Sesampune Mahasabha XII, PHDI Ngamargiang Upacara Mejaya-jaya ring Pura Agung Besakih
- 20 November 2021
- 15:11 WITA
- News
AMLAPURA, Balitopnews.com - Parisada Hindu Dharma Indonesia (PHDI) ngamargiang upacara Mejaya-jaya ring Pura Agung Besakih, Kabupaten Karangasem nepek ring rerahinan jagat Kuningan, Saniscara (20 November 2021).
Ketua Pengurus Harian PHDI Pusat Periode 2021-2026, Mayjen TNI (Purn.) Wisnu Bawa Tenaya maosang, upacara Mejaya-jaya kamargiang mapaiketan sareng pamuput pamargin Mahasabha XII sane sampun kamargiang ring makudang rahina sadurungnyane.
"Sane mangkin sareng sami ngrastiti majeng Ida Sang Hyang Widhi Wasa mangda samian program sane jagi kamargiang ring salanturnyane prasida antar saha Ida Batara asung kertha wara nugraha, saha samian prasida nemu labda karya," baosnyane.
Mayjen TNI (Purn.) Wisnu Bawa Tenaya ngaptiang mangda risajeroning ngamargiang program kerja ring salanturnyane prasida kawangun kolaborsi pentahelic sajeroning ngamargiang dharma agama miwah dharma negara.
"Sapunapi ngwangun prakanti wiadin komunikasi sareng pemerintah, enterpreneur, pantaraning agama, wiadin organisasi PHDI, mangda prasida raket sekadi sampat lidi," baosnyane.
Dane taler nyarengang Umat Hindu mangda setata masikian miwah setata eling ring Bhisama,Umat Hindu ring Nusantara taler setata nginggilan Pancasila pinaka dasar negara.(gix)
Komentar