Gubernur Koster Prasida Lobi Pemerintah Pusat Ngamolihang 700 Tali Langkung Vaksin majeng Bali ring 24 Maret 2021
- 25 Maret 2021
- 20:03 WITA
- News
DENPASAR, Balitopnews.com - Pangupaya Gubernur Bali Wayan Koster nglaksanayang lobi ring pemerintah pusat mapaiketan sareng kawentenan vaksin ring Bali nyihnayang pamikolih. Parindikan punika kacihnayang antuk kawentenan vaksin ring Bali sane kantos 700 tali langkung dosis ring tanggal 24 Maret 2021.
“Nyantenang kawentenan dosis sane sampun kaicen sadurungnyane, yening kaicen ping kalih, majanten sawetara wenten 350 tali krama sane sampun kavaksin,” baosnyane ri kala nyelehin pamargin vaksinasi Covid-19 OJK ring kantor Otoritas Jasa Keuangan Regional 8 Bali miwah Nusa Tenggara, Denpasar, Wraspati (25 Maret 2021).
Manutnyane mangda prasida nyujur kekebalan kelompok (herd immunity) paling nenten 70% utawi sawetara tigang yuta krama Bali patut kavaksin. “Mangda prasida nyujur 70 persen punika, majanten vaksinasi massal mangda digelis kamargiang. Puniki mapiteges yening muatang nem yuta dosis vaksin. Puniki sane ring galahe mangkin jagi kautsahayang ring pemerintah pusat,” baosnyane.
Koster nlatarang mangda ngamolihang dosis vaksin amunika majanten nenten dangan. Saantukan kawentenan vaksin kantun kawatesin, masaing sareng 216 panegara sane keni Covid-19. Sangkaning punika samian panegara mautsaha nglaksanayang lobi ring WHO mangda prasida ngamolihang vaksin. “Sane mangkin wantah petang dasa panegara sane sampun ngamolihang vaksin. Sangkaning utsaha saking Presiden Joko Widodo saha angga, Indonesia taler prasida ngamolihang vaksin,” baosnyane.
Gubernur Koster taler ngaptiang, krama Bali mangda digelis ngamolihang vaksin. Parindikan puniki nganutin sareng pangapti Presiden Joko Widodo ri kala rauh daweg tanggal 16 Maret sane sampun lintang. “Presiden uning yening pariwisata banget kakaonang sangkaning pandemi puniki, mawinan mangda prasida mungkah pariwisata majeng wisatawan duranegara majanten vaksinasi mangda digelis kamargiang,” baosnyane.
Lulusan ITB Bandung puniki taler maosang yening anggannyane selami puniki tan surud-surud nglaksanayang lobi ring Pusat sajeroning mungkah penerbangan internasional. “Titiang sampun taler nglaksanayang koordinasi sareng Kementrian Luar Negeri, Kementrian Pariwisata wiadin Kementrian Hukum dan HAM sajeroning mungkah penerbangan internasional. Nanging nyantenang kawentenan kasus harian sane kantun akeh ring Bali majanten parindikan punika durung prasida kamargiang,” baosnyane sinambi maosang yening Pemprov Bali nenten naenin nutup penerbangan internasional, nanging puniki pinaka kawijakan Pemerintah Pusat melarapan Keputusan Kementrian Hukum dan HAM Nomor 11 Warsa 2020 indik pelarangan sementara wisatawan duranegara ngeranjing ring wewidangan Negara Republik Indonesia.
Dane ngawewehin yening parindikan sane pateh taler kamargiang ring 216 panegara sane keni Covid-19. Napi malih makudang-kudang panegara ring Eropa taler ngamedalang geguat mapaiketan ring peraturan perjalanan majeng krama ipun.
Gubernur saking Desa Sembiran, Buleleng puniki taler ngajiang becik indik pamikamkam saking OJK sajeroning nglaksanayang vaksinasi majeng industri keuangan ring Bali. Saantukan manutnyane kawentenan vaksin industri vertikal ring Bali dados amongan saking Pemprov Bali.
Dane ngaptiang melarapan antuk pamargin vaksinasi massal olih makudang-kudang angga taler jagi prasida digelis nangiang ekonomi ring Bali. “Titiang ngaptiang mangda pamargin vaksinasi prasida kamargiang sinarengan. Yening prasida antuk mangda pegawe OJK sane akehnyane 107 diri, rahina mangkin kavaksin, mangda sayan gelis puput saha prasida taler digelis nglaksanayang vaksin sane kaping kalihn,” baosnyane,.
Kepala OJK Regional 8 Bali miwah Nusra Giri Tribroto nlatarang yening pamargin vaksinasi massal majeng industri keuangan puniki pinaka pikamkam saking OJK sane maprakanti sareng Pemprov Bali mangda pamargin vaksinasi prasida digelis puput.
“Pamargin vaksinasi jagi kalaksanayang kalih paletan, minakadi ring tanggal 25 Maret 2021 antuk 500 vaksinasi miwah ring tanggal 29 Maret 2021 taler antuk 500 vaksinasi,” baosnyane.
Ring pamargin parikrama punika taler karauhin antuk Anggota Komisi XI DPR RI I Gusti Agung Rai Wirajaya, Wakil Gubernur Bali Tjokorda Oka Artha Ardana Sukawati, Kapolda Bali Irjen Pol Putu Jayan Danu Putra Kepala OJK Regional 8 Bali dan Nusra Giri Tribroto, Kepala Kantor Perwakilan BI Provinsi Bali Trisno Nugroho, Kepala Kantor Wilayah Ditjen Perbendahraan Prov Bali Tri Budhianto, miwah Kepala Kantor Ombudsman Prov Bali Umar Ibnu Alkhatab.(gix)
Komentar