Pangrencana Gubernur Koster Indik Bali Energi Bersih Kasanggra Becik Duta Besar Republik Slowakia Ring Jakarta 

  • 04 Desember 2020
  • 21:12 WITA
  • News

DENPASAR, Balitopnews.com - Duta Besar Republik Slowakia ring Jakarta, Jaroslav Chlebo ngajiang becik pangrencana Gubernur Bali, Wayan Koster sane sampun ngamedalang geguat marupa Peraturan Gubernur Bali Nomor 45 indik Bali Energi Bersih. 

 

Parindikan punika kabaosang ri kala Dubes Slovakia masadu ajeng sareng Gubernur Bali, Wayan Koster, rahina Sukra 4 Desember 2020 ring Jayasabha, Denpasar. 

 

Ri kala masadu ajeng pamekas audiensi, Gubernur Koster nyanggra pangrauh Duta Besar Republik Slowakia, Jaroslav Chlebo antuk nganggen busana adat Bali. Dane maosang salami kapamucukannyane pinaka Gubernur sampun ngamikukuhang indik pidabdab pewangunan Bali sane fundamental antuk visi Nangun Sat Kerthi Loka Bali melarapan antuk Pola Pembangunan Semesta Berencana ngulati Bali Era Baru.

 

"Titiang sajroning pidabdab pewangunan Bali wantah uleng ngwangun baga palemahan, pawongan miwah kabudayannyane, riantukan Bali prasida ngadautin kayun wisatawan lokal wiadin mancanegara sangkaning parindikan punika,"  baos Gubernur Koster sane naenin dados Anggota DPR-RI 3 Periode saking Fraksi PDI Perjuangan.

 

Sajroning nyaga karahayuan jagat Bali miwah sadagingnyane, Wayan Koster ring ajeng Duta Besar Republik Slowakia ring Jakarta Jaroslav Chlebo, nuekang yening Bali ring galahe mangkin sampun wenten Peraturan Gubernur Bali No.97 Warsa 2018 nganinin indik Pembatasan Timbulan Sampah Plastik Sekali Pakai, miwah Peraturan Gubernur Bali Nomor 48 Warsa 2019 nganinin indik Penggunaan Kendaraan Bermotor Listrik Berbasis Baterai pinaka pangupaya ngardi Pulo Bali mangda luput saking polusi.

 

Tiosan punika, program pembangkit listrik berbasis energi bersih taler kantun kapidabdabin mangda prasida kawangun ring Bali. Melarapan antuk punika, tiosan ngardi Bali sane resik miwah sehat, para wisatawan jagi degdeg kayunnyane wenten ring Bali.

 

"Kawiaktiannyane ngawit warsa 2019, Bali sampun katrima becik antuk makudang-kudang panegara, mawinan pangrauh wisatawan daweg warsa 2019 prasida nincap malih 20 persen langkung. Salanturnyane ring warsa 2020, pangrauh wisatawan ka Bali kabanda antuk kawentenan Covid-19 saha kawewehin antuk kawijakan Pemerintah Pusat sane nenten ngicen wisatawan asing rauh ka Indonesia, mawinan banget mawesana kaon majeng pariwisata Bali rumasuk majeng ekonomi Bali," baos Koster sinambi ngrastiti mangda pandemi Covid-19 prasida usan saha pariwisata Bali prasida mawali sekadi jati mula, mawinan ekonomi Bali prasida katangiang malih.

 

Mirengang parindikan sekadi punika, Duta Besar Republik Slowakia ring Jakarta, Jaroslav Chlebo saha kasarengin antuk Konsul Kehormatan Republik Slowakia, Dr. Jurgen Schreiber maosang yening anggannyane kadaut kayune nglaksanayang prakanti sareng Bali, pamekas ring  kawentenan motor listrik mawinan prasida nyokong program Kendaraan Bermotor Listrik Berbasis Baterai.

 

"Mapaiketan ring investasi, titiang ri kala nitenin pewangunan Bali majanten jagi setata nganggen kekuatan sumber daya lokal, saha prasida kaadungang taler sareng angga ring dura Bali salami investasi sane kamargiang anut sareng pabuat miwah pewangunan sane kautamayang ring Bali," panyawis saking Wayan Koster sinambi nlatarang yening ring Pulo Pulau Dewata madue makudang-kudang industri sekadi Industri Pengolahan Pertanian, Industri Kerajinan Rakyat, miwah sedeng midabdabin Industri Kendaraan Ramah Lingkungan, rauhing ring investasi widang energi bersih.(Gix_) 

 


TAGS :

Komentar