Doni Monardo Nyokong Pemprov Bali Makarya Satgas Karantina Khusus Nambakin Panglahlah Covid-19 saking Dura Negara
- 02 April 2021
- 21:04 WITA
- News
DENPASAR, Balitopnews.com - Kepala Badan Nasional Penanggulangan Bencana (BNPB) sepisanan pinaka Ketua Satuan Tugas (Satgas) Penanganan Covid-19, Doni Monardo nyokong Pemerintah Provinsi Bali mangda makarya Satgas Karantina khusus sajeroning nincapang panureksan majeng Warga Negara Indonesia (WNI) wiadin Warga Negara Asing (WNA) sane ngranjing ka Indonesia melarapan antuk Bali.
Melarapan antuk Rapat Koordinasi Penanganan Covid-19 kasarengin Pemprov Bali ring Kantor Gubernur Bali Wraspati (1 April 2021), Doni ngaptiang kakaryanin Satgas Karantina sane nyarengang makudang-kudang angga saking lintas Kementerian/Lembaga kawantu TNI/Polri, mawinan pamarginipun prasida tinas saha mandiri.
“Pangaptine Satgas Karantina puniki prasida mandiri saha samian angga inggian Kementerian/Lembaga puniki wenten ring siki komando, mawinan pangrauh WNA miwah WNI ring Bali sayuwakti melarapan antuk prosedur kekarantinaan kesehatan nganutin geguat sane wenten,” baos Doni.
Manut Doni, parindikan puniki mabuat kalaksanayang saantukan tiosan sajeroning nees kawentenan angka kasus aktif ring Indonesia sepisanan taler nambakin kawentenan panglahlah strain baru Covid-19 sane prasida wenten sangkaning lalu lintas krama sane ngranjing ring Indonesia melarapan antuk Bali.
Napi malih galah libur panjang wiadin rahina Idul Fitri sane sampun nampek taler prasida ngawetuang ramia saha patut katambakin mangda nenten raris nincapang kawentenan kasus Covid-19.
Yening parindikan puniki kantos nibenin, majanten pangapti sajeroning nangiang ekonomi krama melarapan antuk widang pariwisata wiadin budaya jagi kapialangin malih.
"Yening parindikan puniki nenten kalaksanayang, titiang ngosahang ring kawentenan strain baru saking makudang-kudang penagara taler prasida nglahlah ring Bali, ngawinang dados pialang malih sajeroning mungkah pariwisata Bali,” baos Doni.
Doni taler ngaptiang melarapan antuk kinerja Satgas Karantina punika, prasida digelis nangiang ekonomi krama.
Sekadi sane kauningin, selami pandemi nibenin Indonesia, Bali pinaka silih tunggil wewidangan sane eknomi ipun kaon pisan sangkaning widang pariwisata sane banget kaandelang, kapialangin antuk pandemi covid-19, napi malih punika pinaka panyokong devisa pinih ageng.
"Saantukan Bali ring nasional punika katiben tekanan ekonomi sane ageng pisan. Sapunapi mangda Bali prasida midabdabin angga prasida raris ngarepin kawentenan Covid-19 saha prasida taler nangiang ekonomi krama. Yadiastun durung prasida mawali sekadi jati mula, paling nenten prasida katangiang saka kidik. Mawinan nenten raris katiben antuk Covid-19 saha taler nenten katiben antuk PHK,” baos Doni.
Mapaiketan ring punika, Pemerintah Indonesia nenten surud-surud ngicen panyokong majeng Pemerintah Provinsi Bali ngawit saking Presiden Joko Widodo wiadin makudang-kudang Kementerian/Lembaga tiosan rumasuk Satgas Penanganan Covid-19.
Uratian ageng punika kalaksanayang majeng Bali riantukan Bali taler pinaka ‘etalase’ Indonesia ring jagat internasional. Sangkaning punika, yening Bali prasida ngarepin Covid-19, majanten kapercayan krama internasional majeng panegara Indonesia sayan becik.
"Bali puniki pinaka pintu masuk miwah pinaka etalase panegara puniki. Yening Bali prasida nees Covid-19, majanten kawentenan panegara Indonesia ring dunia internasional jagi dahat becik,” baos Doni.(gix)
Komentar