TP PKK Provinsi Bali Nincapang Prakanti sareng Makudang-Kudang Angga ring Tengahing Pandemi

  • 18 Januari 2021
  • 18:01 WITA
  • News

DENPASAR, Balitopnews.com - Tim Penggerak PKK Provinsi Bali nincapang prakantinnyane sareng makudang-kudang angga, mangda prasida ngadungang program kerja sane kaduenang ring tengahing pandemi Covid-19 sane kantun nibenin kantos warsa 2021. Parindikan punika kabaosang Ketua TP PKK Provinsi Bali, Putri Koster ri kala dados narawakya ring acara Dialog Interaktif RRI Denpasar sane ngunggahang unteng 'Sinergitas Program miwah Kegiatan PKK Warsa 2021', Soma (18 Januari 2021).

 

Putri Koster kasarengin antuk Kepala Dinas Pemberdayaan Masyarakat Desa Dukcapil Provinsi Bali Putu Anom Agustina maosang program kerja TP PKK Bali Warsa 2021 nenten banget matiosan sareng warsa sadurungnyane. Napi malih ring warsa 2021, pandemi Covid-19 durung taler puput. Antuk nganutin kawentenan protokol kesehatan (prokes) ngarepin Covid-19, angga TP PKK durung prasida ngamargiang parikrama sakadi sadurungnyane melarapan antuk masadu ajeng langsung sareng krama wiadin nyarengang krama sane akeh.

 

Ring pangawit warsa 2021 puniki, TP PKK Provinsi Bali maprakanti sareng TP PKK Kabupaten/Kota kantos ring undagan pinih alit, sajeroning nyokong kawijakan pemerintah mapaiketan sareng pangupaya nees panglimbak Covid-19.

 

"Parikrama mabuat sane kamargiang TP PKK Provinsi Bali wantah ngwantu pemerintah ngelingang ring krama mangda ngamargiang becik protokol kesehatan," baos anak istri sane akeh madue kawagedan puniki. 

 

Sangkaning punika, nyarengang para kader PKK kantos ring undagan pinih alit pamekas Dasa Wisma, anggannyane nenten surud-surud nyobiahang indik kawentenan 3M melarapan antuk nganggen masker, ngwajikin tangan miwah jaga jarak.

 

Mapaiketan ring punika, TP PKK taler banget nguratiang indik program inti sekadi Posyandu, pembinaan lansia, HATINYA PKK (Halaman Asri Teratur Indah dan Nyaman). Nanging majeng ring pamargin Posyandu majanten nganutin ring kawentenan pandemi, mawinan kader PKK ngamargiang parikramannyane antuk ngrauhin krama. Sane ngawinang bangga, silih tunggil program pamekas HATINYA PKK kajantenang banget ngwantu krama. Program puniki nyarengang krama sajeroning mretenin tanah pakarangan antuk nandur makudang-kudang tetanduran sane kabuatang ring kauripan sarahina , sekadi jangan, pedes, bawang wiadin sane tiosan. HATINYA PKK sampun mabukti prasida dados benteng nyujur ketahanan pangan ring kulawarga, ri kala pandemi sekadi mangkin.

 

Ring pamuput bebaosannyane, anak istri sane ketah kabaosang Bunda puniki maosang yening PKK jagi setata ngwangun prakanti sareng samian angga, pamekas OPD sane mapaiketan ring Provinsi wiadin Kabupaten/Kota utawi organisasi sane tiosan.

 

"PKK jagi setata mautsaha ngicen kasukertan majeng krama nganutin sareng program program sane karincikang nganutin skala prioritas kebutuhan daerah madasar antuk 10 program pokok PKK. Antuk agengnyane utsaha sane kalaksanayang antuk angga PKK, kaaptiang praisida ngwantu pemerintah sajeroning nyujur visi Nangun Sat Kerthi Loka Bali," baos Bunda Putri.

 

Kepala Dinas Pemberdayaan Masyarakat Desa Dukcapil Provinsi Bali Putu Anom Agustina nlatarang, utsaha PKK sane kalaksanayang majanten utama sane mabuat pisan, mawit ring pusat rauhing  Dasa Wisma antuk dana sane kasokong pemerintah.

 

Anom Agustina ngawewehin, kawentenan PKK wiadin anggarannyane sampun kasayubin antuk dasar hukum sane tinas. Pinaka silih tunggil cihna sinergitas, TP PKK Provinsi Bali ngicen panyokong dana majeng kabupaten/kota saha salanturnyane dana punika kamargiang ring desa marupa Bantuan Keuangan Khusus (BKK). Melarapan antuk BKK punika, ngawinang PKK ring sakancan undagan prasida mamargi antuk sinarengan.(gix)


TAGS :

Komentar