Wakil Gubernur Bali Cok Ace Ngrauhin Pamargin “ Nedunang” Ida Bhatara Lingsir ring Pura Agung Besakih
- 26 Maret 2021
- 21:03 WITA
- News
KARANGASEM, Balitopnews.com - Wakil Gubernur Bali Tjokorda Oka Artha Ardhana Sukawati kasarengin Sekretaris Daerah Provinsi Bali Dewa Made Indra nyarengin pamargin Nedunang Pralinggan Ida Bhatara Lingsir sajeroning Karya Tawur Tabuh Gentuh lan Karya Ida Bhatara Turun Kabeh ring Pura Penataran Agung Besakih, Wraspati (25 Maret 2021)
Wagub sane ketah kabaosang Cok Ace kasarengin Sekda Dewa Made Indra wiadin Manggalaning OPD Pemprov Bali ngamiletin Upacara Nedunang Ida Bhatara Lingsir saking Bale Pesimpenan Agung ngruruh Padma Tiga sane salanturnyane kalinggihang ring Bale Pesamuan Agung, sajeroning dudonan Karya Tawur Tabuh Gentuh lan Karya Ida Bhatara Turun Kabeh ring Pura Agung Besakih antuk pucak pamargin karya kamargiang ring galah 09.00 Wita, nemonin rahina Redite Pon Julungwangi, 28 Maret 2021.
Sesampun pamargin Nedunang Ida Bhatara, Wagub Cok Ace saha angga nglaksanayang pangubaktian ring Penataran Agung Pura Besakih. Melarapan antuk upacara puniki, Wagub Cok Ace sane taler pinaka Panglingsir Puri Ubud puniki ngaptiang mangda samian umat prasida kaicen karahayuan kasukertan.
”Titiang ngaptiang melarapan antuk upacara puniki, jagi ngicen kasukertan saha karahayuan majeng samian umat Hindu miwah pandemi Covid-19 digelis matilar mawinan krama Bali prasida ngamargiang swaginannyane sekadi jati mula, prasida raris nyujur kasukertan melarapan antuk visi Nangun Sat Kerthi Loka Bali,” baos Wagub sane taler pinaka Guru Besar ISI Denpasar.
Manggala prawartaka karya, Jro Mangku Widiarta nlatarang, Karya Tawur Tabuh Gentuh lan Karya Ida Bhatara Turun Kabeh ring Pura Penataran Agung Besakih kamargiang selami roras rahina, ngawit saking tanggal 28 Maret kantos 8 April 2021. Sadurung kamargiang upacara Nedunang Pralingga Ida Bhatara taler sampun kadulurin antuk upacara Tawur Tabuh Gentuh, sane kamargiang ring rahina Saniscara Pon Gumbreg, tanggal 13 Maret 2021 sane sampun lintang.
Upacara Penganyar saking Kabupaten Karangasem, jagi kamargiang ring rahina Soma Wage Julungwangi, 29 Maret 2021, saha salanturnyane kalanturang antuk Kabupaten/Kota tiosan sajebag Bali. “Majeng pamargin Penganyar wiadin Penyineban jagi kamargiang ring galah 09.00 Wita kantos 19.00 Wita nemonin rahina Wraspati Wage Sungsang, tanggal 8 April 2021,” panlatarannyane.
Pamargin upacara taler karauhin antuk Kapolda Bali, Kapolres Karangasem, Bupati kasarengin Wakil Bupati Bangli, Bupati Karangasem, PHDI Bali saha angga miwah manggalaning SKPD ring lingkungan Pemerintah Provinsi Bali.(Gix)
Komentar