Gubernur Koster-Christian Dior NgaLingga Tanganin Kerjasama Promosi Ekspresi Budaya Tradisional Indonesia majeng Tenun Endek Bali
- 14 Februari 2021
- 22:02 WITA
- News
DENPASAR, Balitopnews.com – Gubernur Bali, Wayan Koster miwah Christian Dior Couture, S.A ngalingga tanganin resmi kerjasama sajeroning nyobiahang Ekspresi Budaya Tradisional Indonesia majeng Tenun Endek Bali antuk virtual saking Gedung Gajah, Jayasabha, Denpasar miwah Paris, Perancis nepek ring rahina Tilem Kaulu, Wraspati Pon Landep (11/2) galah 21.30 WITA utawi 14.30 galah ring Paris.
Palinggatanganan prakanti sane kawangun puniki prasida mamargi antar, risampune Pemerintah Provinsi Bali melarapan Gubernur Bali, Wayan Koster kasarengin Ketua Dekranasda Provinsi Bali, Ny. Putri Koster nenten surud-surud ngutsahayang mangda nganggen Kain Tenun Endek Bali sane kakaryanin antuk penenun asli saking Pulo Dewata majeng Kementrian Dalam Negeri RI, Kementrian Luar Negeri RI, wiadin Kementrian Perdagangan RI, mangda perusahaan sane wenten ring panyayub hukum Panegara Perancis, Christian Dior Couture, S.A prasida ngawigunayang Kain Tenun Endek Bali pinaka koleksi busana musim semi miwah musim panas warsa 2021.
Ring prakanti sane kawangun punika, kabaosang yening tetujon saking Memorandum Saling Pengertian (MSP) puniki pinaka dasar majeng para angga sane ngwangun prakanti sajeroning nyobiahang ekspresi budaya tradisional Indonesia, pamekas Tenun Endek Bali madasar antuk saling nginggilang saha nenten wenten sane kapocolang. Gubernur Koster miwah Christian Dior taler antuk sinarengan nguningayang cumpu majeng daging prakanti sane kawangun, sajeroning nyobiahang ekspresi budaya tradisional Indonesia, pamekas antuk ngawigunayang Tenun Endek Bali ring produk Dior. Cumpu majeng prakanti ring widang Pemberdayaan Usaha Mikro, Kecil dan Menengah (UMKM) ring Bali sane ngasilang Tenun Endek, saha nyokong kawentenan Tenun Endek Bali kaanggen ring produk Dior, saha ring widang tiosan sane dados pabuat sinarengan, kaanutang sareng kawagedan soang-soang sane sampun kacumpuin.
Para angga taler patut nginggilang hak kekayaan intelektual sajeroning pamargin prakanti puniki madasar antuk MSP puniki saha nganutin sareng hukum wiadin peraturan perundang-undangan sane wenten ring panegara soang-soang. Selanturnyane Gubernur Koster miwah Christian Dior cumpu ngangkenin nilai Pengetahuan Tradisional miwah Ekspresi Budaya Tradisional (PT dan EBT), saha ngangkenin hak pemegang PT wiadin EBT mangda antuk efektif nyayubin PT miwah EBT saking penyalahgunaan wiadin penyelewengan.
Salanturnyane, Pemerintah Daerah Provinsi Bali pinaka angga sane nyayubin Tenun Endek Bali maosang rasa cumpunyane antuk nganggen motif Tenun Endek Bali ring produk-produk Dior. Mawinan pinaka cihna ngangkenin nilai wiadin hak pemilik Tenun Endek Bali, Christian Dior cumpu jagi ngicen pemberdayaan majeng usaha mikro, kecil dan menengah ring Bali sane makarya Tenun Endek, saha nagingin label pengakuan ring soang-soang produk Dior sane nganggen Tenun Endek Bali. Pinaka pamuput, MSP puniki patut setata kamargiang antuk watesnyane tigang warsa saha prasida kalanturang antuk kacumpuin malih sareng makakalih angga, madasar antuksurat maka miwah pamargi sane resmi.
Sesampune ngalinggatanganin perjanjian sane ngingkupin 11 Pasal sareng Senior Vice President General Counsel Christian Dior, Marie Champey, Gubernur Bali saking Desa Sembiran, Buleleng puniki sajeroning sambrama wacanannyane nguningayang rasa bangganyane mawinan prasida kapilih silih tunggil tetamian budaya Bali olih rumah mode kelas dunia saking Perancis. “Titiang ngaturang suksma majeng samian angga, pamekas majeng Christian Dior sane sampun milih Kain Tenun Endek Bali pinaka bahan baku koleksinyane. Puniki pinaka prakanti sane dahat mabuat saha bersejarah sajeroning nglestariang tetamian budaya Bali saha cihna melanin pabuat industri kecil dan menengah, pamekas para penenun Kain Endek Bali ring masa pandemi Covid-19,” baos pecak Anggota DPR-RI 3 Periode saking Fraksi PDI Perjuangan puniki ring ajeng Direktur Jenderal Pengembangan Ekspor Nasional, Kementrian Perdagangan RI, Bapak Kasan, Perwakilan Kementrian Dalam Negeri RI, Arif Hidayat, miwah Direktur Jenderal Amerika wiadin Eropa Kementrian Luar Negeri, I Gede Ngurah Swajaya, Duta Besar Indonesia majeng Perancis, Arrmanatha Christiawan NASIR, miwah ring ajeng Ketua Dekranasda Provinsi Bali, Ny. Putri Koster.
Mawinan Gubernur Bali sane taler pinaka Ketua DPD PDI Perjuangan Provinsi Bali puniki nenten surud-surud makarya antuk paletan-paletan sane tinas sajeroning nyayubin kawentenan tetamian budaya ring Bali sepisanan melanin pabuat industri kecil dan menengah, melarapan antuk ngaryanang sertifikat Kain Tenun Endek Bali pinaka Kekayaan Intelektual Komunal Ekspresi Budaya Tradisional antuk Nomor Inventarisasi EBT.12.2020.0000085 olih Direktorat Jenderal Kekayaan Intelektual, Kementerian Hukum dan HAM Republik Indonesia, daweg tanggal 22 Desember 2020. Kalanturang ngamedalang Surat Edaran Nomor 04 Warsa 2021 ngeninin indik Nganggen Kain Tenun Endek Bali / Kain Tenun Tradisional Bali, mangda para manggala Instansi Vertikal, Pimpinan Perguruan Tinggi, Bupati/Walikota, Pimpinan Perangkat Daerah, Pimpinan BUMN miwah BUMD, Pimpinan Perusahaan Swasta, wiadin Pimpinan Organisasi/Lembaga Kemasyarakatan sajebag Bali nginggilang saha ngajiang kawentenan Kain Tenun Endek Bali/Kain Tenun Tradisional Bali pinaka warisan budaya kreatif krama Bali. Taler ngelingang mangda nganggen busana malakar antuk Kain Tenun Endek Bali/Kain Tenun Tradisional Bali ring makudang-kudang parikrama satunggil rahina Anggara.
“SE Nomor 04 Warsa 2021 puniki semertinnyane wantah nyarengang para manggala ring Bali sajeroning ngwantu para pengerajin IKM/UMKM sane keni pawesana sangkaning pandemi Covid-19, saha pidabdab prakanti sane kawangun sareng Christian Dior taler pinaka pamargi saking Peraturan Gubernur Bali Nomor 99 Warsa 2018 ngeninin indik Pemasaran miwah Pemanfaatan Produk Pertanian, Perikanan, wiadin Industri Lokal Bali sane anut sareng visi Nangun Sat Kerthi Loka Bali melarapan Pola Pembangunan Semesta Berencana ngulati Bali Era Baru pamekas sajeroning ngukuhang saha nincapang adat, tradisi, seni wiadin budaya lokal. Prakanti puniki taler anut sareng prinsip Trisakti Bung Karno minakadi Berdaulat ring Politik, Berdikari ring Ekonomi, miwah Berkepribadian sajeroning Kebudayaan.
Sangkaning sambrama wacanan Gubernur Koster, ring galahe punika Marie Champey ngulemin Gubernur Bali, Wayan Koster saha angga mangda prasida rauh ring pabrik Christian Dior Perancis, miwah prasida nyantenang langsung sapunapi produksi busana punika kalaksanayang. “Titiang ngaptiang prakanti puniki nglantur kawentenane, saha titiang mapangapti prasida nyobiahang budaya-budaya luih sane tiosan, inggian ring Bali wiadin ring Indonesia,” pamuputnyane. (Gix)
Komentar