• Home
• News

Gubernur Bali, Wayan Koster Ngamolihang People of The Year 2021

• 25 November 2021
• 19:11 WITA
• News

DENPASAR, Balitopnews.com - Gubernur Bali, Wayan Koster ngamolihang penghargaan People of The Year 2021 ring kategori Best Governor for Healthcare and Action Against Pandemic saking Metro TV ring rahina Buda (24 Nopember 2021) ring Jakarta.

Penghargaan sane katerima Gubernur Bali, Wayan Koster pinaka pamikolih saking panureksan sane kalaksanayang olih pitung diri angga panureksa minakadi: 1). Presiden Direktur Metro TV, Don Bosco Selamun; 2). Pemimpin Redaksi Metro TV, Arief Suditomo; 3). CEO Medcom.id, Kania Sutisnawinata; 4). Guru Besar FISIP UI Jakarta, Prof. Dr. Eko Prasojo; 5). Rektor IPB Bogor, Prof. Dr. Arif Satria; 6). Epidemiolog UGM Yogyakarta, Prof. Dr. dr. Hari Kusnanto; miwah 7). Ketua Umum Apindo, Hariyadi Sukamdani.

Sajeroning siaran LIVE Metro TV sane kalaksanayang ring Grand Studio Metro TV Jakarta kabaosang yening antuk kapamucukan Gubernur Wayan Koster, Bali dados provinsi kapertama saha pinih akeh nglaksanayang vaksinasi Covid-19, pinih becik sajeroning ngamargiang protokol kesehatan, wiadin sajeroning nglaksanayang PPKM Mikro. Salanturnyane nglaksanayanayang sertifikasi CHSE (Cleanlinnes, Health, Safety, miwah Environment Sustainability) majeng hotel ring Bali sajeroning ngicen ayah-ayah majeng wisatawan duranegara sane rauh ka Pulo Dewata.Gubernur Koster taler katureksain sumeken sajeroning ngicen pidanda majeng wisatawan, yening kapanggihin mamurug  raris kalaksanayang deportasi.

Antuk penghargaan punika, Koster maosang yening penghargaan sane katerima pinaka pamikolih saking pikaryan sane madasar prakanti sane becik, ingggian maprakanti sareng Pemerintah Pusat, Pemerintah Provinsi Bali, Pemerintah Kabupaten/Kota ring Bali, rauhing ring desa wiadin desa adat ring Bali, miwah prakanti sareng becik sareng samian angga ring Bali sajeroning ngarepin Pandemi Covid-19.

“Melarapan antuk penghargaan puniki, Titiang ngaturang suksma majeng Bapak Pangdam IX/Udayana, Bapak Kapolda Bali, Kepala Kejaksaan Tinggi Bali, Ketua Pengadilan Tinggi Bali, Bupati/Walikota sajebag Bali, Kepala Desa, Lurah,  Bendesa sajebag Bali, miwah samian angga ring Bali sane sampun nglasanayang makudang pangupaya sajeroning ngarepin Pandemi Covid-19, nganutin saking geguat sane kamedalang Pemerintah Pusat,” baosnyane.

Wayan Koster pinaka silih tunggil Gubernur sane ngamolihang People of The Year 2021 kasarengin antuk 8 Gubernur minakadi (Gubernur DKI Jakarta, Anies Baswedan; Gubernur Jawa Timur, Khofifah Indar Parawansa; Gubernur Bangka Belitung, Erzaldi Rosman Djohan; Gubernur Sulawesi Tenggara, Ali Mazi; Gubernur Kepulauan Riau, Ansar Ahmad; Gubernur Jambi, Al Haris; Gubernur Jawa Barat, Ridwan Kamil miwah Gubernur Jawa Tengah, Ganjar Pranowo, red) sane ngamolihang penghargaan ring makudang kategori, sekadi Best Governor for Inclusive Economic Growth, Best Governor for Empowerment & Education, Best Governor for Healthcare and Action Against Pandemic, miwah Best Governor for E-Gov & Digital Innovation.

Tiosan ring 9 Gubernur sane ngamolihang penghargaan puniki, kalikita yening wenten taler penghargaan Innovative Governmental Organization, sane kapolihang Menteri Kesehatan, Satgas Covid- 19, miwah Menteri Pendidikan, Kebudayaan, Riset, dan Teknologi; Patron of Development Partnership sane kapolihang Gusdurian, Kawal Covid19, lan Rumah Zakat; salanturnyane PT Kalbe Farma Tbk, TIKI Jalur Nugraha Ekakurir (JNE), miwah Grahasari Suryajaya ngamolihang penghargaan Corporation Participation Against Pandemic; Scientific Breakthrough Against Pandemic kapolihang olih silih tunggil sane nuwenang hak paten vaksin AstraZeneca, Carina Citra Dewi Joe; Penggagas ventilator portabel

Vent-I, Syarief Hidayat saha tim; miwah PeduliLindungi sane ngingkupin Kementerian Kesehatan, Kementerian Komunikasi dan Informatika, miwah Telkom; saha pinih untat penghargaan Lifetime Achievement kapolihang antuk pecak Hakim Agung Artidjo Alkostar sane sampun palatra.

Presiden Direktur Metro TV sane sepisanan pinaka Ketua Dewan Juri People of The Year 2021, Don Bosco Selamun maosang kalih dasa sasih wangsa panegara puniki ngutsayahayang makudang pangupaya ngarepin Covid-19. 

“Ring kahanan sekadi punika, panureksain People of The Year Metro TV 2021 kalaksanayang, saha antuk punika samian sane ngamolihang penghargaan ring warsane puniki pinaka angga sane mautsaha ageng majeng anak tios. Samian wantah sane sayuwakti makarya, makarya langkungan ring anak tios, makarya madasar antuk kapradnyanan, saha nenten naenin rered nyaga karajegan wangsa,” baosnyane.(gix)