Gubernur Koster Ngicen Wantuan Hibah 10 Are Tanah Pemprov Bali majeng MDA Kecamatan Selat
- 05 Desember 2020
- 21:12 WITA
- News
KARANGASEM, Balitopnews.com - Bendesa Adat Sajebag Kecamatan Selat, Kabupaten Karangasem ngaturang suksma dahat antuk kasumekenan Gubernur Bali, Wayan Koster sajroning nglimbakang desa adat ring Bali, rumasuk ring wewidangan Kecamatan Selat, Karangasem.
"Wau mangkin wenten Gubernur Bali sane sayuwakti nguratiang kawentenan desa adat, mawinan titiang rumasa garjita pisan antuk kawentenan program Nangun Sat Kerthi Loka Bali sane yakti-yakti melanin pabuat ring desa adat," baos Bendesa Majelis Desa Adat (MDA) Kecamatan Selat, Komang Sujana ring ajeng Gubernur Bali, Wayan Koster, Saniscara 5 Desember 2020 ring selagan parikrama wantuan hibah Tanah Pemprov Bali ring Wantilan Camat Selat.
Komang Sujana sane taler pinaka Bendesa Adat Duda maosang yening wantuan hibah tanah sane kaicen antuk Gubernur Koster jagi kawigunayang sabecik-becikne sajroning nglestariang miwah nyokong program desa adat ring Kecamatan Selat, silih tunggilnyane kaanggen pinaka Kantor MDA Kecamatan Selat.
Mirengang parindikan sekadi punika, Gubernur Wayan Koster sane kasarengin antuk Kepala Dinas Pemajuan Masyarakat Adat Provinsi Bali, I Gusti Agung Ketut Kartika Jaya Seputra, Penyarikan Agung Majelis Desa Adat (MDA) Provinsi Bali, I Ketut Sumarta, miwah pecak Bendesa Agung Desa Adat Provinsi Bali, Jero Gede Suwena Putus Upadesa nlatarang yening wantuan Hibah Tanah Pemerintah Provinsi Bali sane kaicen majeng MDA Kecamatan Selat jimbaripun 10 Are.
"Titiang banget nyokong yening aset tanah Provinsi Bali puniki kawigunayang sajroning nglimbakang saha nincapang widang seni, adat wiadin budaya lokal pamekas ring desa adat. Riantukan tanah puniki jagi kaanggen pinaka Kantor MDA Kecamatan, mawinan MDA Kecamatan Selat majanten jagi kapertama ring Bali sane madue kantor saha kawangun madasar antuk sagilik saguluk," baos Gubernur Bali saking Desa Sembiran Buleleng. Anggannyane ngawewehin yening tanah Provinsi Bali puniki prasida kawigunayang majeng pabuat pemerintah, sajroning nglimbakang widang ekonomi, taler prasida kabuatang majeng krama pamekas desa adat, inggian panyokong widang pendidikan, kesehatan, wiadin sarana umum sane tiosan.
Tiosan punika, pecak Anggota DPR-RI 3 Periode saking Fraksi PDI Perjuangan sane sampun prasida ngranjingang bab nganinin indik desa adat ring UU No.6 Warsa 2014 indik Desa, ring galahe punika nyarengang 27 Bendesa Adat Sajebag Kecamatan Selat mangda sayuwakti nindihin kawentenan seni, adat, miwah budaya Bali sane anut ring visi Nangun Sat Kerthi Loka Bali.
Riantukan desa adat pinaka lembaga dahating utama, saha pinaka pamucuk sajroning nyaga karajegan seni budaya ring Bali, saha regulasi ipun sampun taler kaunggahang ring Perda Desa Adat No.4 Warsa 2019.
"Ngiring rajegang saha tangiang malih kasuksman-kasuksman utama ring kabudayan Bali melarapan antuk Nangun Sat Kerthi Loka Bali inggian ring sekala wiadin niskala, saantukan unteng jagat Bali wantah adat, seni, budaya, wiadin drestannyane," baosnyane.(gix)
Komentar