Wagub Cok Ace Ngajiang Pisan Seseleh indik Purana Pura Dasar Bhuana Gelgel
- 13 Februari 2021
- 21:02 WITA
- News
KLUNGKUNG, Balitopnews.com - Wakil Gubernur Bali Tjokorda Oka Artha Ardhana Sukawati (Cok Ace) ngajiang becik pamargin seseleh sane kamargiang antuk Universitas Warmadewa sane kapucukin antuk Arkeolog Dr. Anak Agung Gede Raka, M.Si sane jagi kaanggen dasar sajeroning makarya buku, purana miwah prasasti ngeninin indik kawentenan Pura Dasar Bhuana Gelgel, Kabupaten Klungkung.
Parindikan punika kabaosang ri kala ngrauhin Forum Group Discussion (FGD) pamikolih saking seseleh Unwar sane kamargiang ring Wantilan Pura Dasar Bhuana Gelgel nepek ring Rahina Saniscara nepek Tumpek Landep (13 Februari 2021).
Wagub Cok Ace nureksain, napi sane kaselehin antuk peneliti Unwar puniki banget mawiguna, saantukan melarapan antuk seseleh puniki jagi ngamedalang cakepan marupa buku, purana miwah prasasti sane jagi kaanggen dasar pangweruhan majeng para prati sentara ring benjang pungkur.
Dane ngawewehin, kawentenan Pura Dasar Bhuana dahat mabuat kawentenane majeng krama Hindu ring Pulo Dewata. Dane maosang, kawentenan pelinggih ring wewidangan Pura Dasar Bhuana nyihnayang kawentenan krama Bali sane masikian.
"Wenten pelinggih majeng sameton Brahmana, Satria, Pande wiadin Pasek. Tegep pisan kawentenane, pinaka tetamian sane dahating mautama," baosnyane.
Tiosan ring kawentenan pelinggih sane nyihnayang pakilitan pasemetonan, pura puniki genahnyane taler ring tengahing Pulo Bali.
"Ida Lelangit nganggen Gelgel pinaka genah pura majanten kadasarin antuk makudang-kudang tetimbang sane dahating mabuat. Napi mawinan nenten kawangun ring Tabanan, Jembrana, Bangli wiadin wewidangan tiosan?. Yening selehin, Gelgel puniki genahnyane ring tengahing Pulo Bali, " Dane ngawewehin sinambi maosang yening pura puniki pinaka pralambang Hyang Panca Dewata, nyikiang limang pangidering jagat.
Panglingsir Puri Ubud puniki ngawewehin, genah Gelgel pinaka pusat Pulo Bali taler dados tetimbang Pemprov.Bali nganggen genahe ring Klungkung pinaka Pusat Kebudayaan Bali.
"Saka kedik ngiring pidabdabin genah sane madue sejarah puniki, sapunapi mangda prasida ngicen kasukertan majeng krama Bali, pamekas krama ring wewidangan irika,” Dane maosang.
Panyanggra sane becik majeng seseleh puniki taler kauningayang olih Ketua Paiketan Puri Puri Sajebag Bali (P3SB) Ida Dalem Semara Putra. Ida maosang, kawentenan purana majanten dahating mabuat saantukan irika kaunggahang indik lelintihan kawentenan pura. Ida Dalem Semara Putra ngaptiang, pamikolih saking seseleh sane kalaksanayang antuk Tim Peneliti Unwar prasida kaanggen dasar majeng sira ugi sane mapikayun nguningin indik Pura Dasar Bhuana Gelgel.
Prof. I Made Suwitra pinaka pangenter pamargin FGD maosang yening seseleh puniki pinaka panyalantarayan hibah saking Unwar. Seseleh puniki kamargiang selami tigang warsa sane kepah dados makudang-kudang paletan.
“Ring warsa kapertama puniki jagi kapidabdabin indik laporan utawi buku, ring warsa kaping kalih nincap ring purana saha kalanturang antuk prasasti,” baosnyane.
Dane ngawewehin, FGD sane kalaksanayang ring galahe puniki matetujon nglungsur tetimbang sajeroning maripurnayang seseleh puniki, sadurung kadadosang buku.
Arkeolog Unwar Anak Agung Gede Raka sane nenten prasida rauh langsung nanging melarapan antuk virtual, nlatarang indik pamikolih seseleh sane kalaksanayang majeng kawentenan Pura Dasar Bhuana Gelgel. Makudang-kudang tetimbang sane kapolihang ring FGD sampun kacatet saha kaanggen maripurnayang buku, purana miwah prasasti. Pamargin FGD kadulurin antuk pangubaktian ring Pura Dasar Bhuana Gelgel.(gix)
Komentar