Kadiskominfos Bali Nuekang Kabupaten/Kota ring Provinsi Bali wenten ring Zona Orange

  • 22 Juni 2021
  • 18:06 WITA
  • News
Kepala Dinas Komunikasi, Informatika dan Statistik (Diskominfos) Provinsi Bali, Gede Pramana

 

DENPASAR, Balitopnews.com - Pemerintah Provinsi Bali patut nguningayang panampen mapaiketan ring kawentenan gambar infografis indik penetapan PPKM Mikro ring media sosial wiadin aplikasi pesan instan. Gambar infografis sane mamurda ‘Rumasuk DKI! Puniki makudang-kudang wewidangan sane jagi keni PSBB ketat’ akeh wenten ring media sosial ri sampune wenten penetapan penguatan PPKM Mikro olih pemerintah pusat sane ngawit kamargiang saking tanggal 22 Juni 2021 puniki.

Manut gatra sane kauningayang Kepala Dinas Komunikasi, Informatika dan Statistik (Diskominfos) Provinsi Bali, Gede Pramana, Anggara (22/6) yening saking seseleh sane kalaksanayang, gambar infografis punika pinaka gambar saking situs berita CNBC Indonesia antuk murda gatra sane pateh daweg tanggal 6 Januari 2021. Gatra punika mapaiketan sareng penetapan PSBB Ketat tanggal 11 kantos 25 Januari 2021 saha nenten PPKM Mikro 22 Juni 2021.

"Kawentenan gambar punika ring galahe mangkin majanten dahat kaon pisan kawentenane, saantukan krama prasida ngubungang gambar punika sareng kawijakan PPKM Mikro 22 Juni 2021," baosnyane.

Tiosan punika, ring gambar punika taler nlatarang kawentenan pulo Bali pinaka zona merah. Kawiaktiannyane sane mangkin kawentenan samian kabupaten/kota ring provinsi Bali wenten ring zona orange / risiko sedang. Kawentenan gambar sane sampun suwe puniki majanten pinaka disinformasi majeng krama, sane prasida ngosahang krama.

Sangkaning punika, Pemprov Bali ngaptiang mangda krama nenten malih nglimbakang gambar infografis punika.

Pemerintah Provinsi Bali melarapan antuk Satgas Penanganan Covid-19 Provinsi Bali ngelingang samian angga mangda setata ngamargiang becik protokol kesehatan, saha ngutsahayang sapunapi mangda vaksinasi prasida kalaksanayang nganutin ring pabuat ipun. Pramana ngaptiang samian angga uleng ring kalih parindikan sane mabuat punika, saha nenten raris keni provokasi saking gatra hoax. (Gix) 


TAGS :

Komentar