Wakil Dubes Inggris Ngajiang Becik Pidabdab Ngarepin Covid-19 ring Bali
- 10 Februari 2021
- 22:02 WITA
- News
DENPASAR, Balitopnews - Kawijakan Pemerintah Provinsi Bali sajeroning ngarepin pandemi Covid - 19 mawali kaajiang becik antuk jagat internasional. Ring galahe mangkin rauh saking Kerajaan Inggris melarapan antuk Wakil Duta Besar (Dubes) Inggris majeng Indonesia, Rob Fenn sane nglaksanayang simakrama sareng Gubernur Bali Wayan Koster antuk virtual daweg rahina Buda (10/2), ring Ru iumah Jabatan Jayasabha, Denpasar.
Wakil Dubes Rob sane ngangkenin yening pikobet Covid-19 kantun taler ngosahang panegarannyane, nlatarang rasa angobnyane nyantenang kawijakan saha pamargi sane kaambil antuk Gubernur Koster ngawit kawentenan Covid-19 ring Bali. "Titiang banget ngajiang becik pidabdab saking Bapak Gubernur selami pandemi puniki malarapan antuk kawijakan-kawijakan sane kamedalang. Titiang ngaturang suksma ngangganin petang tali krama Inggris sane kantun jenek ring Bali, saha taler ngangganin panegara Inggris," baos Rob sane mabaos saking Jakarta.
Pidabdab wiadin pamargi sane kaambil Pemprov Bali manut Rob prasida ngicen rasa degdeg majeng krama Inggris sane wenten ring Bali, sajeroning ngarepin pandemi sane nibenin ring pungkuran puniki.
Tiosan punika, Rob taler mastikayang yening ring salanturnyane mapaiketan ring prakanti makudang-kudang widang prasida kalanturang saha kamargiang becik pantaraning Inggris-Bali. "Sane pinih anyar, titiang kantun midabdabin pamargin simposium sajeroning mligbagang indik pidabdab ngarepin teroris miwah nyayubin kawentenan infrastruktur saking terorisme. Titiang jagi ngrauhang ahli ring widang punika mawinan prasida kabligbagang sareng angga pemprov wiadin kepolisian Bali," baos Rob.
Rob Fenn taler maosang yening panegara Inggris banget ngajiang saha kadaut majeng kawijakan energi bersih, terbarukan miwah ngawigunayang kendaraan listrik berbasis baterai sane kabaosang pinaka pangupaya ngirangin kaonnyane iklim global. "Titiang majanten jagi seneng pisan yening prasida kaicen nyokong kawijakan punika antuk nyarengang para ahli saking Inggris sane sampun prasida ngamargiang parindikan punika. Puniki pinaka pamargi ageng sane kaambil majeng Bali," baosnyane.
Anggannyane taler mastikayang, ri kala kawentenan jagate sayan becik, krama Inggris majanten jagi mawali nganggen Bali pinaka genah wisata utama ri kala masesanjan. "Akeh krama Inggris sane seneng jenak saha makarya ring Bali," baosnyane.
Tiosan punika, Gubernur Koster ring galahe punika nguningayang makudang-kudang pidabdab wiadin pamargi sane kaambil saking ngawit kawentenan Covid-19 ring Bali, sane daweg punika kakantenang nibenin krama Inggris ring medio Maret 2020 sane sampun lintang. "Titiang digelis ngambil pamargi, antuk ngamedalang status Bali siaga Covid-19 saha makarya satuan tugas sajeroning nambakin saha nees pangelimbaknyane. Tiosan punika taler kamedalang makudang-kudang surat keputusan miwah pakesiar majeng krama," baos Gubernur Bali saking Desa Sembiran, Kabupaten Buleleng.
Tiosan punika, Gubernur Koster taler maosang indik pangrembe desa adat pinaka lembaga berbasis kearifan lokal, malarapan antuk pararem, dahating mabuat kawentenane nambakin pangelimbak Covid-19 ring Bali. "Pamuputne, yening selehin ring kawentenan kasus positif, kawentenan krama sane prasida kenak malih miwah kawentenan krama sane padem, kakantenang nenten banget akeh, yadiastun sadurungnyane katarka kasusnyane jagi akeh pisan. Sangkaning panyarengan desa adat puniki, krama prasida trepti miwah disiplin sajeroning ngamargiang geguat sane kamedalang pemerintah," baos Ketua DPD PDI Perjuangan Bali puniki.
Parindikan puniki kabaosang Gubernur Bali saha kaajiang becik antuk makudang-kudang angga rumasuk Presiden RI. "Napi malih kawijakan PPKM tingkat mikro ring galahe mangkin dados kawijakan nasional, kacutetang pinaka pangelimbak saking kawijakan sane kamargiang ring Bali sane ring galahe mangkin kamargiang ring undagan nasional," baosnyane.
Tamatan ITB Bandung puniki taler nenten lali maosang yening kahanan niskala taler mabuat pisan kawentenane sajeroning ngarepin pandemi puniki. "Utsaha sane kalaksanayang nenten ring sekala kewanten nanging taler ring kahanan niskala, spiritual, sane ngawinang kawentenane ring Bali nenten pateh sareng wewidangan tiosan. Saantukan punika, Bali kantun prasida ngarepin pandemi sekadi mangkin," baosnyane.
Gubernur Koster taler nguningayang rasa bangganyane majeng putra Bali sane makarya Usadha barak malakat antuk arak Bali sane prasida ngawinang pasien Covid-19 digelis kenak. (Gix)
Komentar