Putri Koster Nyobiahang Perda Nomor 4 Warsa 2019 nganinin Desa Adat miwah Sosialisasi PAKIS MDA Bali

  • 15 Januari 2021
  • 21:01 WITA
  • News

DENPASAR, Balitopnews.com - Putri Koster pinaka Manggala Utama Paiketan Krama Istri Provinsi Bali (PAKIS Bali) dados silih tunggil narawakya sajeroning siaran tunda acara 'Perempuan Bali Bicara' sane ngunggahang unteng 'Sosialisasi Perda Nomor 4 Warsa 2019 nganinin Desa Adat miwah Sosialisasi PAKIS MDA Bali', sane kamargiang ring Denpasar, Wraspati (14 Januari 2021).

Pinaka pangawit aturnyane, Ny Putri Koster maosang kawentenan PAKIS Bali ring tengahing krama sajeroning nyarengin ngarembe program sane kapikamkam antuk desa adat pinaka cihna pamargin Visi Nangun Sat Kerthi Loka Bali.

Putri Koster sane taler pinaka Ketua TP PKK Provinsi Bali maosang yening kawentenan PAKIS Bali ring tengahing krama sajeroning ngamargiang programnyane mangda nenten  raris singsal sareng program program TP PKK.  PAKIS Bali jagi maprakanti sareng TP PKK sajeroning nyobiahang program-program Pemprov Bali sane kaunggahang ring visi Nangun Sat Kerthi Loka Bali. Linggihnyane makakalih sampun tinas ring desa, antuk Ketua TP PKK majanten istri Kepala Desa makamiwah sane dados Ketua PAKIS Bali wantah istri Jro Bendesa. Saking makekalih punika selami puniki sampun matiosan genahnyane saha makekalih ngamargiang amongannyane sinarengan. 

Istri saking manggalaning jagat ring Bali ngawewehin, kawentenan PAKIS Bali madue pengurus sane akehnyane 19 diri puniki, sampun makarya makudang-kudang program kerja sane nyokong parikrama ring desa adat saha antuk nyarengang pangrembe saking para istri ring adat sajeroning ngamargiang swadharmannyane soang-soang. Antuk punika, krama istri jagi dados subjek ring wewidangan desa adat saha taler madue amongan sajeroning nincapang kasukertan krama sapisanan  nyaga karajegan dresta, adat wiadin budaya ring desa adat.

Sajeroning kawentenan prajuru, pengurus PAKIS Bali sane kapikukuhang daweg tanggal 17 September 2020 puniki kaenter antuk minakadi Manggala, Penyarikan, Petengen, saha madue 5 Pasayahan minakadi  Pasayahan Adat, Agama, Tradisi, Seni lan Budaya, kalanturang antuk Pasayahan Pendidikan lan Olahraga, Pasayahan Kesehatan, Pasayahan Ekonomi lan Kesejahteraan Krama Adat, miwah  Pasayahan Hukum Adat lan Perlindungan Krama Istri lan Anak. Kawentenan PAKIS Bali puniki katujuang sajeroning nyokong amongan-amongan MDA pinaka lembaga adat sane madue payung hukum minakadi PERDA Provinsi Bali Nomor 4 Warsa 2019.

Kepala Dinas Pemajuan Masyarakat Adat Provinsi Bali I GAK Kartika Jaya Seputra  maosang medalnyane Perda No 4 Warsa 2019 nganinin indik Desa adat pinaka panyayub hukum sane sampun tegep pisan saha tinas ring kawentenan desa adat ring Bali. Perda puniki nenten ngunggahang indik tata kelola pemerintahan ring desa adat kemanten nanging taler tata kelola keuangan desa adat wiadin pemberdayaan desa adat. Melarapan perda puniki desa adat madue selah ageng sajeroning nglimbakang potensi desa ring unit usaha mawinan nincapang kasukertan krama.
 
Panyokong saking Pemerintah Provinsi Bali majeng kawentenan desa adat nenten marupa regulasi marupa perda kemanten  nanging taler kasokong antuk penganggaran wiadin gedung sane becik makamiwah lembaga lembaga sane pinaka panyokong sekadi PAKIS Bali. Antuk punika, pangaptine mangda kawentenan desa adat ring Bali jagi sayan rajeg  mawinan prasida berdaulat ring politik, berdikari ring ekonomi makamiwah berkepribadian ring kebudayaan.(gix)


TAGS :

Komentar