WFB Nenten Pinaka Wiwilan Panincap Kasus Covid-19 ring Bali
- 23 Juni 2021
- 13:06 WITA
- News
DENPASAR, Balitopnews.com - Pemerintah Provinsi Bali Nuekang Yening Kawijakan Work From Bali Nenten Ngawetuang panincap Covid-19 ring Bali.
Pelaku Perjalanan Dalam Negeri sampun nglintangin makudang-kudang prasarat minakadi asil swab test negatif mangda prasida ngranjing ka Bali nganutin sareng protokol kesehatan sane wenten.
Sekadi punika kabaosang Kepala Dinas Komunikasi, Informatika dan Statistik Provinsi Bali Gede Pramana sajeroning siaran persnyane ring rahina Anggara (22 Juni 2021) wengine ring Denpasar, nampenin gatra sane wenten ring silih tunggil media online sane ngambil murda ‘Work From Bali dados silih tunggil wiwilan panincap kawentenan Corona, Kasus nincap kantos ping kalih nikel’.
“Panincap kawentenan Covid-19 nenten wenten ring Bali kemanten, nanging taler kapanggihin ring makudang-kudang wewidangan tiosan ring Indonesia, dadosne nenten patut yening kabaosang yening kawijakan WFB pinaka wiwilan ipun,” baos pecak Kadis Perumahan dan Permukiman Provinsi Bali puniki.
Panincap kasus puniki minakadi sangkaning parikrama krama sane sayan nincap saha kawentenan mutasi anyar saking virus corona.
Dane nglanturang yening kawijakan WFB sane kamedalang antuk pemerintah pusat sampun patut pamargine saantukan pawesana kaon sangkaning pandemi Covid-19 banget mawesana kaon majeng Bali sane ngandelang pariwisata.
“Kawijakan WFB jagi ngicen pawesana becik majeng ekonomi Bali mangda ekonomi Bali prasida katangiang malih antuk setata ngutamayang protokol kesehatan,” baos birokrat saking Wangaya Denpasar.
Dane ngaptiang mangda panureksan majeng kawijakan sane wenten nenten madasar antuk panapen krama wiadin logika kewanten, nanging mangda taler kasokong antuk kawentenan data wiadin kahanan sosial ekonomi krama.(gix)
Komentar