Gubernur Koster Nyarengang DPW PKB Provinsi Bali Nees Panglimbak Covid-19

  • 16 Januari 2021
  • 21:01 WITA
  • News

DENPASAR, Balitopnews.com - Gubernur Bali, Wayan Koster nyarengang Pengurus DPW Partai Kebangkitan Bangsa (PKB) Provinsi Bali mangda nyarengin sajeroning nyobiahang indik protokol kesehatan mangda prasida nees pangelimbak Covid-19 ring Pulo Bali.

 

Parindikan punika kabaosang olih Gubernur Bali, Wayan Koster ri kala rauh nodyanin pamargin Musyawarah Wilayah PKB Provinsi Bali sane kalaksanayang daweg rahina Saniscara (16 Januari 2021) ring Sanur, Denpasar.

 

"Panyokong tiosan sane taler kaaptiang saking DPW PKB Provinsi Bali wantah nyarengin ngrastitiang mangda Pandemi Covid-19 digelis matilar," paweweh saking Koster sajeroning sambrama wacanannyane ring ajeng Ketua DPW PKB Provinsi Bali, H. Bambang Sutiyono, SE, sinambi ngaptiang mangda pamargin Musyawarah Wilayah PKB Provinsi Bali prasida mamargi antar labda karya.

 

Wayan Koster sane sampun saking dumun wenten pakilitan becik sareng PKB ngawit Dane pinaka Anggota DPR-RI saking Fraksi PDI Perjuangan ring Senayan, Jakarta, ring pamuput sambrama wacanannyane nyarengang DPW PKB Provinsi Bali mangda nyarengin ngwantu ngawangun Bali nganutin visi Nangun Sat Kerthi Loka Bali melarapan Pola Pembangunan Semesta Berencana nyujur Bali Era Baru sane madue semerti nyaga kasucian miwah karahayuan jagat, ngulati krama Bali sane bagia miwah sukerta, sekala niskala, mawinan kauripan krama Bali prasida anut sareng prinsip Tri Sakti Bung Karno, berdaulat ring politik, berdikari ring ekonomi, miwah berkepribadian sajeroning kebudayaan melarapan antuk pembangunan secara terpola, menyeluruh, terencana, terarah, saha terintegrasi ring bingkai NKRI madasar antuk nilai-nilai Pancasila 1 Juni 1945.

 

"Titiang ngaptiang mangda samian sane maingkupan ring PKB antuk sinarengan nyarengin nangiang pariwisata miwah ekonomi Bali, antuk nambakin pangelimbak Covid-19, saha iraga pinaka panglantur para lingsire daweg riin madue amongan sajeroning nyaga jagat Bali mangda prasida rajeg sane madasar antuk ideologi sane anut ring nilai Pancasila ring NKRI puniki," baos Gubernur Koster sane taler pinaka Ketua DPD PDI Perjuangan Provinsi Bali.

 

Ketua DPW PKB Provinsi Bali, H. Bambang Sutiyono, SE maosang Musyawarah Wilayah PKB Provinsi Bali puniki kalaksanayang nganutin sareng amanah PKB saha karauhin antuk DPC PKB Sajebag Kabupaten/Kota ring Bali, antuk ngambil unteng 'Penataan dan Penyeragaman Masa Bakti Kepengurusan PKB Provinsi Bali'.

 

Pamargin parikrama punika taler karauhin antuk virtual olih Ketua Umum Dewan Pimpinan Pusat PKB, Abdul Muhaimin Iskandar, saha karauhin langsung Wakil Bupati Badung, I Ketut Suiasa, miwah Kesbangpol Provinsi Bali.(gix)


TAGS :

Komentar