagenahin antuk krama, genah sane kawigunayang antuk krama, genah sane nenten kauratiang sane nenten prasida kaolah becik antuk krama wiadin pemerintah daerah saantukan nenten wenten pamastika hukum ring genahe punika.

 

“Tiang ngamanahin yening parikrama puniki dahat becik saha mabuat kamiletin sajroning ngaruruhang pamargi majeng pikobet sane wenten mangda nenten kantos suwe dados pikobet, sekadi kawentenan genah utawi tanah ring makudang-kudang wewidangan sane kantos mangkin durung madue kepastian hukum,” baos Gubernur sane taler pinaka Ketua Gugus Tugas Reforma Agraria Provinsi Bali.

 

Gubernur nureksain yening reforma agraria pinaka pamargi dahat becik sajroning ngaruruhang pamargi majeng satunggil pikobet sane mapaiketan sareng tanah utawi lahan, sane manados hak hubungan pantaraning panegara sareng krama.

 

“Ring Provinsi Bali wenten makudang-kudang genah utawi tanah sane patut digelis kapikayunin saantukan sampun saking suwe durung wenten pamastika hukum,” baos Ketua DPD PDIP Provinsi Bali.

 

Minakadi tanah ring Desa Sumberklampok, Kecamatan Gerokgak, Kabupaten Buleleng, tanah sane kagenahin antuk pengungsi eks Timor Timur ring Desa Gerokgak, tanah aset Pemprov Bali sane kagenahin antuk krama ring Desa Sumberkima, Kecamatan Gerokgak, miwah tanah sane nenten kaolah ring Desa Gunaksa, Kabupaten Klungkung.

 

Makudang-kudang pikobet puniki sampun kauratiang antuk Gubernur Bali saha sampun wenten panincap saha jagi digelis kapuputang. Gubernur Koster ngajiang becik angga ring Kanwil BPN Provinsi Bali wiadin angga tiosan sane sampun nyarengin ngaremba.

 

“Titiang ngamanahin yening iraga pinaka pamucuk, yening kramanipun prasida ledang kayune sangkaning kawijakan sane kamedalang, punika majanten rasa bagia iraga sareng sami. Punika kawiaktiannyane wantah tanggung jawab moral iraga pinaka penyelenggara negara,” baos Gubernur Koster.

 

Pamargin paruman antuk daring puniki taler karauhin antuk Kepala Kantor Wilayah (Kakanwil) BPN Provinsi Bali, Rudi Rubijaya miwah instansi pertanahan tiosan ring provinsi Bali.(Gix_) 

 


TAGS :

Komentar