Wagub Bali Ngaptiang Pers Pinaka Pamucuk Sajeroning Nambakin Hoaks ring Tengahing Krama
- 09 Februari 2021
- 21:02 WITA
- News
DENPASAR, Balitopnews.com – Ri kala pandemi Covid-19 pers dados pamucuk sajeroning ngicen pangweruhan ring krama, nepasin yening wenten gatra-gatra sane nenten patut saantukan prasida ngosahang krama,napi malih ring kawentenan pandemi sekadi mangkin, mawinan prasida ngaatang kayun krama mangda sayan produktif.
Parindikan puniki kabaosang Wakil Gubernur Bali Tjok. Oka Artha Ardhana Sukawati ri kala pakeling Hari Pers Nasional, ring Wantilan Kerta Sabha, Denpasar, Anggara (9 Februari 2021).
Melarapan antuk pakeling Hari Pers Nasional Warsa 2021, Wakil Gubernur Bali ngaptiang ring angga pers mangda prasida nglaksanayang swadarmannyane antuk setata madasar prinsip independensi makamiwah nginggilang nilai-nilai pers nganutin daging Undang-undang Pers Nomor 40 Warsa 1999.
Antuk ngunggahang unteng "Bangkit saking Pandemi, Bali Gerbang Pariwisata sajeroning Nangiang Ekonomi Nasional, Pers pinaka Akselerator Perubahan," Pers kaaptiang sayan akeh ngarembe pinaka akselerator perubahan, mangda pariwisata Bali sane madasar antuk budaya setata nglimbak nganutin visi Pemerintah Provinsi Bali Nangun Sat Kerthi Loka Bali melarapan antuk pola pembangunan semesta berencana nyujur Bali era baru sane madue semerti "Nyaga Kasucian miwah Karahayuan jagat miwah sadagingnyane, mawinan prasida ngardi kauripan krama wiadin Gumi Bali sane sukerta miwah bagia, Sekala-Niskala nganutin Prinsip Trisakti Bung Karno : Berdaulat ring Politik, Berdikari ring Ekonomi, miwah Berkepribadian sajeroning Kebudayaan melarapan pewangunan sane Terpola, Menyeluruh, Terencana, Terarah, miwah Terintegrasi ring Negara Kesatuan Republik Indonesia madasar antuk Nilai-Nilai Pancasila 1 Juni 1945.
Pakeling Hari Pers Nasional Warsa 2021 ring Provinsi Bali, patut kaanggen galah sajeroning nincapang prakanti pantaraning Pemerintah sareng Pers, mawinan prasida ngicen gatra sane patut majeng krama, prasida ngicen gatra sane becik melarapan pewangunan sane kamargiang antuk Pemerintah Provinsi Bali, sepisanan pers taler kaaptiyang nureksain pamarginnyane mawinan tetujon pewangunan prasida gelis kamargiang nganutin pabuat krama.
Ketua Persatuan Wartawan Indonesia (PWI) Provinsi Bali IGMB Dwikora Putra maosang kebebasan pers sajeroning nguningayang gatra mangda setata madasar antuk data wiadin kawiaktiannyane ring lapangan, mawinan nenten raris ngawetuang prakara wiadin wacana kaon.
Ekosistem wiadin industri pers mangda setata mamargi becik mangda krama prasida ngamolihang gatra sane patut. Krama sane sehat majanten krama sane ngamolihang gatra-gatra sane patut saha mabuat.
Sajeroning nguningayang gatra sane becik majanten muatang jurnalisme sane sayuwakti waged antuk ekosistem mangda taler becik. Tiosan punika ri kala pandemi sekadi mangkin taler kabuatang pangrauh angga pers pinaka pamucuk sajeroning ngarepin kawentenan gatra-gatra sane nenten patut, panglimbak kawentenan hoaks makamiwah ujaran kebencian sane prasida ngaonang semertin demokrasi.
Parikrama puniki taler karauhin antuk Kapolda Bali, Staf Ahli Pangdam IX/ Udayana, Kepala Penerangan Korem 163/ Wirasatya, Anggota PWI Bali, Kepala Dinas Kominfos Provinsi Bali. Pakeling Hari Pers Nasional Indonesia kaulengang ring TMII Jakarta, saha kasarengin Presiden RI Joko Widodo antuk virtual.(gix)
Komentar