Gubernur Koster Ngaptiang Para Pegawai Pemerintah Pusat Daerah miwah Perbankan Ngwantu UMKM Tenun Endek Bali
- 16 Februari 2021
- 22:02 WITA
- News
DENPASAR, Balitopnews.com – Gubernur Bali, Wayan Koster ngaptiang pegawai Pemerintah Pusat, Pemerintah Daerah, Perbankan, miwah Lembaga tiosan sane akehnyane langkungan ring 100.000 diri, mangda prasida nyepihang gaji sane kapolihang sajeroning ngwantu perajin Tenun Endek Bali sane ring galahe mangkin taler keni pawesana kaon sangkaning pandemi Covid-19.
"Patut kauningin yening titiang ring Pemprov Bali madue 20.000 langkung pegawai, antuk 11. 000 diri pinaka PNS saha sisanipun pinaka pegawai kontrak. Titiang ngaptiang ring Instansi Vertikal, Bupati/Walikota, Pegawai Pemerintah, rauhing ring Perbankan sane ngamolihang gaji miwah tunjangan satunggil sasih, mangda prasida nganggen Kain Tenun Endek Bali sane kakaryanin ring Pulo Dewata. Antuk punika Industri Kecil Menengah (IKM) wiadin UMKM sane nglimbakang Industri Tenun Bali prasida katangiang malih ring masa pandemi Covid-19. Sesampune punika, prasida raris antuk sinarengan nganggen busana malakar antuk Kain Tenun Endek Bali/Kain Tenun Tradisional Bali ngawit rahina Anggara Kliwon Kulantir, tanggal 23 Pebruari 2021 sane jagi rauh,” baos Gubernur Bali.
Pangapti punika kabaosang ri kala ngicen tuntunan saha pakesiar mapaiketan ring SE Gubernur Bali Nomor 04 Warsa 2021 indik Nganggen Kain Tenun Endek Bali / Kain Tenun Tradisional Bali ring rahina Anggara Pon Ukir (16 Februari 2021) ring Wantilan Kertha Sabha, Rumah Jabatan Gubernur Bali, Denpasar.
Samian instansi sane rauh minakadi Ka Kanwil Kumham, Ka BPN Bali, Pimpinan BI Bali, Ka OJK Bali, Bupati/Walikota Sajebag Bali, Sekda Sajebag Bali, Perwakilan Kapolda Bali miwah Danrem 163/Wirasatya, Kepala L2 Dikti, Kepala BNI Bali, Kepala Bank Mandiri Bali, Kepala BRI Bali, Kepala BTN Bali, Kepala Bank Syariah, Dirut BPD Bali, Manajer Angkasa Pura I, Manajer ITDC Nusa Dua, Manajer Pelabuhan Benoa, Manajer PLN Bali, Manajer Garuda Bali, Ombudsman RI Bali, miwah para Rektor Sajebag Bali.
Pecak Anggota DPR-RI 3 Periode saking Fraksi PDI Perjuangan puniki nlatarang, Kain Tenun Endek Bali sampun kadaptarang pinaka Kekayaan Intelektual Komunal Ekspresi Budaya Tradisional ring Kementrian Hukum dan HAM RI. Salanturnyane tetamian budaya Bali puniki taler prasida ngamolihang galah nyihnayang angga ring jagat internasional, sesampune kalaksanayang prakanti pantaraning Pemerintah Provinsi sareng Christian Dior, sane nganggen Kain Tenun Endek Bali pinaka koleksi busana musim semi miwah musim panas Warsa 2021.
“Sajeroning prakanti sane kawangun, Titiang ngicen prasarat majeng sane nuenang Rumah Mode Kelas Dunia saking Perancis punika mangda nganggen Tenun Endek Bali sane sayuwakti katenun saha kaadol olih krama lokal Bali. Galahe punika raris tiang tuekang melih melarapan antuk ngamedalang SE Gubernur Bali Nomor 04 Warsa 2021 antuk ngaruruh Instansi Pemerintah wiadin Vertikal, Perguruan Tinggi, Bupati/Walikota, Pegawai Perangkat Daerah, BUMN rauhing BUMD mangda nganggen busana sane malakar antuk Kain Tenun Endek Bali/Kain Tradisional Bali ring sakancan parikrama sane kamargiang, nemonin rahina Anggara," baos Gubernur Bali saking Desa Sembiran, Buleleng puniki.(gix)
Komentar