Gubernur Koster Ngaptiang Pusat Ngamedalang Kawijakan Sane Tinas Sajeroning Nagiang Ekonomi Bali

  • 09 April 2021
  • 21:04 WITA
  • News
Parikrama "Sarasehan Akselerasi Pemulihan Ekonomi Nasional - Temu Stakeholders" ring Nusa Dua, Sukra (9 April 2021).

BADUNG, Balitopnews.com - Gubernur Bali Wayan Koster ngaptiang kawijakan sane tinas utawi spesifik wiadin spasial sajeroning nangiang ekonomi Bali risampune keni pandemi Covid-19, pamekas majeng pariwisata.

"Sangkaning punika, majanten kabuatang mangda pemerintah pusat wiadin DPR ngamedalang kawijakan sane tinas utawi spesifik majeng Bali," baos Gubernur Koster ring parikrama "Sarasehan Akselerasi Pemulihan Ekonomi Nasional - Temu Stakeholders" ring Nusa Dua, Sukra (9 April 2021).

 

Gubernur Koster taler ngaptiang samian pemangku kebijakan ring RI, mangda sampunang kadi basita paribasane 'habis manis sepah dibuang' sajeroning ngarepin agengnyane pawesana kaon sangkaning pandemi sane ngawinang kontraksi ekonomi ring Bali. 

 

"Yening kahanan ipun sekadi daweg durung pandemi, ageng pisan panyokong Bali majeng devisa sane karauhang saking pariwisata. Nanging sane mangkin kaon pisan, antuk kontraksi ekonomi sane pinih kaon yening saihang sadurung-sadurungnyane," baosnyane.

 

" Pelaku wisata keni pawesana ageng pisan. Akeh sane keni PHK, dirumahkan, nenten mrasidayang naur gaji, napi malih wenten sane nenten prasida nglaksanayang operasional. Titiang rinasa bangga antuk pelaku wisata Bali sane kawentenannyane sabar, saha nenten prasida narka malih pidan pandemi puniki jagi matilar," baosnyane.

 

Dane nlatarang, ri kala kahanan ipun normal medio 2019 sane sampun lintang, wenten 6,3 yuta wisataman duranegara rauh ke Bali utawi sawetara 39 persen saking samian wisman nasional. Angka punika mapiteges yening ageng devisa 29 persen saking samian devisa sektor pariwisata Indonesia. 

 

"Durung ring kawentenan wisdom,  wenten sawetara 10 ,5 yuta diri sane rauh ke Bali. Cutetnyane, Ekonomi banget ngandelang pariwisata, saha yening kahanan ipun normal pertumbuhan ekonomi Bali setata agengan saking rata-rata nasional," baosnyane.

 

Gubernur ngaptiang mangda pelaku pariwisata Bali wiadin sane mapaiketan ring punika, kaicen kawijakan fiskal spesifik, sane sayuwakti prasida nangiang ekonomi Bali.

 

"Titiang ngajiang pisan utsaha ring Pusat miwah DPR sajeroning nangiang Bali. Sane kaaptiang pinaka usulan mangda prasida ngamedalang modal kerja ring sektor-sektor sane banget kakaonang sangkaning Covid-19, minakadi pariwisata, perhotelan, wiadin restoran. Pinjaman lunak antuk bunga ringan. Tiang nureksain yening ring warsa 2023 kahanannyane jagi sayan becik, pelaku pariwisata jagi prasida ngamargiang swadarmannyane, saantukan samian punika majanten setata eling naur pajak," baos Gubernur Koster. 

 

Dane taler nyokong pangremba saking bank-bank duwen negara sane maingkupan ring Himbara mangda prasida dados leader ring pangupaya punika.

 

Menteri Keuangan Sri Mulyani Indrawati nuekang pemerintah melarapan Peraturan Menteri Keuangan (PMK) Nomor 32/2021 indik Tata Cara Penjaminan Pemerintah majeng Pelaku Usaha Korporasi melarapan Badan Usaha Penjaminan sane kajudi, sajeroning pamargin Program Pemulihan Ekonomi Nasional,  ngaptiang mangda perbankan purun nyelangang dana majeng para pelaku usaha mikro, kecil, dan menengah (UMKM). 

 

Manutnyane PMK 32/2021 matetujon, tiosan mangda perbankan dangan ngicen pinjaman, para UMKM taler wenten sane sayuwakti kacagerang nyelang jinah.  Punika sami kapastikayang saantukan samian resiko jagi kaambil antuk pemerintah.

 

“Punika sami taler kaanutang sareng kemampuan pamekas perusahaan ring widang hotel, restoran, wiadin akomodasi utawi Horeka sane keni pawesana ageng mawinan prasida raris ngamolihang pinjaman sane ringan,” baosnyane ring ajeng para pelaku usaha ring Bali.

 

Pecak Direktur Bank Dunia puniki nyarengang samian angga mangda nganutang instrumen wiadin policy sajeroning ngarepin pandemi. "Mangda setata nincapang ring widang usaha, antuk kerjasama sane becik, nglaksanayang kalibrasi wiadin re- kalibrasi, mawinan industri miwah perbankan prasida katangiang," baosnyane.

 

Manut Menkeu, yening samian angga antuk sinarengang ngarembe, majanten ring warsa 2021 kahanannyane jagi sayan becik, napi malih  pamargin vaksinasi sane prasida ngicen iyusan becik. 

 

"2021, kajantenang sampun sayaga, ngadungang pantaraning prokes sareng ekonomi.  Mangda setata madue kayun samian jagi sayan becik. Sampun sayan wenten sunar becik, sajeroning matangi saking masa kaon. Samian mangda nyarengin ngarembe antuk karumaketan mawinan prasida ngaonang Covid-19," baosnyane.

 

Nyawis usulan Gubernur Bali Ketua Dewan Komisioner Otoritas Jasa Keuangan (OJK) Wimboh Santoso maosang bank-bank duwen negara utawi Himbara (Himpunan Bank-bank Milik Negara) sayaga ngamedalang modal kerja majeng sektor-sektor sane kaon pisan sangkaning Covid-19 minakadi pariwisata, perhotelan, wiadin restoran, rumasuk ring Provinsi Bali sane kautamayang.

 

Bank Himbara punika minakadi  papat bank BUMN minakadi PT Bank Rakyat Indonesia Tbk (BRI), PT Bank Mandiri Tbk (BMRI), PT Bank Negara Indonesia Tbk (BNI), dan PT Bank Tabungan Negara Tbk (BTN). 

 

"Sektor pariwisata, perhotelan, miwah restoran jagi kautamayang ring Bali. Dibi wengi sampun kalaksanayang paruman sareng Pak Suahasil (Wakil Menteri Keuangan Suahasil Nazara, red) miwah Dirut Himbara ngawit kadata samian nasabah sane kaduwenang Himbara mangda prasida kalaksanayang rolling modal kerja tambahan," baos Wimboh.

 

Gubernur  Bank Indonesia (BI) Perry Warjiyo ngaptiang Bank Pembangunan Daerah (BPD) miwah bank-bank swasta nasional digelis nedunang suku bunga kredit nganutin pemangkasan suku bunga acuan utama sane kalaksanayang bank sentral. Pangupaya puniki kabuatang sajeroning nangiang ekonomi nasional sangkaning pandemi Covid-19.

 

"Sane mangkin nyantosang BPD wiadin bank swasta sane tiosan. Ngiring tedunang suku bunga, mangda sareng-sareng nyokong panglimbak ekonomi," baos Perry.

 

Parikrama saresehan puniki kapikamkam olih Otoritas Jasa Keuangan(OJK) sajeroning ngadungang pantaraning pemerintah sareng stakeholder sajeroning nangiang widang ekonomi. Ring galahe mangkin kalaksanayang ring Pulo Bali risampun sadurungnyane kalaksanayang ring Semarang miwah Surabaya. Narawakya sane rauh minakadi Ketua  OJK RI Wimboh Santoso, Menteri Keuangan Sri Mulyani Indrawati, Gubernur Bank Indonesia Perry Warjiyo , Ketua Komisi XI DPR RI Dito Ganinduto miwah industri jasa Keuangan.(gix)


TAGS :

Komentar