Nyokong Desa Wisata Luput saking Narkoba, Kepala BNN Ngamikukuhang Relawan PRG
- 26 November 2021
- 16:11 WITA
- News
DENPASAR, Balitopnews.com - Badan Narkotika Nasional (BNN) tiosan mautsaha ngaluputang kawentenan narkoba taler nglaksanayang soft power minakadi pidabdab nambakin panglimbak narkoba melarapan antuk pemberdayaan masyarakat, sekadi nyarengang déúa adat wiadin para yowana mangda siddha ngardi Desa Bersinar (Desa Bersih Narkoba).
Parindikan punika kabaosang Kepala BNN Komjen Pol. Petrus R. Golose, ri kala Pamikukuhan Relawan P4GN Prajuru Reksa Gargita (PRG) BNN Kota Denpasar Warsa 2021 miwah Launching Desa Wisata Bersinar, ring Gedung Dharma Negara Alaya, Lumintang, Sukra (26 November 2021).
"Sekadi sane ketah kauningin yening pikobet narkoba puniki kantos dados pikobet wangsa panegara. Samian kapatutang mangda nyarengin ngarembe pikobete puniki. Tiang taler setata mautsaha nees panglimbak ipun," baosnyane.
Komjen Golose ngawewehin, BNN maprakanti sareng desa adat taler anggota PRG wiadin moncoling krama, setata nglaksanayang parikrama wiadin pidabdab sajeroning nees pangelimbak narkoba utaminipun ring Pulo Bali.
Dane ngawewehin, mapaiketan sareng rehabilitasi ring Bali, pemerintah Inggris taler nyarengin ngaremba melarapan antuk wantuan program rehabilitasi wiadin konseling majeng pengguna narkoba ring Bali.
Melarapan antuk pangremba saking samian angga utaminipun Walikota Denpasar, Dane nyarengang samian angga ngulati Kota Denpasar Bersinar (Bersih dari Narkoba) rauhing ring banjar-banjar.
Dane ngicen conto melarapan antuk lomba tenis meja pantaraning banjar sajeroning ngluputang kawentenan narkoba rauhing ring banjar, kajantenang yening panyanggra krama ageng pisan.
Saking laporan Kepala BNNP Bali, manut Golose yening panglimbak narkoba kantun prasida kaarepin wiadin kakendaliang.
Nanging panureksan majanten patut katincapang rauhing ring undanan pinih alit sekadi banjar, mangda prasida ngaluputang kawentenan narkoba, saantukan sane mangkin wenten panincap akidik indik sane nganggen methapetamin utawi shabu.
Walikota Denpasar IGN Jaya Negara maosang Pemkot Denpasar mawit ring undagan desa/kelurahan sayaga nyokong BNN mangda Kota Denpasar prasida luput saking narkoba.
Jaya Negara ngawewehin ring Kota Denpasar wenten 2 Desa Bersinar, silih tunggilnyane ring desa wisata Kesiman Kertalangu.
"Salanturnyane jagi katincapang rauhing ring desa/kelurahan ring sajebag Kota Denpasar. Mawit desa bersih saking narkotika, kota, rauhing ring nasional," baosnyane.(gix)
Komentar