Gubernur Koster Ngaresmiang Pasar Banyuasri Pinaka Kado Wanti Warsa Kota Singaraja ka-417
- 30 Maret 2021
- 22:03 WITA
- News
Peresmian Pasar Banyuasri pinaka adiah majeng Kota Singaraja sane mikelingin wanti warsa ka-417, sepisanan pinaka galah sajeroning nangiang ekonomi krama ring Kabupaten Buleleng.
"Tiang ngajiang becik pangupaya saking Bupati Buleleng sampun ngwangun Pasar Banyuasri. Ngawit tiang alit, pasar puniki sampun wenten ring Buleleng, nanging kawentenane kirang kapidabdabin. Nanging wau mangkin tiang prasida nyantenang pasare puniki becik, antuk nganggen desain arsitektur Bali," baos Gubernur Bali saking Desa Sembiran, Buleleng.
Koster sane taler pinaka Ketua DPD PDI Perjuangan Provinsi Bali puniki ngaptiang majeng Pemerintah Kabupaten Buleleng mangda prasida ngardi Pasar Banyuasri pinaka lokomotif ekonomi samian krama melarapan antuk ngamargiang Peraturan Gubernur Bali Nomor 99 Warsa 2018 nganinin indik Pemasaran miwah Pemanfaatan Produk Pertanian, Perikanan wiadin Industri Lokal Bali.
"Buleleng puniki pinaka sentra pertanian pinih ageng ring Bali, akeh produk lokal khas Buleleng wenten iriki. Ngawit saking anggur, kopi, poh, manggis, rambutan, kantos duren. Tiosan ring pertanian, daging ulam segara taler kakantenang akeh saha patut kalimbakang malih. Tiang ngaptiang mangda anggur ring Gerokgak kakelola mawinan prasida ngasilang industri olahan, mawinan prasida nincapang nilai ekonomi saha nglantur kawentenane," baos Koster sane sampun ngamedalang Peraturan Gubernur Bali Nomor 1 Warsa 2020 nganinin indik Tata Kelola Minuman Fermentasi dan/atau Destilasi Khas Bali.
Wayan Koster sane nyepihang galahnyane numbas buah lokal, dodol Penglatan, jajan gambir, kopi Banyuatis miwah gula aren Pedawa sane kakemas antuk modern ring Pasar Banyuasri, ngawewehin yening sesampune Pandemi Covid-19 puput, Dane jagi ngardi sistem ekonomi Bali sane becik, antuk ngadungang struktur perekonomian Bali minakadi pertanian, kelautan, industri kerajinan rakyat sane madasar antuk budaya lokal sareng pariwisata.
“Tiang mapengapti majeng Bupati Buleleng,pamekas pengelola pasar mangda prasida ngardi pasare puniki pinaka pasar sane resik, trepti saha disiplin antuk ngwatesin kawentenan plastik sekali pakai nganutin sareng Peraturan Gubernur Bali Nomor 97 Warsa 2018 indik Pembatasan Timbulan Sampah Plastik Sekali Pakai miwah nganutin Peraturan Gubernur Bali Nomor 47 Warsa 2019 nganinin indik Pengelolaan Sampah Berbasis Sumber,” baosnyane.
Bupati Buleleng Putu Agus Suradnyana maosang Pasar Banyuasri kawangun nganggen konsep gotong royong antuk dana Rp 175 milyar mawit saking APBD Pemkab Buleleng Rp 100 milyar, APBD Provinsi Bali Rp 50 milyar, miwah Pemerintah Kabupaten Badung Rp 25 milyar.
"Tiang ngaturang suksma pisan mawinan wenten pasar sekadi mangkin saha tiang masemaya jagi misuguhang produk lokal khas Buleleng pinaka cihna pamargin Pergub Bali Nomor 99 Warsa 2018," baos Bupati Buleleng 2 periode punika.
Kepala Perwakilan Bank Indonesia (BI) Provinsi Bali, Trisno Nugroho maosang Pasar Banyuasri pinaka pasar paling megah wiadin The Biggest Market in Bali.
"Pasar sane kahanan ipun tradisional modern taler ngamargiang digitalisasi pembayaran berbasis Quick Response Code Indonesian Standard (QRIS). Mawinan ring masa pandemi, digitalisasi pembayaran berbasis QRIS dados parindikan sane dahat mabuat kalaksanayang pinaka pangupaya ngamargiang protokol kesehatan," baosnyane.(gix)
Komentar