Cok Ace Ngamikukuhang Pengurus BPC PHRI Jembrana
- 02 Desember 2020
- 20:12 WITA
- News
JEMBRANA, Balitopnews.com - Wakil Gubernur Bali Tjokorda Oka Artha Ardana Sukawati (Cok Ace) sane sapisanan pinaka Ketua BPD PHRI Bali ngamikukuhang pengurus BPC PHRI Kabupaten Jembrana masa bakti 2020-2025 , ring Kelapa Retreat and Spa, Kecamatan Pekutatan Jembrana, rahina Buda 2 Desember 2020.
Wagub Cok Ace nlatarang yening Covid-19 sampun ngicen pawesana ageng majeng Bali, ngawinang Bali keni kontraksi pertumbuhan ekonomi sane ageng kantos 12 persen saha banget mawesana kaon majeng pariwisata Bali.
Yadiastun asapunika, Ketua BPD PHRI Bali puniki nyarengang para pengusaha hotel wiadin restaurant mangda sampunang ajerih ring kayun saha sampunang sangsaya yening pariwisata Bali jagi prasida digelis katangiang. Pemerintah, pelaku usaha wiadin krama jagi setata mautsaha sapunapi mangda wisatawan digelis percaya yening Bali sampun sayaga malih nyanggra pangrauh wisatawan, inggian wisatawan domestik wiadin mancanegara.
Layanan kesehatan majanten jagi setata kapidabdabin melarapan antuk ngawewehin kawentenan laboratorium, genah isolasi taler setata kapidabdabin antuk pemerintah. Punika taler ring para pelaku usaha pariwisata sane setata nincapang kawentenan CHSE ring akomodasi wiadin genah pariwisata. Tiosan punika krama taler setata ngamargiang becik protokol kesehatan. Samian utsaha punika kalaksanayang mangda pariwisata Bali prasida digelis katangiang malih.
Majeng Kabupaten Jembrana, Wagub Cok Ace maosang yening pemerintah Provinsi Bali maprakanti sareng pemerintah pusat taler madue pangrencana midabdabin kawentenan infrastruktur ring Kabupaten Jembrana sekadi pewangunan jalan tol Mengwi- Gilimanuk wiadin pewangunan Bandara sane genah ipun nenten doh saking Kabupaten Jembrana. Antuk kawentenan pewangunan infrastruktur punika, krama Jembrana kaaptiang mangda taler maparidabdab antuk nincapang kawagedannyane mawinan prasida masaing sareng SDM sane wenten. Melarapan antuk punika pewangunan infrastruktur jagi mawesana majeng kasukertan krama.
Pamargin pamikukuhan taler karauhin antuk Bupati Jembrana I Putu Artha, pengurus BPD PHRI Provinsi Bali miwah pengurus BPC PHRI kabupaten/kota sajebag Bali.(Gix_)
Komentar