Bali Dados Tuan Rumah Sertifikasi Jafung Arsiparis, Nyarengang 40 Arsiparis Pusat miwah Daerah

  • 29 Juni 2022
  • 21:06 WITA
  • News
Kepala Biro Umum dan Protokol Setda Provinsi Bali Drs. I Wayan Budiasa, M.Si

BADUNG , Balitopnews.com - Bali dados tuan rumah pamargi parikrama sertifikasi Jabatan Fungsional (Jafung) Arsiparis Angkatan ka-28 sane kalaksanayang Arsip Nasional Republik Indonesia (ANRI). Parikrama kalaksanayang ring Harris Hotel &  Residences Sunset Road saking tanggal 28 Juni kantos 1 Juli 2022. Sertifikasi nyarengang 40 pamilet, minakadi 32 arsiparis Pemprov Bali miwah 8 diri arsiparis saking instansi pusat, kabungkah resmi ring rahina Buda Umanis Wuku Medangsia tanggal 29 Juni 2022.

Kepala Biro Umum dan Protokol Setda Provinsi Bali Drs. I Wayan Budiasa, M.Si sajeroning sambrama wacanannyane ngaturang suksma saantukan Bali kadadosang tuan rumah pamargin sertifikasi. Dane rauh ngangganin Pemprov Bali saantukan OPD sane kamanggalain antuk Dane wantah ring widang kearsipan ngawit pamargin reformasi birokrasi warsa 2022. “Silih tunggil pawesana sangkaning penataan birokrasi sane kalaksanayang inggih punika  penanganan arsip wenten ring Biro Umum dan Protokol,” baosnyane.

Maosang indik tata kelola kearsipan, Dane maosang wenten papat parindikan sane patut kauratiang minakadi sumber daya manusia, sarana wiadin prasarana, panyokong mekanisme miwah kasokong antuk anggaran. Kadasarin antuk papat parindikan punika, ring tengahing pandemi kadi mangkin, tata kelola kearsipan kaarepin antuk pakibeh marupa pendanaan. Wiwilan ipun saantukan kawentenan rasionalisasi anggaran sane ngamatutang pemerintah ngamedalang skala prioritas. “Sarana wiadin prasarana widang kearsipan sane kaduwenang majanten durung sayuwakti becik. Makudang-kudang provinsi sampun madue  depo, nanging Titiang iriki durung,” pawewehnyane. Sangkaning punika, Pemprov Bali ngicen uratian ageng minakadi majeng pangupaya nincapang SDM widang kearsipan. Anggannyane rumasa seneng saantukan ANRI nyokong pangupaya punika, Bali kadadosang tuan rumah pamargin sertifikasi arsiparis. Melarapan antuk sertifikasi puniki, Dane ngaptiang panincap kawagedan arsiparis prasida anut sareng penguatan  kapabilitasnyane.

Direktur Sumber Daya Manusia Kearsipan dan Sertifikasi ANRI Dr.Andi Abubakar, SIP.M.Si maosang yening parikrama puniki matetujon mastikayang mutu kelayakan sajeroning pelayanan kearsipan. Melarapan pamargin sertifikasi, Dane ngaptiang mangda pamargin kearsipan prasida kalaksanayang manut standar sane wenten. Melarapan antuk sertifikasi wiadin uji kompetensi, arsiparis kaaptiang prasida nyihnayang akuntabilitas kinerja wiadin prasida ngaremba sajeroning nincapang kawentenan organisasi. (Rls/Btnc) 


TAGS :

Komentar