Nlatarang LKPJ, Gubernur Koster Nguningayang Pamikolih ring Warsa 2020
- 29 Maret 2021
- 22:03 WITA
- News
DENPASAR, Balitopnews.com - Gubernur Wayan Koster nguningayang Laporan Keterangan Pertanggungjawaban (LKPJ) sajeroning Rapat Paripurna ka-2 DPRD Provinsi Bali, Soma (29 Maret 2021).
Gubernur Koster nlatarang gegambaran indik kahanan sane nibenin ring warsa 2020. “I raga sareng sami uning, ring warsa 2020 katiben antuk pandemi Covid-19 sane majanten nenten wenten sane narka jagi sekadi puniki. Puniki dados warsa sane majanten kaarepin antuk pakibeh ageng mawinan muatang kesabaran revolusioner,” baosnyane.
Gubernur nlatarang antuk kumulatif, perekonomian Bali selami warsa 2020 kalikita tumbuh negatif (terkontraksi) sedalam -9,31 persen utawi keni perlambatan yening saihang sareng warsa sadurungnyane sane kalikita tumbuh 5,63 persen.
Majeng PDRB per kapita krama Bali ring warsa 2020 wenten ring Rp 51,18 yuta, nedunang yening saihang sareng warsa 2019 sane agengnyane Rp 58,14 yuta saha alitan ring angka rata-rata nasional sane agengnyane Rp. 56,90 yuta. Akeh krama miskin ring Bali ring bulan September 2020 wenten 196,92 tali utawi 4,45 persen. Yening saihang sareng angka nasional, akeh krama miskin ring Bali majanten alitan. Saantukan ring nasional, akeh krama miskin kantos 27,55 yuta diri utawi sawetara 10,19 persen.
Tiosan punika, Tingkat Pengangguran Terbuka (TPT) ring bulan Agustus 2020 kalikita wenten 5,63 persen, nincap 4,06 poin saihang sareng TPT Agustus 2019 sane kalikita agengnyane 1,57 persen. Salanturnyane Indeks Pembangunan Manusia (IPM) Bali ring warsa 2020 kantos 75,50, nincap yening saihang sareng warsa 2019 sane kalikita agengnyane 75,38 persen.
Anggaran Pendapatan sane karencanayang Rp. 6,092 triliun prasida kadagingin wantah Rp.5,718 triliun utawi 93,36%. Majeng Anggaran Belanja Daerah sane karencanayang agengnyane Rp.6,924 triliun prasida kadagingin Rp.6,358 triliun utawi 91,82%.
Ring widang legislasi prasida kaasilang 40 peraturan sane dahat mabuat , minakadi 15 Peraturan Daerah miwah 25 Peraturan Gubernur.
“Pendemi Covid-19 ngelingang I raga sareng sami yening durung madue geguat mapaiketan sareng PMI. Kawiaktiannyane PMI ageng pisan yasannyane,” baosnyane.
Melarapan Pergub punika pemerintah kaaptiang prasida ngicen uratian ageng majeng PMI krama Bali.
"Mangda prasida kauningin saking napi saha ring dija makarya ring dura negara. Mawinan yening benjang pungkur wenten pikobet wiadin prakara majanten prasida digelis kauningin,” baosnyane.
Ring program Bidang Pangan, Sandang, wiadin Papan, ekspor asil pertanian nincap, sekadi manggis, kakao, buah naga, salak, kopi, wiadin jeruk nipis ka panegara Tiongkok, Uni Emirat Arab, Eropa miwah Maladewa. Tiosan punika, taler sampun kalaksanayang penguatan industri sandang antuk maprakanti sareng Dekranasda Provinsi Bali melarapan pelestarian wiadin promosi tenun songket, endek, miwah produk cinderamata. Panincap ekspor kasokong antuk maskapai penerbangan Garuda Indonesia sane mungkah penerbangan langsung pesawat kargo saking Denpasar ka Hongkong satunggil wuku.
Program widang pendidikan, ring warsa 2020 sampun kawangun 4 unit sekolah anyar minakadi SMAN 1 ring Kecamatan Abang, SMKN 2 ring Kecamatan Kubu, SMAN 9 miwah SMAN 10 ring Kota Denpasar antuk ageng anggaran Rp. 48 milyar sane mawit saking APBD Semesta Berencana Provinsi Bali.
Kantun ring widang pendidikan, sajeroning ngarepin pawesana saking kawentenan Covid-19 majeng krama, Pemprov ngamedalang wantuan sosial pendidikan sane agengnyane Rp. 24,8 milyar majeng 19.882 sisia SD, SMP, SMA/SMK/SLB, miwah majeng 9.423 mahasiswa Perguruan Tinggi Negeri wiadin Swasta.
Ring widang kesehatan, Pemprov uleng sajeroning pangupaya nambakin pangelahlah Covid-19 antuk nureksain becik pamargin protokol kesehatan, nincapang kawentenan layanan uji swab berbasis PCR wiadin rapid test antigen. Tiosan punika taler katincapang ring layanan pasien Covid-19 melarapan antuk nyediayang genah karantina wiadin rumah sakit rujukan sane kategepin antuk sarana ipun miwah tenaga medis sane becik, rauhing ring insentif majeng tenaga medis wiadin non- medis.
Pamikolih tiosan minakadi ring widang Adat, Tradisi, Seni, wiadin Budaya. Gubernur Koster prasida ngamedalang dana Desa Adat soang-soang sane agengnyane Rp. 350 juta antuk samian anggaran agengnyane Rp. 522,5 milyar majeng 1.493 Desa Adat sane katransfer langsung ka rekening Desa Adat.
Pamikolih tiosan minakadi puputnyane pewangunan Kantor Majelis Desa Adat Provinsi Bali miwah 6 gedung Kantor Majelis Desa Adat Kabupaten/Kota (Tabanan, Jembrana, Buleleng, Karangasem, Bangli, miwah Denpasar) antuk ageng anggaran Rp. 31 milyar sane mawit saking dana tanggung jawab sosial (CSR) BUMN, BPD Bali, miwah perusahaan swasta nasional. Mapaiketan ring gedung Kantor Majelis Desa Adat Kabupaten Gianyar kawangun antuk anggaran Rp. 3,5 milyar sane mawit saking APBD Kabupaten Gianyar. Ring warsane puniki kalanturang antuk pewangunan gedung Kantor Majelis Desa Adat Kabupaten Badung miwah Kabupaten Klungkung antuk ageng anggaran Rp. 6,6 milyar sane mawit saking dana tanggung jawab sosial (CSR) BUMN.
Ring widang pariwisata, anggannyane sampun nglaksanayang pamargi saha prasida ngutsahayang dana hibah pariwisata sane kaicen majeng pemerintah kabupaten/kota wiadin pelaku usaha pariwisata antuk ageng anggaran Rp. 1,183 triliun sane mawit saking APBN. Saking akeh punika, wenten Rp. 948 milyar langkung majeng Kabupaten Badung miwah sisannyane majeng Kabupaten/Kota tiosan.
Ring widang infrastruktur, kawentenan anggaran negara sane ngirangang sangkaning pandemi Covid-19, Pemprov Bali kasarengin Pemerintah Pusat kantun prasida nglaksanayang pewangunan infrastruktur darat, laut, wiadin udara sane katureksain strategis, fundamental miwah monumental. Proyek punika minakadi panglantur program pewangunan shortcut ruas jalan Singaraja - Mengwitani ring titik 7 miwah 8 warsa 2021. Ageng anggaran pembebasan lahan minakadi Rp. 193,5 milyar sane mawit saking APBD Semesta Berencana Provinsi Bali.
Majeng pewangunan konstruksi titik 7 miwah 8 ageng anggaran Rp. 95 milyar sane mawit saking APBN Kementerian PUPR. Tiosan punika, sampun ngawit kamargiang program pembangunan Pelabuhan Segitiga Sanur, Nusa Penida, miwah Nusa Ceningan sane kakawitin ring warsa 2020 saha jagi puput ring warsa 2022 antuk ageng anggaran Rp. 555 milyar mawit saking APBN Kementerian Perhubungan.
Kantun ring infrastruktur, warsa 2020 taler kamargiang penataan kawasan suci Besakih sane kakawitin saking pembebasan lahan antuk ageng anggaran Rp. 174 milyar mawit saking APBD Semesta Berencana Provinsi Bali. Pewangunan fisik jagi kalaksanayang ngawit warsa 2021 antuk ageng anggaran Rp. 784 milyar minakadi Rp. 276 milyar mawit saking APBD Semesta Berencana Provinsi Bali miwah Rp. 508 milyar mawit saking APBN Kementerian PUPR.
Ring warsa 2020 sampun kakawitin pewangunan Kawasan Pusat Kebudayaan Bali ring Kabupaten Klungkung, sane kakawitin antuk normalisasi Tukad Unda antuk ageng anggaran Rp. 270 milyar mawit saking Kementerian PUPR miwah pembebasan lahan (paletan ka-1) antuk ageng anggaran Rp. 52 milyar mawit saking APBD Semesta Berencana Provinsi Bali. Pewangunan jagi kalanturang ring warsa 2021 kantos warsa 2022 antuk anggaran Rp. 2,5 triliun mawit saking pinjaman tanpa bunga program Pemulihan Ekonomi Nasional (PEN). Palinggatanganan Perjanjian Pinjaman PEN sampun kalaksanayang tanggal 28 Desember 2020 ring Jakarta.
Tiosan ring paparan umum LKPD Gubernur, Rapat Parupurna galahe mangkin taler katlatarang Ranperda Inisiatif Dewan ngeninin indik perubahan ketiga atas Perda Nomor 3 Warsa 2011 indik Retribusi Jasa Usaha. Ketua Badan Pembentukan Peraturan Daerah (Bapem Perda) DPRD Bali Ketut Tama Tenaya nlatarang, usulan puniki kauningayang saantukan makudang-kudang pasal sampun nenten anut sareng kahanan sane wenten galahe mangkin.
Sidang Paripurna sane kapucukin antuk Ketua DPRD Bali Nyoman Adi Wiryatama taler karauhin antuk Wakil Gubernur Bali Tjokorda Oka Artha Ardhana Sukawati (Cok Ace), Sekda Provinsi Bali Dewa Made Indra, Manggalaning OPD Pemprov Bali miwah anggota DPRD Bali sane ngamiletin antuk offline miwah online.(gix)
Komentar